Працягваецца рамонт пуцеправодаў па вуліцы Завадской у Магілёве. Пасля завяршэння рэканструкцыі маста каля Быхаўскага рынка, з-за якога амаль на два месяцы была перакрытая вуліца Чалюскінцаў, будаўнікі пераходзяць да новага маста – па праспекце Шмідта (на фота).
На працягу рамонтных работ рух па праспекце будзе спынены. Работы пачнуцца 24 кастрычніка і паводле папярэдніх планаў працягнуцца да 31 снежня 2023 года – паведамляе mycity.by.
Фота: yandex.maps, скрыншот
Дом па вуліцы Першамайскай, 32 у Магілёве памяняў свой знешні выгляд. Mogilev.media пісалі пра гэта, дэманструючы шмат фота і відэа. А днямі на тэлеграм-канале “Спадчына” з’явіўся экспертны каментарый пра хібы, дапушчаныя магілёўскімі будаўнікамі на рэканструкцыі гэтага аб’екта.
Аўтар канала звяртае ўвагу на дробныя, амаль незаўважныя з абывацельскага пункта гледжання нюансы, якія, аднак, ствараюць агульную карціну ўсяго будынка. А будынак з нядаўняга часу ўваходзіць у спіс дамоў “каштоўнай забудовы”, на якіх забараняецца мяняць характар архітэктуры фасадаў.
Такім чынам, хібы, якія можна назіраць ужо зараз. Па-першае, парапетная сценка балкона стала роўнай, у той час як папярэдне яна мела раскрапоўку – прамавугольныя выступы на плоскасці.
Па-другое, памяняўся знешні выгляд балясін – ажурнага шэрагу калон у праёмах парапетнай сценкі. Цяпер яны не ідуць на адным узроўні з плоскасцю сценкі, а заглыбленыя.
Таксама змяніліся самі балясы – слупочкі парэнчаў. Раней гэта былі роўныя калоны цыліндрычнай формы з карынфскай капітэллю. Цяпер жа гэта фігурныя кеглепадобныя калоны з дарычнай капітэллю.
Па-трэцяе, адсутнічае кесаніраванне ніжняй плоскасці балкона. Кесон – гэта прамавугольнае заглыбленне. У ранейшым выглядзе балкон нібыта абапіраўся бэлькай на фігурныя кранштэйны з раслінным арнаментам. Зараз ён стаіць на прамавугольных выступах.
Таксама адсутнічаюць прафіляваныя паяскі, адзначае аўтар канала “Спадчына”, агаворваючыся, што іх яшчэ могуць дадаць. Але тыя, што зроблены – не адпавядаюць тым, што былі да рамонту.
“Магчыма, што пры аднаўленні паяскоў кіраваліся прафілямі з гістарычных чарцяжоў будынка – адзначае эксперт – але іншыя вышэй пералічаныя хібы кажуць пра тое, што чарцяжы тут наўрад ці адыгрывалі нейкую ролю. Больш менш праўдападобна аднавілі хіба што самі кранштэйны – і гэта ўжо вялікі прагрэс для горада.”
Фота: Тэлеграм-канал “Спадчына”, mogilev.media
Нагадаем, 17 красавіка на казырку паштовага аддзялення дома №24 па вуліцы Габраўскай было знойдзена нованароджанае дзіця. У той жа дзень знайшлі і маці – 34-гадовую жанчыну, якая праз акно свайго пакоя змясціла нованароджаную на дах будынка, прылеглую да хаты, а сама вярнулася ў кватэру. Дзіця заўважыла суседка, якая выклікала хуткую дапамогу. Дзяўчынку даставілі з агульным пераахаладжэннем у бальніцу, дзе ёй аказалі медыцынскую дапамогу.
Магілёўскі абласны суд вынес жанчыне абвінаваўчы прысуд. На падставе ч.1 арт.14, п.п.2, 6 ч.2 арт.139 Крымінальнага кодэкса Рэспублікі Беларусь абвінавачанай прызначана пакаранне ў выглядзе пазбаўлення волі на тэрмін 9 гадоў з адбываннем у папраўчай калоніі ва ўмовах агульнага рэжыму.
Адначасова з пастановай прысуду суд у поўным аб’ёме задаволіў іскавыя патрабаванні законнага прадстаўніка непаўналетняй пацярпелай у асобе УАЗ “Спецыялізаваны Дом дзіцяці для дзяцей з арганічным паразай ЦНС з парушэннем псіхікі” аб спагнанні з абвінавачанай кампенсацыі маральнай шкоды, прычыненай злачынствам.
Прыгавор не ўступіў у законную сілу, можа быць абскарджаны і апратэставаны ў апеляцыйным парадку.
Фота: Следчы камітэт
Спасылаючыся на ізраільскі канал “А24” выданне паведамляе, што Нетаньяху патэлефанаваў прэзідэнту ЗША Джо Байдэну і заявіў, што ў Ізраіля не будзе іншага выбару, акрамя як пачаць наземную аперацыю ў Газе.
Размова паміж Нетаньяху і Байдэнам у нядзелю стала другой пасля нечаканай атакі ХАМАС на Ізраіль. Паводле крыніц, Нетаньяху праінфармаваў Байдэна падчас тэлефоннай размовы, што нельга праяўляць слабасць на Блізкім Усходзе, і гэта прымусіць Ізраіль дзейнічаць з вялікай сілай.
Нагадаем, у суботу ХАМАС нанёс ракетны ўдар, і яго байцы праніклі праз сушу, мора і праз памежную агароджу ў населеныя пункты, якія атачаюць Газу. Гэта стала самым жорсткім нападам на Ізраіль за апошнія дзесяцігоддзі.
Ізраільская армія адказала інтэнсіўнай бамбардзіроўкай сектара Газа, які кантралюецца ісламскім рухам ХАМАС і знаходзіцца ў аблозе Ізраіля з 2007 года.
У выніку эскалацыі з ізраільскага боку загінула больш за 800 чалавек, у сектары Газа – 560. З абодвух бакоў – тысячы параненых.
Крыніцы адзначылі, што прэзідэнт ЗША спытаў Нетаньяху аб дадатковых сцэнарах эскалацыі пазней, і Байдэн адзначыў, што паведамленні, якія дайшлі да ЗША з Лівана, заключаліся ў тым, што дадатковы фронт не будзе адкрыты. Нетаньяху адказаў Байдэну, што яго турбуе сцэнар адкрыцця дадатковага фронту на поўначы, і што Ізраіль рыхтуецца да гэтага.
Адносна пытання закладнікаў, якія знаходзяцца ў руках ХАМАС у Газе, Нетаньяху сказаў, што Ізраіль не зацікаўлены ў правядзенні якіх-небудзь перамоваў па гэтым пытанні на дадзеным этапе: «Ніякіх перамоў няма».
Як паведамляе ізраільскі канал, амерыканская крыніца, знаёмая са зместам размовы, заявіла, што Байдэн не спрабаваў пераканаць Нетаньяху не праводзіць наземную аперацыю ў Газе: «Мы не спрабуем пераканаць ізраільцян у гэтым пытанні, таму што мы падтрымліваем права Ізраіля абараняць сябе, і гэта адпавядае нашым уражанням. Мы лічым, што пераканаць ізраільцян у гэтым прама цяпер немагчыма».
Фота: nbcnews.com
Найбуйнейшая ў гісторыі атака баевікоў палесцінскага ісламісцкага руху ХАМАС адбылася раніцай 7 кастрычніка. Масіраваны ракетны ўдар па ўсёй тэрыторыі Ізраіля, уключаючы Тэль-Авіў і Іерусалім, працягваўся каля паўгадзіны, пачынаючы з 06.28. З самай раніцы пачалі паступаць паведамленні пра інфільтрацыю на тэрыторыю Ізраіля груп баевікоў ХАМАС, якія захапілі паліцэйскі ўчастак у горадзе Сдэрот, заблакавалі мірных жыхароў у прымежных паселішчах, забілі і ўзялі ў палон ізраільскіх салдат.
З горада Сдэрот пачалі паступаць паведамленні і відэаролікі, на якіх бачныя целы забітых мірных жыхароў, а таксама спалены ізраільскі танк.
«Мы абвяшчаем аб пачатку аперацыі «Паводка Аль-Акса» і паведамляем, што першы ўдар па пазіцыях і ўмацаваннях праціўніка перавысіў 5000 ракет і снарадаў» – заяўляецца на афіцыйным сайце ХАМАС.
У адказ на напады, якія, гледзячы па ўсім, засталі Армію абароны Ізраілю знянацку, Ізраіль абвясціў стан вайны.
Паводле ацэнак ізраільскай паліцыі, на дадзены момант у краіне знаходзяцца 60 баевікоў, паведамляе Haaretz. Баявыя дзеянні працягваюцца. Дадаецца, што жыхарам прылеглай да сектара Газа тэрыторыі было загадана заставацца ў сваіх дамах. “Армія абароны Ізраіля будзе абараняць ізраільскае грамадзянскае насельніцтва, а тэрарыстычная арганізацыя ХАМАС заплаціць высокую цану за свае дзеянні” – гаворыцца ў заяве ваенных.
Міністр абароны краіны Ёаў Галант абвясціў набор у войска рэзервістаў. Ізраільскія знішчальнікі наносяць удары па цэлях у сектары Газа, вайскоўцы перакрываюць дарогі вакол анклава. Армія Ізраіля аб’явіла аб пачатку «контртэрарыстычнай» аперацыі «Жалезныя мячы» у сектары Газа.
Фота з адкрытых крыніц
Гаражны кааператыў “Спадарожнік-2008” калісьці быў самым буйным магілёўскім гаражным масівам. Пабудаваны яшчэ ў канцы 1970-х гадоў на самым ускрайку абласнога цэнтра, ён спачатку забяспечыў надзённыя патрэбы тысяч аўтаўладальнікаў, а потым ператварыўся ў галаўны боль.
Нягледзячы на рост колькасці аўтамабіляў у магілёўцаў у 1990-х і 2000-х гадах, гэты гаражны масіў аказаўся амаль нікому не патрэбны. Ён быў тады размешчаны далёка ад спальных раёнаў, таму жыхары больш схіляліся пакідаць аўто каля свайго дома, чым ставіць яго на ноч у гараж на іншым канцы горада.
Сваю ролю адыграла і велічыня гаражнага масіва. Яго аказалася немагчыма ахоўваць, таму “гаражы на абласной” неўзабаве ператварыліся ў раён промыслу для людзей з невысокімі сацыяльнымі патрэбамі. Праломы ў сценах, надпісы “гараж пустой” тут сустракаюцца на кожным кроку.
Лёс гаражнага масіва істотна змяніўся з будаўніцтвам побач новых мікрараёнаў, але больш за ўсё – з пабудовай аб’язной дарогі-дублёра, якая злучыла раён абласной бальніцы з плошчай Касманаўтаў. Першая чарга трасы адрэзала ад масіва невялікую частку гаражоў, затое другая чарга – якая пакуль нікуды асабліва і не вядзе – разрэзала кааператыў на дзве часткі.
Першая частка, якая засталася каля абласной бальніцы, аказалася ў больш-манш выгадным становішчы. Сюды зручна дабрацца што на машыне, што пешкі з суседніх дамоў. Наяўнасць побач новых мікрараёнаў “Спадарожнік-1” і “Спадарожнік-2” ў далейшым павінна прывесці да росту попыту на гэтыя гаражы, а потым і да лепшай уладкаванасці тэрыторыі.
Другая ж частка апынулася практычна па-за дасягальнасцю для камфортнай эксплуатацыі. Каб дабрацца сюды, трэба знайсці грунтовую дарогу праз могілкі, збоч новага кальца дарогі-дублёра.
Альбо можна скарыстаацца з’ездам з дарогі-дублёра. Але пешкі дабрацца сюды ўжо даволі доўгая дарога, так што гэтая другая частка кааператыва, як выглядае, асуджаная на далейшае дэпрэсіўнае існаванне. Абваленыя дахі і разламаныя сцены, безгаспадарлівасць на кожным кроку, і выглядае, што на гэтым тут час так і спыніцца.
Посмотреть эту публикацию в Instagram
Фота, відэа: mogilev.media
Магілёўскія фігуранты “справы артапедаў-траўматолагаў” – былы загадчык артапедычнага аддзялення Магілёўскай бальніцы №1 (Лаўсанаўскай) Алег Сарнацкі і былы загадчык траўматалагічнага аддзялення Магілёўскай абласной бальніцы Алег Абелевіч былі арыштаваныя разам з 35-цю іншымі медыкамі-траўматолагамі па ўсёй краіне ў 2022 годзе. Пазней яны былі вызвалены з-пад варты і накіраваны працаваць па спецыяльнасці шараговымі медработнікамі – паведамлялі mogilev.media.
Так, Алег Абелевіч быў накіраваны працаваць шараговым траўматолагам у Магілёўскую гарадскую бальніцу хуткай медыцынскай дапамогі, а Алег Сарнацкі – на аналагічную пасаду ў Магілёўскую абласную бальніцу.
27 верасня Генеральная пракуратура абвясціла пра прысуд аднаму з іх. Паводле інфармацыі беларускіх СМІ, размова ідзе пра Алега Сарнацкага (на фота), хоць імя абвінавачанага ў матэрыялах пракуратуры не ўказваецца.
Паводле пракуратуры, абвінавачаны з 2018 года да сакавіка 2022-га нібыта сістэматычна атрымліваў грашовыя сродкі ад прадстаўнікоў камерцыйных арганізацый, пастаўшчыкоў эндапратэзаў за кожную праведзеную аперацыю па татальным эндапратэзаванні тазасцегнавога або каленнага суставаў з матэрыялаў іх вытворчасці.
За ўвесь час былы загадчык аддзялення нібыта атрымаў узнагароджанне ў памеры 750 даляраў ЗША і звыш 15 тыс. еўра. Паведамляецца, што ў ходзе судовага следства абвінавачаны чыстасардэчна раскаяўся і кампенсаваў у поўным аб’ёме даход, атрыманы незаконным шляхам.
Суд Кастрычніцкага раёна Магілёва вынес абвінаваўчы прысуд, але ў калонію Алега Сарнацкага пакуль не адправяць. Яму прызначана пакаранне ў выглядзе пазбаўлення волі на тэрмін 4 гады з адтэрміноўкай яго выканання на 2 гады са штрафам у памеры 600 базавых велічынь (22,2 тыс. рублёў).
Фота: Адміністрацыя Кастрычніцкага раёна г. Магілёва
За інфармацыяй вакол продажу памяшканняў магілёўскага завода “Строммашына”, пра якую шмат пісалі рэгіянальныя СМІ, прыхаваўся адзін малазаўважны факт. Існуе верагоднасць, што рэканструкцыя і перафарматаванне памяшканняў завода-банкрута закране таксама лёс папулярных магілёўскіх барахолак – Быхаўскага і Мінскага рынкаў.
Так, у вялікім матэрыяле “Магілёўскіх ведамасцяў” пра далейшы лёс плошчаў “Строммашыны” гаворыцца паміж іншага наступнае:
“Як растлумачыў начальнік упраўлення архітэктуры і горадабудаўніцтва Магілёўскага гарвыканкама – галоўны архітэктар горада Дзмітрый Бабкуноў – будынак ліцейнага цэха знясуць, астатнія карпусы цэхаў і адміністрацыйных будынкаў прадпрыемства будуць выкарыстоўвацца для стварэння поліфункцыянальнай прасторы з аб’ектамі гандлю, абслугоўвання, культурна-забаўляльнага прызначэння.
З’явяцца магчымасці і для камфортнага пераносу Мінскага і Быхаўскага рынкаў (выдзелена намі – М.М.) з уладкаваннем вялікай аўтастаянкі. Ад падобнай рэканструкцыі выйграюць усе – і гараджане, і прадпрымальнікі. Але яна будзе весціся па спецыяльным праекце.”
Што Мінскі, што Быхаўскі рынкі – даўні галаўны боль, калі не мазоль для магілёўскага чынавенства. Хаатычнасць барахолкі цяжка ўкладваецца ў іх светаўспрыняцце. Ужо дзесяцігоддзямі можна назіраць, як спарадычна міліцыянты ганяюць бабулек з картонкамі каля Мінскага рынка. Альбо як іх спрабуюць выціснуць на вечна пустыя прылаўкі, абсталяваныя за цэнтральным уваходам, далей ад вуліцы Першамайскай.
Магчыма, і найбольш верагодна, што цэнтральнай задачай у плане пераноса Мінскага і Быхаўскага рынкаў з’яўляецца паляпшэнне гандлёвых умоваў для сур’ёзных прадпрымальнікаў і іх пакупнікоў. Аднак разам з гэтым могуць быць прынятыя і чарговыя кардынальныя меры, якія могуць пакінуць горад без гэтых унікальных рынкаў з іх разняволенай атмасферай дробнага вулічнага гандлю. А хацелася б нагадаць, што падобныя “блашыныя” кірмашы ва ўсім свеце – цэнтр турыстычнага прыцягнення, люднае месца, якое прыцягвае натоўпы цікаўных.
Фота: mogilev.media
21 верасня адбыўся аўкцыён па продажы магілёўскага завода “Строммашына” – паведамляе realt.by. Першапачаткова маёмасць завода выставілі на таргі ў ліпені за 26,7 млн рублёў. Прычына – даўгі прадпрыемства. Але на некалькі таргоў не было заявак. У выніку цана знізілася на 80%. Лот выставілі за 8 млн рублёў з паніжэннем цаны да мінімальнай у 5,34 млн рублёў.
У аўкцыёне было два ўдзельнікі, але адзіную стаўку зрабіў удзельнік № 1 у 15.30 – гэта значыць за поўгадзіны да заканчэння таргоў. Ім аказалася кампанія «Тведас», якой маёмасць завода дасталася за 5 738 812 рублёў або каля 1,76 млн даляраў.
Фірма “Тведас” спецыялізуецца на тым, што здае ў арэнду свае памяшканні (ёй належыць, напрыклад, гандлёвы цэнтр на рагу Бульвара Непакораных і Астроўскага) альбо памяшканні, якія арандуе сама. Заснавальнікам і кіраўніком фірмы фігуруе Сяргей Лапін.
Кампаніі дасталіся аб’екты нерухомасці, энергетычнай інфраструктуры і добраўпарадкавання. Плошчы – больш за 70 тысяч квадратных метраў. Яно размяшчаецца на ўчастку ў 13,5 гектара ў цэнтры Магілёва.
Участак былой “Строммашыны” паводле заканадаўства можа забудоўвацца пад грамадзянскую, жылую, транспартную інфраструктуру.
Фота: mogilev.media
У Магілёве праходзіць рэканструкцыя аднаго з самых ажыўленых праспектаў горада. З 21 па 26 верасня тут будзе праводзіцца ўкладка асфальтабетоннага пакрыцця. На бягучы момант чатыры паласы з шасці на праспекце перакрытыя дзеля правядзення дарожных работ. Астатніх дзвюх палос яўна бракуе для пропуску ўсяго транспарта. Пробкі ўтвараюцца адразу на выездзе на праспект з дзясяткаў аўтамашын.
Рэканструкцыя прадугледжвае стварэнне новых кішэняў для грамадскага транспарта. Таксама памяняецца схема мясцовых пераездаў – некаторыя ўжо закладзеныя бардзюрамі, а замест іх прабіваюцца новыя.
Нязручнасцяў хапае і карыстальнікам грамадскага транспарту. З-за немагчымасці спыняцца на прыпынках, аўтобусы высаджваюць пасажыраў проста на вільготнае дарожнае палатно, па якім катаюцца нетаропкі я асфальтаўкладчыкі.
Посмотреть эту публикацию в Instagram
Фота, відэа: mogilev.media
