Tag: суд

Украіна перадала Расіі беларускага наёмніка падчас абмену палоннымі

Навіна ад

Афіцыйным Кіевам падчас абмену ваеннапалоннымі 7 сакавіка Расіі быў перадзены беларускі найміт, якога асудзілі за ўдзел у расійскай агрэсіі супраць Украіны – перадае news.pn.

Грамадзянін Беларусі Максім Зязюльчык (на фота) патрапіў у спіс 90 расійскіх вайскоўцаў, якія былі абменены на 130 украінскіх вайскоўцаў на мяжы Украіны з Белгарадскай вобласцю. 

18 студзеня ў Кіеве Зязюльчык быў прыгавораны судом да 10 гадоў пазбаўлення волі за ўдзел у якасці найміта ў баявых дзеяннях супраць Украіны. Пры гэтым суд прыняў рашэнне аб вызваленні беларуса ад адбывання пакарання ва Украіне.

Максім Зязюльчык асабіста падпісаў заяву, у якой пагадзіўся на перадачу Расіі ў абмен на палоннага вайскоўца, грамадзяніна Украіны.

Міжнародная следчая група абвінавачвае Пуціна ў катастрофе Боінга МН17 у 2014 годзе

Навіна ад

Следчыя заявілі, што Пуцін мог асабіста ўхваліць дастаўку ракетнага комплексу БУК, які збіў самалёт MH17 над Данбасам, але яго немагчыма абвінаваціць з-за міжнароднага імунітэту.

Як паведаміла BBC, праз два з паловай месяцы пасля таго, як завяршыўся суд над абвінавачванымі па справе MH17, следчая група абвясціла, што зрабіла ўсё магчымае, каб усталяваць іншых падазраваных, але больш не можа нікому афіцыйна прад’явіць абвінавачванне.

У пачатку прэс-канферэнцыі прадстаўнікі аб’яднанай следчай групы заявілі, што ўсе магчымыя версіі былі старанна вывучаны, што следчыя зрабілі ўсё магчымае, каб усталяваць праўду, але атрыманых вынікаў недастаткова, каб прад’явіць абвінавачванні ў дачыненні да іншых магчымых удзельнікаў.

У той жа час, следчыя прадэманстравалі ўлікі, у тым ліку тэлефонныя перахопы, якія сведчаць, што Уладзімір Пуцін браў асабісты і непасрэдны ўдзел у тым, што адбывалася на Данбасе. Але Нідэрланды не могуць расследаваць яго ролю, бо ў прэзідэнта ёсць імунітэт у адпаведнасці з міжнародным заканадаўствам да таго часу, пакуль ён застаецца прэзідэнтам.

Для таго, каб пацвердзіць тэзіс аб адказнасці Пуціна, былі прадстаўлены дзве перахопленыя тэлефонныя размовы з удзелам памочніка кіраўніка Крыма (Крым быў далучаны Расіяй у 2014 годзе) Сяргея Аксёнава 8 ліпеня 2014 года. У абедзвюх размовах чыноўнік неаднаразова кажа, што рашэнне адправіць Бук у Данбас прымае “ніякі [не] генерал, не міністр абароны”, а толькі “самая першая асоба”. Паведамляецца, што гэтыя размовы адбыліся яшчэ да таго, як Boeing быў збіты.

На прэс-канферэнцыі таксама быў агучаны запіс размовы Пуціна з кіраўніком самаабвешчанай Луганскай Народнай Рэспублікі Ігарам Платніцкім у лістападзе 2017 года. Размова відавочна паказвае, як Расія і асабіста Ўладзімір Пуцін удзельнічалі ў дзеяннях сепаратыстаў у Данбасе.

Міністэрства замежных спраў Нідэрландаў ужо выклікала расійскі пасла з-за доказаў удзелу Пуціна ў катастрофе MH17. Аднак прэм’ер-міністр Нідэрландаў адмовіўся адпраўляць расійскага пасла з краіны, паколькі ён лічыць важным “захаваць адкрытыя лініі з Крамлем”.

Фота з адкрытых крыніц.

Бабруйчанка абараніла свой гонар і адсудзіла ў наймальніка грошы за маральныя пакуты

Навіна ад

Судовая калегія па грамадзянскіх справах Магілёўскага абласнога суда пакінула ў сіле рашэнне Бабруйскага суда і абараніла парушаныя правы работніцы. Але ісціца засталася незадаволена сумай кампенсацыі, бо ёй налічылі 300, а не 6000 рублёў. 

Як паведамляе bobr.by, бабруйчанка працавала ў гандлёвай кампаніі спецыялістам у аддзеле рознічнага гандлю. Больш чым за месяц да заканчэння кантракту яна і працадаўца ў пісьмовай форме вырашылі працягнуць працоўныя адносіны. Аднак кіраўніцтва кампаніі за 9 дзён да заканчэння кантракту паведаміла супрацоўніцы, што фірма больш не мае патрэб у яе паслугах. Жанчыну звольнілі ў сувязі з заканчэннем тэрміну працоўнага дагавора.

Бабруйчанка палічыла сваё звальненне незаконным і падала пазоў у суд першай інстанцыі. У сваёй заяве яна папрасіла аднавіць яе на працы і спагнаць з працадаўцы яе сярэдні заробак падчас прымусовага прагулу. У гэтай частцы суд раёна цалкам задаволіў яе патрабаванні, прызнаў факт парушэння працоўнага кодэксу працадаўцам, які быў абавязаны не пазней за месяц папярэдзіць супрацоўніцу пра звальненне.

Яшчэ адным патрабаваннем незаконна звольненай жанчыны было спагнанне кампенсацыі за маральную шкоду з боку працадаўцы. У сваім судовым іску яна заявіла, што перажыла маральныя пакуты, у тым ліку – перажыванні, якія былі звязаны са стратай працы і рэзкага пагаршэння фінансавага становішча, пачуццё шоку і нечаканасці. Свае пакуты яна ацаніла ў 6 тысяч рублёў. У гэтай частцы суд першай інстанцыі толькі часткова задаволіў пазоў, вырашыўшы спагнаць з працадаўца 300 рублёў за маральную шкоду, якую ён нанёс работніцы.

Сума кампенсацыі падалася бабруйчанцы недастатковай, і яна абскардзіла гэтае рашэнне ў вышэйшым судзе. Але Магілёўскі абласны суд у пачатку лютага пакінуў у сіле рашэнне Бабруйскага суда.

У каментарах чытачы звярнулі ўвагу на тое, што пасля прысуду работніца доўга не зможа працаваць у фірме, і на тое, што справа паказвае падзел нашага грамадства на няроўныя групы: “… адным 10 тысяч выплачваюць, а звычайным людзям 300 руб і хопіць”.

Фота з адкрытых крыніц. 

Асудзілі двух дырэктараў “Магатэкса” – штраф і ўмоўны тэрмін

Навіна ад

Дырэктар па вытворчасці, а таксама дырэктар фабрыкі па аздабленні на магілёўскім прадпрыемстве “Магатэкс” атрымалі ўмоўныя тэрміны і штраф за прыпіскі ў справаздачах – паведамляе прэс-служба Вярхоўнага суда Беларусі. 

– Наўмысна, з мэтай утойвання адмоўных вынікаў гаспадарчай дзейнасці прадпрыемства, штомесяц, з дапамогай аботнікаў аздобнай фабрыкі якія нічога не падазравалі – гаворыцца ў судовым рашэнні – падсудныя арганізавалі складанне афіцыйных дакументаў аб выкананні фабрыкай плана выпуску прадукцыі, якія змяшчалі недакладныя звесткі аб выкананні фабрыкай плана выпуску прадукцыі і аб выкананні паказчыкаў і ўмоў прэміравання аддзелачнай фабрыцы, якія падпісаў абвінавачаны А. і прадаставіў для подпісу абвінавачанай І.

Абодва прызнаныя вінаватымі ў перавышэнні службовых паўнамоцтваў, а менавіта ў тым, што падраблялі справаздачнасць дзеля атрымання высокіх прэмій. У выніку нанесеная шкода ацэньваецца ў 32 225,39 рублёў. Іх прыгаварылі да трох гадоў пазбаўлення волі з адтэрміноўкай на два гады і штрафу ў 300 базавых велічынь (11 100 рублёў), а таксама пазбавілі права займаць кіраўнічыя і адміністрацыйныя пасады на пяць гадоў.

Фота з адкрытых крыніц

Стала вядома, калі будуць судзіць бабруйскіх “рэйкавых партызан”

Навіна ад

Дзмітрыя Клімава, Уладзіміра Аўрамцава і Яўгена Мінкевіча будуць судзіць у Магілёўскім абласным судзе 23 студзеня. Суд будзе закрытым. 

Паводле версіі абвінавачвання, усе трое – датычныя да знішчэння двух рэлейных шаф сігнальнай усталёўкі пад Асіповічамі. Падчас затрымання Дзмітрый Клімаў (першы на фота) быў паранены сілавікамі.

Бабруйчан будуць судзіць па пяці цяжкіх артыкулах Крымінальнага кодэкса, у тым ліку за «акт тэрарызму», «здраду дзяржаве» і «ўдзел у тэрарыстычнай арганізацыі». Суддзя Ігар Шведаў будзе разглядаць гэтую справу ў закрытым рэжыме. Бабруйчанам пагражаюць жудасныя турэмныя тэрміны.

Ліквідуюць яшчэ адно грамадскае аб’яднанне – таварыства аховы помнікаў гісторыі і культуры

Навіна ад

10 студзеня ў Вярхоўным судзе Беларусі пройдзе суд аб ліквідацыі Беларускага добраахвотнага таварыства аховы помнікаў гісторыі і культуры. Пазоў на разбіральніцтва падало Міністэрства юстыцыі, працэс будзе весці суддзя Кацярына Якутовіч.

Беларускае добраахвотнае таварыства аховы помнікаў гісторыі і культуры было створана 19 чэрвеня 1965 году пастановай Цэнтральнага камітэта камуністычнай партыі Беларусі і Савета Міністраў БССР. 

Першы ўстаноўчы з’езд адбыўся ў снежні 1966 года, які прыняў Статут Таварыства і абраў огран кіравання. Кіраўнікамі таварыства ў розныя гады працавалі: І. Клімаў (1966-1977), Н. Сняжкова (1977-1986), Н. Мазай (1986-1995), М. Дзямчук (1995-1997), С. Марцалеў (1997-2007). 

З 2007 года старшынёй арганізацыі з’яўляецца гісторык-этнолаг і культуролаг Антон Астаповіч – ураджэнец Асіповіч. Сярод тых, хто працаваў у якасці намесніка старшыні быў ураджэнец Мсціслава доктар гістарычных навук Міхась Ткачоў.

Таварыства спачатку дзейнічала як дзяржаўна-грамадская інспекцыя па ахове гісторыка-культурнай спадчыны і фонд, які фінансаваў рэстаўрацыю шматлікіх помнікаў, у тым ліку Сафійскага сабора ў Полацку, кальвінісцкіх сакральных будынкаў у Заслаўі і Смаргоні.

У далейшым таварыства стала поўнасцю незалежным ад дзяржавы аб’яднаннем. Яно, у прыватнасці, змагалася супраць зносу розных гістарычных аб’ектаў і выказвала прапановы па іх уключэнні ў спіс культурных каштоўнасцей. 

Антон Астаповіч

Суд Гаагі абвясціў прыгавор па справе аб збіцці “Боінга” рэйса MH17

Навіна ад

Прысуд па справе MH17 вынес суд у Гаазе 17 лістапада, паведамляе 24 Канал. Малазійскі самалёт збілі з падкантрольнай баевікам тэрыторыі ДНР.

17 лістапада ў Нідэрландах па справе МН17 адбылося чарговае паседжанне ў судовым комплексе паблізу Амстэрдама.

Падазраванымі ў збіцці самалёта былі названыя 4 чалавекі: Сяргей Дубінскі з пазыўным “Пахмурны”, Ігар Гіркін – пазыўны “Стралкоў”, Алег Пулатаў – пазыўны “Гюрза”, Леанід Харчанка – пазыўны “Крот”.

Суд прызнаў Гіркіна, Дубінскага і Харчанку вінаватымі ў забойстве пасажыраў “Боінга”.

Самалёт быў збіты з ЗРК «Бук» з поля пад Першамайскам. Заўважым, што на лаве падсудных нікога няма, бо падазроныя да гэтага часу на волі, а прысуд быў вынесены завочна.

Усім тром вінаватым было прызначана пажыццёвае зняволенне.

17 ліпеня 2014 года ў небе над Данецкай вобласцю быў збіты самалёт Boeing-777 авіякампаніі Malaysia Airlines. У гэты час ён выконваў рэйс МН17 Амстэрдам (Нідэрланды) – Куала-Лумпур (Малайзія). Усе пасажыры і персанал – усяго 298 чалавек, якія знаходзіліся на борце, загінулі.

img2.eadaily.com

Фота: Piroschka Van De Wouw / Reuters

 

Мікалаеў: здраднік арыштаваны на нарадзе ў мэра. Асуджана чарговая калабарантка

Навіна ад

У Мікалаеве Служба Бяспекі Украіны арыштавала здрадніка, расійскага шпіёна публічна, каб усе яго бачылі. 

Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.

21 кастрычніка падчас сустрэчы з мэрам Мікалаева быў затрыманы расійскі агент – кіраўнік камунальнага прадпрыемства «Мікалаеўская рытуальная служба».

Чыноўнік перадаваў акупантам персанальныя дадзеныя вайскоўцаў Узброеных Сіл Украіны і інфармаваў расійцаў аб працы аб’ектаў крытычнай інфраструктуры ў Мікалаеве.

Акрамя таго, здраднік збіраў разведдадзеныя аб размяшчэнні і маршрутах перамяшчэння падраздзяленняў узброеных сіл на тэрыторыі Мікалаеўскай вобласці, а таксама распавядаў ворагу аб сітуацыі з інфраструктурай Мікалаева. 

Таксама ў яго задачы ўваходзіла арганізаваць магутную агентурную прарасійскую сетку на тэрыторыі Мікалаеўшчыны.

Пазней пра падрабязнасці затрымання распавёў мэр Мікалаева Аляксандр Сянкевіч. Аказваецца, СБУ папярэдзіла яго аб маючым адбыцца затрыманні і было вырашана публічна арыштаваць, каб усе бачылі здрадніка.

У гэты ж дзень у Мікалаеве абралі меру стрымання 49-гадовай жанчыне, якая падазраецца ў распаўсюджванні інфармацыі аб дыслакацыі падраздзяленняў ВСУ і апраўдванні ўзброенай агрэсіі Расіі, пра што паведамілі ў Цэнтральным раённым судзе горада.

Жанчына далучылася да некалькіх тэлеграм-каналаў, выкарыстоўваючы псеўданім, які павінен быў схаваць яе пол і ўзрост. Пры гэтым яна дакладна ведала, што названыя каналы выкарыстоўваюцца спецслужбамі Расіі для збору інфармацыі аб размяшчэнні ўзброеных фарміраванняў Украіны.

У далейшым яна неаднаразова публікавала там інфармацыю аб перамяшчэнні падраздзяленняў ВСУ ў Мікалаеве і Мікалаеўскай вобласці, у тым ліку, далучаючы да паведамленняў адпаведныя фотаматэрыялы. Акрамя таго, падчас зносін у названых каналах, яна апраўдвала ўзброеную агрэсію Расіі, выказвала надзею на хуткую акупацыю Мікалаева.

Пабрацімства Мікалаева з Магілёвам было замацаванае дамовай у 2009 годзе.

31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.

Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.

Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян.

Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».

фота: lenta.ua

“Магілёўхлебапрадукт” можа стаць банкрутам

Навіна ад

Заяву пра неплацёжаздольнасць прадпрыемства падаў аблвыканкам.

Эканамічны суд Магілёўскай вобласці адкрыў конкурсную вытворчасць адносна ААТ “Магілёўхлебапрадукт” – паведамляе сайт Вярхоўнага суда Беларусі.

Агульная сума крэдыторскай запазычанасці прадпрыемства складае 37 373 056,87 рублёў. Пры гэтым кошт маёмасці даўжніка недастатковы для задавальнення патрабаванняў крэдытораў. Так, актывы даўжніка па стане на 1 жніўня 2022 года складаюць 24 056 тысяч рублёў.

Акцыянерамі 15 жніўня 2022 года прынята рашэнне аб немэтазгоднасці дасудовага аздараўлення і аб падачы ў эканамічны суд заявы аб эканамічнай неплацежаздольнасці даўжніка. Асноўнымі акцыянерамі “Магілёўхлебапрадукта” з’яўляюцца Магілёўскі абласны выканаўчы камітэт з доляй у 99,26% і Слаўгарадскі раённы выканаўчы камітэт з доляй 0,73%.

Наступнае судовае паседжанне па справе прызначанае на 7 лютага 2023 года, на якім плануецца прыняць рашэнне аб санацыі альбо ліквідацыі прадпрыемства. Санацыя дазволіць прадпрыемству пазбегчы банкруцтва.

“Магілёўхлебапрадукт” – буйное беларускае прадпрыемства, якое больш за 60 гадоў займаецца выпускам прадукцыі птушкагадоўлі, мяса і мясных вырабаў, жытняй і пшанічнай мукі оптам. Гэта шматпрофільная арганізацыя, у складзе якой знаходзіцца некалькі прадпрыемстваў, у тым ліку – “Магілёўская птушкафабрыка”.

Настаўніцу гісторыі з Бабруйску звольнілі за салідарнасць з Украінай

Навіна ад

З Ларысай Секержыцкай адміністрацыя школы не падоўжыла кантракт пасля таго, як настаўніцу асудзілі за жоўта-блакітную стужку ў прычосцы. У ёй міліцыя і суд угледзелі прыкметы «правядзення несанкцыянаванага масавага мерапрыемства». 

Секержыцкую затрымалі на працоўным месцы, а міліцыю выклікала ў школу яе адміністрацыя.

У сакавіку Ларысу Секержыцкую за салідарнасць з Украінай аштрафавалі на 70 базавых велічыняў (2240 рублёў). Бабруйскі суд прызнаў настаўніцу сярэдняй школы № 27 вінаватай у парушэнні парадку арганізацыі або правядзення масавага мерапрыемства. 

Паводле судовага вердыкту яна арганізавала пікетаванне для «прыцягнення ўвагі грамадзян шляхам публічнага дэманстравання стужачак сіняга і жоўтага колераў, якія сімвалізуюць нацыянальны сцяг Украіны».

Напярэдадні навучальнага году з педагогам, які мае 17-гадовы працоўны стаж, не працягнулі кантракту, бо яна мае адміністрацыйнае спагнанне.

«Увесну казалі, што працягваюць кантракт, бо па закону, калі ёсць дзеці да пяці год, нельга пазбаўляць магчымасці ўтрымліваць сям’ю. Але ў другой палове лета, я так разумею, пачалі дзейнічаць законы іншыя. Вынік – я шукаю працу», напісала Ларыса Секержыцкая ў Фэйсбуку.

Яна адзначае, што мае спецыялізацыю: гісторыя Беларусі, сусветная гісторыя і грамадазнаўства.

«Заняткі магу праводзіць онлайн на беларускай і рускай мовах, дапамагу падцягнуць веды, больш грунтоўна падрыхтавацца да экзамену, ЦТ. Буду ўдзячна за рэпост. Веру ў моц пяці поціскаў рукі. Пішыце ў прыват, калі ёсць прапановы» – адзначыла Секержыцкая са спадзевам, што ёсць ахвотныя скарыстацца з яе настаўніцкага досведу.

На Ларысу Секержыцкую за стужку ў прычосцы паскардзілася яе каляжанка. Настаўніца матэматыкі і кіраўніца вайскова-патрыятычнай класы Наталля Сіманенка разам з настаўніцай гісторыі Святланай Хутаранскай сталі патрабаваць, каб яна зняла стужкі. Секержыцкая адмаўлялася тое рабіць. Адміністрацыя навучальнай установы выклікала міліцыю і настаўніцу забралі ў аддзел, дзе склалі пратакол адміністрацыйнага правапарушэння.

фота: facebook.com