Чытачы mogilev.media дзеляцца доўгачаканай майскай радасцю – зацвілі каштаны.
Вуліца Каштанавая знаходзіцца на самым паўночным ускрайку горада.
Фота: чытачы mogilev.media
На вуліцы Каштанавай у Магілёве зацвілі каштаны – фота
Category: Раёны
Узровень ракі Сож стаў небяспечна нізкім каля Крычава і Слаўгарада
Узровень вады на Сожы каля Крычава і Слаўгарада апускаецца да небяспечна нізкай адзнакі, паведаміліў у Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
У найбліжэйшыя дні на рацэ ўзроўні вады апусцяцца ніжэй за адзнакі, пры якіх узнікаюць цяжкасці ў рабоце рачнога транспарту. У сувязі з гэтым Белгідрамет аб’явіў штармавое гідралагічнае папярэджанне – паведамляе БелТА.
Фота: “Магілёўскі рыбалоў”
Бабруйчанін заблукаў у лесе з разраджаным тэлефонам, яго дзве гадзіны шукалі ратавальнікі
26-гадовы жыхар Бабруйска заблукаў вечарам 22 мая ў лясным масіве недалёка ад вёскі Дубоўка Бабруйскага раёна. Ён накіроўваўся ў пасёлак Туголіца. Сігнал трывогі малады чалавек падаў у 19:20 – распавялі ў МНС. Пошукі мужчыны ўскладніліся тым, што мабільны тэлефон у яго практычна сеў. Задзейнічаўшы 6 адзінак тэхнікі і 15 чалавек, ратавальнікі знайшлі бабруйчаніна праз дзве гадзіны пошукаў.
Фота: прэс-служба МНС
Пад Магілёвам знайшлі падпольны мясакамбінат
Жыхар Магілёўскага раёна абсталяваў у сваім прыватным доме падпольны мясакамбінат – выявілі супрацоўнікі арганізацыі па барацьбе з эканамічнымі злачынствамі. 38-гадовы мужчына набываў мяса ў Магілёўскай і Віцебскай абласцях і ў сваім доме займаўся яго раздзелкай, замарозкай, прыгатаваннем кансерваў. Пры гэтым анітарна-эпідэміялагічным нормам яго “цэх” не адпавядаў. Сваю прадукцыю жыхар Магілёўскага раёна рэалізоўваў у Беларусі і Расіі.
Праваахоўнікі выявілі ў доме тэхналагічнае і халадзільнае абсталяванне, а таксама фасаванае ў блокі па 12-20 кг мяса ялавічыны агульнай вагой больш за 16,5 тон і звыш тысячы слоікаў тушонкі. Ветэрынарных дакументаў на прадукцыю не было.
Фота: прэс-служба УУС
Тры горада Магілёўшчыны прызнаны лепшымі ў краіне па добраўпарадкаванні
Савет міністраў Беларусі зацвердзіў пастанову аб выніках агляда-конкурса паміж гарадамі Беларусі па ўзроўні добраўпарадкавання і санітарным стане. У першай катэгорыі, куды адносяцца абласныя цэнтры, перамог Брэст. У другой катэгорыі, сярод гарадоў з насельніцтвам звыш 50 000 чалавек, лепшымі сталі Мазыр і Бабруйск.
У чацвёртай катэгорыі, сярод гарадоў да 10 000 насельніцтва, у ліку лепшых апынуліся Бялынічы і Чэрыкаў.
Фота: bobrlife.by
27 мая Слаўгарад адзначае Дзень горада, у праграму свята ўключылі нават футбольны матч
Урачыстасці з нагоды Дня горада пройдуць у Слаўгарадзе ў суботу 27 мая. Вядомы з 1136 года як Прапойск, горад будзе адзначаць сваё 887-годдзе. У праграме святочных мерапрыемстваў – тэматычныя пляцоўкі, канцэрт, салют і нават футбольны матч другой лігі Чэмпіяната Беларусі паміж камандамі “Слаўгарад” і “Клімавічы”. Поўную праграму святкавання можна знайсці па гэтай спасылцы.
Фота: “Прысожскі край”
У Бабруйску пройдзе гастранамічны “СмакFEST”
З 29 мая па 12 чэрвеня у Бабруйску пройдзе гастранамічны фестываль “СмакFEST”, у якім прымуць удзел 11 кавярняў горада. Удзельнікі фестывалю “СмакFEST” прапануюць сэты са страў, прысвечаныя тэматыцы “Кіно” з фіксаваным коштам 29,90 рубля.
Вось тут можна знайсці ўсіх удзельнікаў фестываля з адрасамі і тэлефонамі.
Фота: bobruisk.by
Закладваючы новую паліклініку ў Крычаве, чыноўнікі кідалі ў фундамент манеты
На месцы будавання новай паліклінікі адбыўся магічны рытуал з удзелам кіраўніцтва Крычаўскага раёна і праваслаўнай царквы, які мясцовая прэса акрэсліла як “старадаўні абрад”.
Дзейства ачолілі прадстаўнікі мясцовай праваслаўнай царквы і крычаўскія чыноўнікі. Яно адбылася на месцы будаўніцтва новай паліклінікі, побач з тэрыторыяй цэнтральнай раённнай бальніцы.
Мерапрыемства пачалося з выступлення старшыні райвыканкама Седукова, пасля перацякло ў малебны і акрапленні вадой месца будучай паліклінікі настаяцелям Свята-Уваскрасенскай царквы пратаіерэям Сяргеем Карасцялёвым.
А потым было кіданне манет у фундамент будучай здраўніцы. Гэты “старадаўні абрад”, як апісвае раённая газета “Крычаўскае жыццё”, адбыўся нібыта дзеля спрыяння будаўніцтву паліклінікі.
Яшчэ прадстаўнік Свята-Уваскрасенскай царквы Карасцялёў падараваў дырэктару раённай бальніцы абраз для палікнілікі. Хацелася б, аднак, спадзявацца, што ў новай ўстанове аховы здароўя будуць лекаваць таксама і з дапамогай сучасных дасягненняў медыцынскай навукі.
Фота: “Крычаўскае жыццё”.
Дата адкрыцця Жыліцкага палаца не вызначана – шмат дапрацовак. Паглядзіце, як ідзе рэканструкцыя
Жыліцкі палац, “жамчужына Магілёўшчыны”, палац Булгакаў – помнік архітэктуры позняга класіцызму, гісторыка-культурная каштоўнасць Беларусі ў Кіраўскім раёне працягвае падрыхтоўку да святкавання свайго 200-годдзя. Актыўная фаза рэканструкцыі ўжо завершана – паведамлялі mogilev.media нядаўна. Але дата адкрыцця пакуль невядомая.
Палац пачаў будавацца ў 1823 годзе і быў пабудаваны да 1825. Пазней – даробліваліся асобныя элементы. Атрымліваецца, што ў гэтым годзе – 200 год з пачатку будаўніцтва. Але кіраўніцтва музейнага комплекса дакладна не ведае, на якую дату будзе прызначана ўрачыстае адкрыццё палаца – у гэтым, а можа і ў наступным годзе, але ва ўсялякім разе не пазней за 2025.
Прычына – шмат дапрацовак, ёсць планы па ўвядзенню ў строй аранжэрэі, аднаўленню капліцы, працягу напаўнення залаў мэбляй, рэканструкцыі парка і гаспадарчых пабудоў.
Галоўны фасад.
Парадны ўваход
Герб Булгакаў “Сыракомля”.
Адна са 100 заляў
Кесонная столь адной з заляў. Убранне, дэкор не паўтараецца ад залі да залі.
Фрагмент падлогі. У кожнай зале свой малюнак падлогі.
Прыклад мэбліроўкі заляў.
Рэстаўратары пакінулі фрагменты дэкору да рэстаўрацы, каб параўнаць з тым, што атрымалася ў выніку вяртання палаца да жыцця.
Уваходы ў лядоўню і парк.
Зараз залі комплексу паволі напаўняюцца антыкварнай мэбляй, сучаснымі копіямі мэблі XIX стагоддзя, карцінамі. Ідзе будаўніцтва аранжэрэі.
Mogilev.media на працягу апошніх двух гадоў адсочвае ход рэканструкцыі палаца.
Альтанка.
Даведка. Архітэктурны комплекс дзівіць прыгажосцю і маштабамі: будынак рознай паверхавасці, з вежай, складаецца са 100 памяшканняў агульнай плошчай 4 000 кв. м. Побач парк плошчай каля 20 гектар, рака.
Жылічы – рэзідэнцыя заможнага шляхціца, бабруйскага павятовага маршалка Ігната Булгака (1798-1848) на рацэ Добасна. Пабудаваны палац па праекце архітэктара Караля Падчашынскага.
Да галоўнага П-падобнага корпуса ў 1864-1876 гадах прыбудавалі, пры ўладальніку Эдгары Булгаку, доўгае двухпавярховае крыло з палацавай царквой і дадатковымі жылымі памяшканнямі. Такое архітэктурнае рашэнне ўтварыла напаўадкрыты ўнутраны двор. Заходняя частка палаца была дабудавана ў 1914 годзе.
Пасля рэвалюцыі ў палацы размяшчаліся дзіцячы дом, заатэхнічны тэхнікум. У час Вялікай Айчыннай вайны месціўся нямецкі шпіталь.
Пасля вайны ў палацы працавала Бабруйская агранамічная школа.
Першыя спробы рэканструкцыі палаца зроблены ў 1973 годзе архітэктарам Я. Куртам.
У наш час у палацы размешчаны краязнаўчы музей і музычная школа.
Фота: mogilev.media
За сем карасікаў і рака рыбак у Горацкім раёне атрымаў штраф у 5 600 рублёў
Мсціслаўская міжраённая прыродаахоўная інспекцыя затрамала каля аграгарадка Леніно Горацкага раёна рыбака на лодцы і з двума сеткамі. Усяго мужчына вылавіў сем карасёў і аднаго рака, прычым лоўля ажыццяўлялася не толькі забароненымі сродкамі, але і ў перыяд нераста. Інспектары налічылі рыбаку штраф у 151,5 базавую велічыню, альбо 5 605 рублёў штрафа – піша “Горацкі веснік”.
Фота ілюстрацыйнае