Магілёўскія фігуранты “справы артапедаў-траўматолагаў” – былы загадчык артапедычнага аддзялення Магілёўскай бальніцы №1 (Лаўсанаўскай) Алег Сарнацкі і былы загадчык траўматалагічнага аддзялення Магілёўскай абласной бальніцы Алег Абелевіч былі арыштаваныя разам з 35-цю іншымі медыкамі-траўматолагамі па ўсёй краіне ў 2022 годзе. Пазней яны былі вызвалены з-пад варты і накіраваны працаваць па спецыяльнасці шараговымі медработнікамі – паведамлялі mogilev.media.
Так, Алег Абелевіч быў накіраваны працаваць шараговым траўматолагам у Магілёўскую гарадскую бальніцу хуткай медыцынскай дапамогі, а Алег Сарнацкі – на аналагічную пасаду ў Магілёўскую абласную бальніцу.
27 верасня Генеральная пракуратура абвясціла пра прысуд аднаму з іх. Паводле інфармацыі беларускіх СМІ, размова ідзе пра Алега Сарнацкага (на фота), хоць імя абвінавачанага ў матэрыялах пракуратуры не ўказваецца.
Паводле пракуратуры, абвінавачаны з 2018 года да сакавіка 2022-га нібыта сістэматычна атрымліваў грашовыя сродкі ад прадстаўнікоў камерцыйных арганізацый, пастаўшчыкоў эндапратэзаў за кожную праведзеную аперацыю па татальным эндапратэзаванні тазасцегнавога або каленнага суставаў з матэрыялаў іх вытворчасці.
За ўвесь час былы загадчык аддзялення нібыта атрымаў узнагароджанне ў памеры 750 даляраў ЗША і звыш 15 тыс. еўра. Паведамляецца, што ў ходзе судовага следства абвінавачаны чыстасардэчна раскаяўся і кампенсаваў у поўным аб’ёме даход, атрыманы незаконным шляхам.
Суд Кастрычніцкага раёна Магілёва вынес абвінаваўчы прысуд, але ў калонію Алега Сарнацкага пакуль не адправяць. Яму прызначана пакаранне ў выглядзе пазбаўлення волі на тэрмін 4 гады з адтэрміноўкай яго выканання на 2 гады са штрафам у памеры 600 базавых велічынь (22,2 тыс. рублёў).
Фота: Адміністрацыя Кастрычніцкага раёна г. Магілёва
Працягваем сачыць за тымі зменамі, якія закранулі месца ўшанавання памяці ахвяр сталінскіх рэпрэсій у Магілёве. Нагадаем, падчас рэканструкцыі праспекта Дзімітрава ў абласным цэнтры, вялікі памятны крыж каля мясакамбіната быў прыбраны. Да таго месца, дзе ён стаяў, праклалі дарожку з тратуарнай пліткі. На месцы самаго крыжа паявілася аснова для наступнай канструкцыі. Паводле інфармацыі mogilev.media, тут будзе ўсталяваны новы крыж.
Вялікі шасціканцовы крыж зараз так і ляжыць на зямлі побач з месцам ушанавання памяці ахвяр.
Верагодна, новы крыж будзе ўсталяваны ў самы бліжэйшы час – рэканструкцыя праспекта Дзімітрава павінна завяршыцца на гэтым тыдні. Афіцыйнай інфармацыі наконт работ на месцы ўшанавання памяці ахвяр пакуль не было.
У аграгарадку Семукачы Магілёўскага раёна адбылося адкрыццё архітэктурна-этнаграфічнага комплексу “Мая Бацькаўшчына”. Тут была прадстаўлена сапраўдная беларуская сядзіба, з дэталёвым аднаўленнем побыту вясковых жыхароў 1940-х і 1950-х гадоў.
Хату прывезлі з вёскі Смалярня і паставілі ў самым цэнтры Семукач. Унутранае начынне сабралі самі жыхары аграгарадка – паведамляе “Прыдняпроўская ніва”.
Печ, ложак, выкананы майстрамі мінулага стагоддзя. Стогадовы куфар на драўляных колцах – з Брэсцкай вобласці. Яшчэ ў інтэр’еры – фіранкі з мудрагелістым узорам, студня-журавель, радыёпрымач, абрус, жорны, пернік для мыцця ў рацэ, газа, калаўрот, драўляны плуг.
Мілата экспазіцыі крыху губляецца, калі прыглядаешся да фотаздымку сямейнай пары, якія нібта вядуць тут сваю гаспадарку. Каля бацькоўскага ложка – люлька з немаўляткай, таму варта было б чакаць зусім маладых бацькоў на галоўным (звычайна – шлюбным) фотаздымку ў хаце.
Больш за дзясятак магілёўскіх цырульняў зробяць зніжкі для пенсіянераў на дзень пажылога чалавека, што адзначаецца 1 кастрычніка, і ў бліжэйшыя даты. Так, ужо з 29 верасня простая стрыжка для пенсіянераў у цырульні ў гасцініцы “Турыст” будзе каштаваць 5 рублёў. З 1 па 3 кастрычніка цырулні на вуліцы Крывуліна і Каштанавай прапануюць зніжкі ад 10% да 50% за мадэльную стрыжку і на ўсе віды паслуг. Поўны спіс прапановаў па акцыі можна знайсці тут.
Магілёўская арганізацыя пастаўляла ва ўстановы адукацыі і аховы здароўя садавіну і гародніну па завышаных цэнах – заяўляюць у Камітэце дзяржкантроля. У асобных выпадках аптовая надбаўка перавышала дапушчальную ў 8 разоў.
У прыватнасці, пры пастаўцы цыбулі магілёўскаму цэнтру па забеспячэнні дзейнасці бюджэтных арганізацый прымянялася аптовая надбаўка 250 працэнтаў. Пры пастаўцы бульбы адной з раённых бальніц – 280 працэнтаў пры дазволеным узроўні не больш як 30 працэнтаў. Нанесены дзяржаве ўрон склаў больш за 85 тыс. рублёў.
Карыстальнікі соцсетак заўважылі прыкрыя памылкі на магілёўскіх дошках гонару. “Новая пампезная Дошка гонару ў цэнтры Магілёва. – піша ў сваім інстаграме вядомы гарадскі блогер з нікам prasalovich – А ведаеце, чаму “зменш 500 чалавек”? Таму што на суседняй шыльдзе – “звыш 500 чалавек”!”
“А гэты выпадак я нават памылкай не наважваюся назваць – працягвае назіральнік – А раптам гэта праява лакальнай гендэрнай рэвалюцыі? Памятаеце сацыяльную рэкламу “Человек изобрела колесо”? Дык, можа, таму і ў Мугілеві “суб’ект” – “лепшая”?”
Mogilev.media прыглядзеліся да магілёўскіх Дошак гонару і знайшлі не толькі пацвярджэнне прыведзеным памылкам, але і яшчэ пару. На той жа гарадской Дошцы спартсмен, у гонар якога названая школа Алімпійскага рэзерву “Багіма” Алег Рыгоравіч Мішчанка пададзены з ініцыяламі – А.Г. Мішчанка.
На асноўнай Дошцы гонару Магілёўшчыны, якая размяшчаецца за аблвыканкамам, беларусізацыі не паддалося ўжо імя дырэктара прадпрыемства “БелЭмса” Тэйіпа Учара.
41-гадовы мужчына з сям’ёй адпачываў у сяброў у Магілёве. Падчас застолля мужчыну абуяла злосць, ён пачаў кідацца на людзей і біць жонку. Ад пабачанага яго 13-гадовая дачка расплакалася. Бацька спчатку пяць хвілін спрабаваў яе суцешыць, але потым, “спаймаўшы белку”, пачаў душыць – перадае звязаны з сілавікамі Тэлеграм-канал. Супраць яго ўзбуджана крымінальная справа за спробу забойства.
Туркменскае выданне turkmen.news сцвярджае, што студэнты з Туркменістана ўцягнутыя ў пераправу выхадцаў з Сярэдняй Азіі ў краіны Еўрасаюзу і мігранцкі крызіс на мяжы. Адзін з затрыманых і дэпартаваных туркменаў вучыўся ў сельгасакадэміі ў Горках.
Дзесяткі маладых хлопцаў і дзяўчат з Туркменістана за грошы незаконна пераводзяць у Польшчу жыхароў краін Блізкага Усходу – піша выданне. Студэнтаў ловяць беларускія памежнікі, іх штрафуюць і дэпартуюць на радзіму, а некаторыя атрымліваюць турэмныя тэрміны. Сітуацыя аказалася настолькі сур’ёзнай, што намеснік міністра адукацыі Беларусі разаслаў у ВНУ ліст з патрабаваннем сачыць за навучэнцамі з Туркменістана. Копія ліста патрапіла ў распараджэнне turkmen.news.
Фота: turkmen.news
Дакумент, падпісаны намеснікам міністра Аляксандрам Бахановічам, паступіў у беларускія ВНУ ў верасні. У ім гаворыцца аб шматлікіх выпадках затрымання студэнтаў і выпускнікоў з Туркменістана ў межах памежнай паласы, у тым ліку ў той час, калі ў ВНУ праходзяць заняткі. Бахановіч патрабуе, каб кіраўніцтва ВНУ не дапускала пропускі заняткаў і ўзмацніла прафілактычную працу з замежнымі студэнтамі.
Паводле інфармацыі крыніцы turkmen.news у кіраўніцтве адной з ВНУ Беларусі, туркменскія студэнты ўцягнуты ў дзейнасць міжнароднай мафіі. Праз Беларусь у Польшчу, а потым у заходнюю Еўропу незаконна трапляюць грамадзяне Ірака, Лівіі, Йемена, Егіпта, Сірыі, Афганістана і іншых краін. Іх праваднікамі праз мяжу і з’яўляюцца туркменскія студэнты.
Яны на машыне давозяць групы замежнікаў да мяжы з Польшчай. Гэтая краіна Еўразвяза ў апошні час моцна ўмацавала сваю мяжу, пабудаваўшы сцяну, аднак кантрабандысты робяць пад ёй падкопы. Туркмены пераводзяць нелегальных мігрантаў на польскі бок і саджаюць іх у машыну саўдзельнікаў. Потым яны фатаграфуюць сваіх падапечных у доказ выкананай працы, вяртаюцца ў Мінск ці Брэст і атрымліваюць 3-4 тысячы долараў. Грошы за працу ім выплачвае нейкі грамадзянін, этнічны курд – сцвярджае выданне.
«Туркменскія студэнты аказваюцца ўцягнутымі ў гэта не ад безвыходнасці – падкрэслівае крыніца turkmen.news – Працы ў Беларусі шмат, яны могуць уладкавацца ў кафэ або таксістамі. Але іх прываблівае менавіта магчымасць зарабіць хутка і адразу шмат. Некаторыя студэнты гуляюць у азартныя гульні і маюць буйныя даўгі».
У звароце Бахановіча прыводзяцца прыклады затрыманняў і крымінальных спраў. У сакавіку 2023 года пры незаконным пераводзе праз мяжу васьмярых грамадзян Індыі быў затрыманы грамадзянін Туркменістана, студэнт чацвёртага курса Міжнароднага дзяржаўнага экалагічнага інстытута (МГЭІ) Наўруз Рэджэпаў. У ліпені яго прыгаварылі да трох гадоў пазбаўлення волі. У маі пры арганізацыі нелегальнай міграцыі дзесяцёх егіпцян былі злоўлены яшчэ двое студэнтаў той жа ВНУ – Керым Аламаў і Сапагельды Аладжанаў. У жніўні ім далі па 4,5 гады пазбаўлення волі.
Таксама ў звароце намесніка міністра адукацыі пералічваюцца грамадзяне Туркменістана, якіх пасля затрымання на мяжы аштрафавалі і дэпартавалі ў адміністрацыйным парадку. Сярод іх – студэнт Беларускай сельскагаспадарчай акадэміі ў Горках Палван Анамаў. Адзначым, што ў спісе затрыманых і дэпартаваных студэнтаў адсутнічаюць студэнты ці выпускнікі Беларуска-Расійскага універсітэта, дзе навучаюцца вялікія групы туркмен.
Turkmen.news падкрэслівае, што большасць туркменскіх студэнтаў усё ж працуюць у Беларусі і іншых краінах больш-менш легальна. Яны не могуць не працаваць, бо ўлады Туркменістана рэзка абмяжоўваюць аб’ём грошай, якія бацькі маюць права канвертаваць для адпраўкі дзецям за мяжу. Часта маладыя людзі і дзяўчаты вымушаны згаджацца на брудную і цяжкую працу.
Пракуратура горада Магілёва накіравала ў суд крымінальную справу ў дачыненні да медыцынскай сястры адной з устаноў аховы здароўя горада. Ёй інкрымінаваны крадзеж асабліва небяспечных наркатычных сродкаў без мэты збыту.
Згодна з матэрыяламі справы абвінавачаная стварала лішкі медпрэпарата «Марфін гідрахларыд». Затым яна адлюстравала выкарыстанне гэтага прэпарата ў медыцынскай дакументацыі, але не ўводзіла яго пацыентам, замяніўшы на кафеін-бензаат натрыю. Звычайна марфін коляць хворым на анкалогію з моцнымі болямі.
Усяго абвінавачаная выкрала шляхам прысваення не менш як 50 ампул, якія ўтрымлівалі ў сваім складзе асабліва небяспечны наркатычны сродак, дазволены да кантраляванага абароту – марфін.
Акрамя таго, медыцынская сястра захоўвала пры сабе таблетку з небяспечным псіхатропным рэчывам – трамадолам.
Падчас папярэдняга следства жанчына не патлумачыла прычыны свайго ўчынку, ад дачы паказанняў адмовілася.
За інфармацыяй вакол продажу памяшканняў магілёўскага завода “Строммашына”, пра якую шмат пісалі рэгіянальныя СМІ, прыхаваўся адзін малазаўважны факт. Існуе верагоднасць, што рэканструкцыя і перафарматаванне памяшканняў завода-банкрута закране таксама лёс папулярных магілёўскіх барахолак – Быхаўскага і Мінскага рынкаў.
Так, у вялікім матэрыяле “Магілёўскіх ведамасцяў” пра далейшы лёс плошчаў “Строммашыны” гаворыцца паміж іншага наступнае:
“Як растлумачыў начальнік упраўлення архітэктуры і горадабудаўніцтва Магілёўскага гарвыканкама – галоўны архітэктар горада Дзмітрый Бабкуноў – будынак ліцейнага цэха знясуць, астатнія карпусы цэхаў і адміністрацыйных будынкаў прадпрыемства будуць выкарыстоўвацца для стварэння поліфункцыянальнай прасторы з аб’ектамі гандлю, абслугоўвання, культурна-забаўляльнага прызначэння.
З’явяцца магчымасці і для камфортнага пераносу Мінскага і Быхаўскага рынкаў (выдзелена намі – М.М.) з уладкаваннем вялікай аўтастаянкі. Ад падобнай рэканструкцыі выйграюць усе – і гараджане, і прадпрымальнікі. Але яна будзе весціся па спецыяльным праекце.”
Што Мінскі, што Быхаўскі рынкі – даўні галаўны боль, калі не мазоль для магілёўскага чынавенства. Хаатычнасць барахолкі цяжка ўкладваецца ў іх светаўспрыняцце. Ужо дзесяцігоддзямі можна назіраць, як спарадычна міліцыянты ганяюць бабулек з картонкамі каля Мінскага рынка. Альбо як іх спрабуюць выціснуць на вечна пустыя прылаўкі, абсталяваныя за цэнтральным уваходам, далей ад вуліцы Першамайскай.
Магчыма, і найбольш верагодна, што цэнтральнай задачай у плане пераноса Мінскага і Быхаўскага рынкаў з’яўляецца паляпшэнне гандлёвых умоваў для сур’ёзных прадпрымальнікаў і іх пакупнікоў. Аднак разам з гэтым могуць быць прынятыя і чарговыя кардынальныя меры, якія могуць пакінуць горад без гэтых унікальных рынкаў з іх разняволенай атмасферай дробнага вулічнага гандлю. А хацелася б нагадаць, што падобныя “блашыныя” кірмашы ва ўсім свеце – цэнтр турыстычнага прыцягнення, люднае месца, якое прыцягвае натоўпы цікаўных.
