Category: У Свеце

Расія абвясціла пра перамір’е на Вялікдзень – рэакцыі

Навіна ад

Пачынаючы з 18.00 сённяшняга дня і да 00.00 21 красавіка (з нядзелі на панядзелак). Пра гэта заявіў Уладзімір Пуцін падчас сустрэчы ў Крамлі з кіраўніком Генштаба Расійскай Федэрацыі Валерыем Герасімавым. У заяве прэс-службы Крамля гаворыцца пра загад спыніць усе баявыя дзеянні на час святкавання Вялікдня.

У адказ на заяву Уладзіміра Пуціна прэзідэнт Украіны Уладзімір Зяленскі заявіў, што гаворка ідзе пра “чарговую спробу Пуціна пагуляцца з чалавечымі жыццямі”.
Свой аналіз сітуацыі прапанаваў вядомы украінскі журналіст Юрый Бутусаў. Прыводзім яго меркаванне цалкам:

“1. Аднабаковая заява, якая не спыняе вайну, але мае на мэце згуляць з Трампам, дэманструючы нібыта мірную ініцыятыву, каб паказаць, што заявы Трампа не былі марнымі. Пуціну важна падтрымліваць адносіны з Трампам, бо ён выкарыстоўвае іх, каб раскалоць агульную пазіцыю краін NATO па Украіне.

2. Гэта не крок да міру, таму што спыненне агню было абвешчана Пуціным самастойна, а не ў выніку мірных пагадненняў. Ні пра якія сістэмы маніторынгу і кантролю за захаваннем рэжыму спынення агню не гаворыцца. А такія «перамір’і», як вучыць вопыт вайны на Данбасе, заўсёды ператвараюцца ў перастрэлку. І Пуцін, як заўсёды, абвінаваціць у парушэнні Украіну.

3. Адначасова гэта сведчыць аб слабасці пазіцый Расіі ў вайне; Пуцін хоча аслабіць падтрымку Украіны, таму што разумее, што не можа дабіцца перамогі на полі бою. І таму, каб працягваць вайну, ён спрабуе скараціць падтрымку Украіны ЗША.

4. Пуцін ухіляўся ад заяў аб рэальных кроках па спыненні вайны – правядзенні афіцыйных перамоваў, дамоўленасці аб спыненні агню.”

Фота: t.me/official24ombr

Верагоднасць 99,7% – навукоўцы знайшлі прыкметы пазазямнога жыцця

Навіна ад

Навукоўцы Кембрыджскага ўніверсітэта знайшлі “самыя важкія доказы” існавання жыцця на далёкай планеце за ўсю гісторыю назіранняў – піша ВВС. 

У атмасферы планеты K2-18b, што знаходзіцца ў 120 светлавых гадах ад нас, каманда даследчыкаў лабараторыі Інстытута астраноміі Кембрыджскага ўніверсітэта на чале з прафесарам Ніку Мадхусудханам выявіла сляды злучэнняў серы, якія ўтвараюцца на Зямлі толькі ў біялагічных працэсах. Даследчыкі патлумачылі, аднак, што назіранняў, зробленых да гэтага часу, недастаткова, каб канчаткова заявіць пра адкрыццё пазазямнога жыцця.

Для гэтага даследчыкі павінны быць на 99,99999% упэўнены, што іх вынікі правільныя, а не выпадковасць. На навуковым жаргоне гэта называецца як “вынік пяці сігм”.

Вынікі назіранняў за планетай K2-18b складаюць толькі тры сігмы, то бок – 99,7%. Што гучыць шмат, але гэтага ўсё роўна недастаткова, каб пераканаць навуковую супольнасць.

пазазямное жыццё

Для назірання за K2-18b навукоўцы выкарыстоўвалі касмічны тэлескоп Джэймса Уэба (JWST). Калі планета праходзіла перад сваёй бацькоўскай зоркай, яны глядзелі на асветлены спектр яе атмасферы. Прыбор сярэдняга інфрачырвонага дыяпазону MIRI паказаў магчымую прысутнасць дыметыласульфіду (DMS) або дыметылдысульфіду (DMDS) – злучэнняў, якія на Зямлі выпрацоўваюцца толькі марскім фітапланктонам і бактэрыямі.

Прычым у атмасферы K2-18b канцэнтрацыя гэтых злучэнняў у тысячы разоў большая, чым на Зямлі. Гэта азначае, што калі такія газы насамрэч выпрацоўваюцца толькі жывымі арганізмамі, то на гэтай планеце не проста ёсць жыццё – а яна проста кішыць жыццём.

Але нават калі каманда Кембрыджа атрымае вынік пяці сігм, гэта не будзе канчатковым доказам таго, што жыццё існуе на планеце, паводле прафесара Кэтрын Хейманс з Эдынбургскага ўніверсітэта і Каралеўскага астранома Шатландыі, якая не належыць ад даследчай групы.

– Нават з такой упэўненасцю ўсё яшчэ застаецца пытанне аб паходжанні гэтага газу. – сказала яна – На Зямлі ён выпрацоўваецца мікраарганізмамі ў акіяне, але нават з дасканалымі дадзенымі мы не можам з упэўненасцю сказаць, што гэта біялагічнае паходжанне ў іншапланетным свеце, таму што ў Сусвеце адбываецца мноства дзіўных рэчаў, і мы не ведаем, якая іншая геалагічная актыўнасць можа адбывацца на гэтай планеце.

Выява ілюстрацыйная, з адкрытых крыніц

Першыя ў гісторыі гонкі сперматазоідаў пройдуць у Каліфорніі

Навіна ад

Арганізатары тлумачаць мерапрыемства не столькі хайпам, як хваляваннем з-за праблем мужчынскай фертыльнасці. Але і хайп абяцаюць таксама.

25 красавіка 2025 года ў Лос-Анджэлесе адбудзецца незвычайнае мерапрыемства – першыя ў свеце гонкі сперматазоідаў, арганізаваныя стартапам з Каліфорніі. Гэта падзея спалучае ў сабе навуковыя даследаванні, забаўляльны аспект і інавацыйныя біятэхналогіі.

Як будуць праходзіць гонкі?

Удзельнікі – сперматазоіды, сабраныя ад добраахвотных донараў, будуць спаборнічаць у спецыяльна распрацаваных мікралабірынтах, якія імітуюць умовы жаночага рэпрадуктыўнага тракту. Гэта дазволіць навукоўцам вывучыць рухавую актыўнасць і паводзіны сперматазоідаў у розных умовах.

Мэты мерапрыемства

Арганізатары падкрэсліваюць, што асноўная мэта гонкі – навуковае даследаванне. Атрыманыя дадзеныя могуць быць выкарыстаны для паляпшэння метадаў лячэння бясплоднасці і развіцця рэпрадуктыўных тэхналогій. Акрамя таго, мерапрыемства мае на мэце павысіць інфармаванасць грамадства аб праблемах бясплоднасці і магчымасцях сучаснай медыцыны.

Гонкі прыцягнулі ўвагу не толькі навукоўцаў, але і шырокай грамадскасці. Мерапрыемства будзе транслявацца ў прамым эфіры, а гледачы змогуць назіраць за спаборніцтвам у рэальным часе. Арганізатары абяцаюць, што падзея будзе не толькі пазнавальнай, але і забаўляльнай, з каментарыямі і магчымасцю рабіць стаўкі на ананімізаваных “удзельнікаў”.

Перспектывы на будучыню

Калі гонкі пройдуць паспяхова, арганізатары плануюць праводзіць падобныя мерапрыемствы рэгулярна, з рознымі варыяцыямі лабірынтаў і ўмовамі спаборніцтваў. Гэта можа стаць новым напрамкам у папулярызацыі навукі і развіцці біятэхналагічных даследаванняў.

Такім чынам, першыя ў свеце гонкі сперматазоідаў у Каліфорніі абяцаюць стаць не толькі навукова значнай падзеяй, але і яскравым прыкладам таго, як можна сумяшчаць сур’ёзныя даследаванні з забаўляльным фарматам, прыцягваючы ўвагу шырокай аўдыторыі да важных медыцынскіх тэм.

Фота ілюстрацыйнае, з адкрытых крыніц

Расія нанесла ракетны ўдар па Сумах – што вядома

Навіна ад

13 красавіка 2025 года расійскія войскі нанеслі адзін з самых смяротных удараў па ўкраінскім горадзе Сумы за гады вайны. У выніку ракетнага абстрэлу загінулі 32 чалавекі, у тым ліку двое дзяцей, і яшчэ 99 атрымалі раненні, сярод якіх 10 дзяцей.

Ход атакі

Паводле звестак украінскіх уладаў, каля 10:15 раніцы па мясцовым часе расіяне выпусцілі дзве балістычныя ракеты тыпу «Іскандэр-М» па цэнтры Сум. Удар адбыўся ў Вербную нядзелю, калі людзі збіраліся на рэлігійныя службы. 

Пад абстрэл трапілі жылыя дамы, тролейбус, цэнтр правоў чалавека і кангрэс-цэнтр Сумскага дзяржаўнага ўніверсітэта, які часта выкарыстоўваўся для заняткаў з дзецьмі.

Украінскія чыноўнікі сцвярджаюць, што ў атацы былі выкарыстаны касетныя боепрыпасы, што сведчыць пра наўмыснае імкненне нанесці максімальныя страты сярод мірнага насельніцтва.

Рэакцыя ўкраінскіх уладаў

Прэзідэнт Украіны Уладзімір Зяленскі назваў атаку «свядомым тэрорам» і заклікаў міжнародную супольнасць да больш жорсткай рэакцыі на дзеянні Расіі. Ён падкрэсліў, што «размовы ніколі не спынялі балістычныя ракеты і бомбы», і падкрэсліў неабходнасць узмацнення ціску на Маскву.

Міністр замежных спраў Украіны Андрэй Сыбіга ахарактарызаваў атаку як «абсалютнае зло» і звярнуўся да міжнародных партнёраў з просьбай аб узмацненні сістэм супрацьпаветранай абароны.

Міжнародная рэакцыя

Атака выклікала шырокі міжнародны рэзананс. Прэзідэнт Францыі Эмануэль Макрон заклікаў да «моцных мер» для забеспячэння спынення агню. Прадстаўніца Еўрасаюза Кая Калас назвала напад «жахлівым прыкладам эскалацыі Расіі» на фоне гатоўнасці Украіны да безумоўнага спынення агню.

вайна

Кіраўнік гуманітарнай місіі ААН ва Украіне Маттыяс Шмале асудзіў атаку «ў самых моцных выразах» і нагадаў, што міжнароднае гуманітарнае права забараняе напады на мірных жыхароў і грамадзянскую інфраструктуру.

Ваенна-стратэгічны кантэкст

Сумы знаходзяцца ў непасрэднай блізкасці ад расійскай мяжы і маюць стратэгічнае значэнне. У апошнія тыдні расійскія войскі ўзмацнілі паветраную актыўнасць у рэгіёне, у тым ліку пасля таго, як украінскія сілы былі вымушаныя адступіць з пазіцый у суседняй Курскай вобласці. Некаторыя населеныя пункты ў Сумскай вобласці ўжо знаходзяцца пад расійскай акупацыяй.

Атака на Сумы адбылася праз некалькі дзён пасля падобнага ракетнага ўдару па Крывым Рогу, у выніку якога загінулі 20 чалавек. Гэтыя дзеянні выклікаюць трывогу наконт магчымай вясновай наступальнай аперацыі Расіі на фоне застойных мірных перамоваў.

Атака на Сумы 13 красавіка 2025 года стала чарговым сведчаннем таго, што Расія працягвае выкарыстоўваць тактыку наўмыснага тэрарызавання мірнага насельніцтва. Удар па горадзе падчас рэлігійнага свята выклікаў шырокі міжнародны рэзананс і падкрэсліў неабходнасць узмацнення падтрымкі Украіны з боку сусветнай супольнасці.

Фота: Reuters

У Дональда Трампа стралялі на перадвыбарчым мітынгу

Навіна ад

Стралок забіты, яго матывы высвятляюцца. Таксама загінуў адзін з наведвальнікаў мітынга, яшчэ двое цяжка параненыя.

Былы прэзідэнт ЗША Дональд Трамп атрымаў лёгкае раненне – куля прабіла верхнюю частку яго правага вуха. “Я пачуў свіст, стрэлы і адразу адчуў, як куля раздзірае скуру” – пракаментаваў замах на яго жыццё палітык. 

Як паведамляе з месца падзей The New York Times, страляніна на перадвыбарчым мітынгу Дональда Трампа  адбылася днём 13 ліпеня па амерыканскім часе ў гарадку Батлер, што ў Пенсільваніі. Падчас выступу Трампа прагучалі некалькі стрэлаў з аўтаматычнай зброі. Кандыдат у прэзідэнты ЗША схапіўся рукой за сваё вуха і неўзабаве асеў на падлогу, яго ачапілі целаахоўнікі. Таксама, стрэламі былі збітыя з ног яшчэ некалькі чалавек, што знаходзідіся побач. Момант пакушэння трапіў на відэа (асцярожна, жорсткія кадры).

На дадзены момант названа меркаванае імя чалавека, што здзейсніў замах – Томас Мэцью Крукс. 

Як пішуць амерыканскія СМІ, незадоўга да пакушэння некаторыя ўдзельнікі перадвыбарчага мітынга заўважылі падазронага мужчыну са зброяй, што лез на дах суседняга будынка, аднак іх паведамленні былі праігнараваныя супрацоўнікамі бяспекі. 

Страляніна вялася з будынка, размешчанага прыкладна ў 125 метрах ад трыбуны, з якой выступаў Дональд Трамп.

Навіна будзе дапаўняцца.

Фота з адкрытых крыніц.

У Кемераве людзей выкінула на дарогу з трамвая, што імчаўся без тармазоў і ўрэзаўся ў іншы трамвай

Навіна ад

Набіты бітком трамвай несся без тармазоў у расійскім Кемераве сёння раніцай. На павароце дзверы не вытрымалі і двох чалавек выкінула на праезжую частку. Адразу пасля гэтага трамвай сутыкнуўся з іншым трамваем, што ехаў наперадзе. Пацярпелі 50 чалавек, цудам ніхто не загінуў. Апошні раз тэхнічнае абслугоўванне трамвай праходзіў тры дні таму – піша тэлеграм-канал Baza, ніякіх праблем не было выяўлена. 

У бальніцу Кемерава даставілі 40 чалавек, 3 з іх – у цяжкім стане, яшчэ 10 пасажыраў самі звярнуліся ў траўмапункт.

Украінская вайскоўцы паказалі выпрабаванні дронаў, нібыта здольных збіваць верталёты

Навіна ад

“Спроба пяра” – пад такім загалоўкам размясцілі кароткае відэа аператары дронаў украінскага падраздзялення BULAVA. У допісе гаворыцца, што вайскоўцы гэтага атраду праводзяць выпрабаванне дронаў, распрацаваных камандай “Дзікія шэршні”, здольных збіваць расійскія баявыя гелікоптэры. На відэа бачны пралёт аднаго з такіх верталётаў, зняты з украінскага дрона, а таксама размешчаны інтрыгоўны надпіс “Далі буде… Плани люблять тишу”.

Каментатары на канале галоўнага рэдактара выдання “Цензор.НЕТ” Юрыя Бутусава падзяліліся на два лагеры адносна падобнай навіны. Частка каментатараў абвінаваціла публікатараў відэа ў хайпе і маніпуляцыях. “Якая там проба пяра, звычайным дронам засеклі верталёт і што? – крытыкуе адзін з карыстальнікаў – Тыпу давайце выкладзем, скажам што ў нас сакрэтныя распрацоўкі і ўжо вось-вось пачнем верталёты збіваць, данацьце нам больш. Не варта так рабіць. Вы спачатку збейце, а потым ужо выкладвайце факты.”

Дрон проста знясе паветраным націскам ад верталёта – піша пераважная большасць скептычна настроеных каментатараў. Да таго ж, на паказаным відэа бачна, што здымка вялася са звычайнага квадракоптэра, які не толькі будзе адкінуты паветранай струёй, а ў прынцыпе не здолее дагнаць верталёт. “Можна яшчэ куляй у ствол танка стрэліць. – дабаўляе крытыкі іншы карыстальнік – Падчас перазарадкі можна боеўкладку падарваць.”

Іншыя каментатары дапускаюць тэхнічную магчымасць наносіць удары па верталётах з дронаў. Напрыклад, яны пішуць, што “дастаткова таннага рэактыўнага рухавіка для апошняй дыстанцыі. У цэлым, робіцца на каленках. Галоўнае, каб дрон у рэжыме аператара мэту захапіў і быў або вышэй верталёта, або на той жа вышыні. Тады ўжо можна сістэму саманавядзення ўключаць. Мяркуючы па відэа – рэактыўнаму рухавіку дрона трэба будзе секунд 5-7, каб выбіць верталёт.”

Таксама ў каментарах нагадваюць, што ўжо распрацаваныя недарагія звышхуткасныя дроны, здольныя дасягаць паказчыка больш за 400 кіламетраў у гадзіну. Так, самы хуткі ў свеце дрон лётае з хуткасцю ў 414 км/г і каштуе ўсяго 400$ – піша focus.ua.

Фота ілюстрацыйнае, з адкрытых крыніц

У Расіі спрагназавалі рост коштаў на тавары першай неабходнасці на 30%

Навіна ад

Эканамічны аналітык папярэдзіў, што больш за ўсё пацерпяць бедныя слаі грамадства.

Генеральны дырэктар інфармацыйна-аналітычнага агенцтва Infoline, што даследуе рынак тавараў і паслуг, Іван Фядзякоў у інтэрв’ю рэсурсу ura.ru спрагназаваў рост коштаў на самыя папулярныя і танныя тавары ў Расіі. У бліжэйшы час гэты рост можа скласці 10-30% і вышэй.

– У тавары першай цаны ў меншай ступені закладваюцца маржынальныя складнікі вытворцаў, якімі можна часткова дэмпфаваць (дэмпфіраванне – штучнае падаўленне хістанняў – mogilev.media) павышэнне сабекошту. Даводзіцца трансляваць цалкам рост затрат у цану канчатковага прадукту. Такім чынам, усе сыравінныя тавары, гэта значыць тыя тавары першай цаны, якія складаюць асноўны кошык бедных хатніх гаспадарак, у першую чаргу даражэюць да 30% і вышэй. – сказаў Іван Федзякоў.

Ён назваў асноўныя прадукты харчавання, якія можна ўключыць у спіс тавараў першай неабходнасці: хлеб, малако, яйкі, мяса, свежая садавіна і гародніна, макароны і крупы, кансервы, соль і цукар.

Аналітык патлумачыў, з чым звязаны высокі інфляцыйны ціск. “Гэта наступствы паслаблення рубля, якое ў мінулым годзе склала амаль 30%, востры дэфіцыт на рынку працы, які назіраецца ў шырокім спектры галін эканомікі. Таксама гэта следства высачэзных працэнтных ставак. Нагадаю, што Цэнтральны банк з пачатку 2024 года трымае 16%. Усе гэта закладваецца ў кошт тавараў і, зразумела, аказвае вельмі сур’ёзны ўплыў на рост цэн” – зазначыў эксперт.

Паводле яго слоў, у большай ступені ад росту інфляцыі пацерпяць бедныя слаі насельніцтва.

Павышэнне коштаў у Расійскай Федэрацыі вельмі часта прыводзіць да імгненных наступстваў і ў Беларусі – з паліц знікаюць, альбо сур’ёзна растуць у коштах хадавыя тавары.

Фота: mogilev.media

Былую Арку Дружбы народаў у Кіеве прапанавалі ператварыць у сімвал ЛГБТ

Навіна ад

Кіраўнік Украінскага інстытуту нацыянальнай памяці Антон Драбовіч заявіў, што Арку Свабоды ў Кіеве не трэба дэмантаваць – дастаткова пераасэнсаваць гэтую кампазіцыю, напрыклад, пераўвасобіўшы яе ў сімвал ЛГБТ або ў «сімвал вясёлкі над вадой». Раней гэтая арка называлася Аркай дружбы народаў і была выключаная са спісу помнікаў. 

На думку кіраўніка інстытута, які з’яўляецца дзяржаўным органам выканаўчай улады і ажыццяўляе мерапрыемствы па рэалізацыі працэсу дэкамунізацыі і дэкаланізацыі, магчымыя некалькі варыянтаў развіцця падзей. Калі будзе перавызначэнне яе сэнсу, прэтэнзій да існавання аркі не будзе. Іншы варыянт – нічога не мяняць і тады прыйдзецца правесці прымусовы дэмантаж аркі.

На думку кіраўніка УІНП, варыянт з вясёлкай – ледзь не лепшы, бо вакол аркі ўзнікае іншы сэнс і іншы кантэкст. Аднак можа быць іншы спосаб надаць аб’екту сімвалічнасць, напрыклад, праз іншы прадмет адпачынку ці манументальнага мастацтва.

Арка Дружбы народаў у Кіеве была пабудаваная ў 1981 годзе як сімвал расійска-украінскага сяброўства і ў гонар пераходу Запарожскага казацтва ў расійскае падданства ў 1654 годзе. У межах працэса дэкамунізацыі і на фое расійскай агрэсіі, у 2022 годзе яе пераназвалі ў Арку Свабоды ўкраінскага народу.

У 2024 годзе экспертная камісія Украінскага інстытута націянальнай памяці прыйшлі да высновы, што арка належыць да сімволікі расійскай імперскай палітыкі і патрабуецца яе поўны дэмантаж.

Фота з адкрытых крыніц

Гібель іранскага прэзідэнта можа прывесці да беспарадкаў, ці адкрые эру тэакратычнай дынастыі – аналітык

Навіна ад

Іранскі палітычны аглядальнік Шахрам Холдзі заяўляе на старонках Iran International, што вестка аб крушэнні верталёта і гібелі прэзідэнта Ібрагіма Раісі выклікала спекуляцыі наконт пытання пераемнасці прэзідэнта і яго наступстваў для Ісламскай Рэспублікі.

Згодна з Канстытуцыяй Ірана, прэзідэнт тэхнічна займае «другую па магутнасці» пасаду пасля Вярхоўнага лідэра, якім зараз з’яўляецца Алі Хаменеі. За апошнія дзесяцігоддзі вярхоўны лідэр Хаменеі дамогся таго, што яго занадта магутная пасада паступова зацямніла пасаду прэзідэнта і скараціла яе да пасады галоўнага адміністратара дзяржавы – адзначае аналітык. Ібрагіма Раісі ад яго папярэднікаў адрознівала тое, што ён увасабляў сабой ідэальнага «выканаўчага слугу» Вярхоўнага лідэра. 

Раісі быў абраны на прэзідэнцкую пасаду ў 2021 годзе пры падтрымца Алі Хаменеі і разглядаўся як магчымы спадчыннік пасады Вярхоўнага лідара. Адначасова ў іранскім палітычным полі з’явіліся галасы, што насамрэч спадчыннікам Алі Хаменеі можа стаць яго сын Маджтаба. 

У такім рэжыме, як іранскі, легітымнасць вярхоўнага лідара ў значнай ступені залежыць ад улады вайскоўцаў і апарату бяспекі і разведкі, а таксама ад кіруючай ідэалагічнай эліты. Зараз Маджтаба карыстаецца павагай у асяродках іранскіх сілавікоў і можа разлічваць на іх падтрымку ў сваім шляху на палітычную вяршыню.

Што робіць цяперашнюю сітуацыю найбольш жахлівай – піша Шахрам Холдзі – дык гэта тое, што калі раптам зараз сам Вярхоўны лідар Алі Хаменеі памрэ да абрання новага прэзідэнта, краіна патэнцыйна можа пагрузіцца ў агульнанацыянальныя беспарадкі. Калі арыенцірам стане паўстанне «Жанчына, жыццё, свабода» 2022-2023 гадоў, то ўлічваючы працяглую занядбаную эканамічную сітуацыю ў Іране, якая падштурхнула больш за шэсцьдзесят працэнтаў іранцаў да галечы, рэжым ужо змагаецца з эндэмічным крызісам легітымнасці. Такім чынам, менавіта смерць Хаменеі патэнцыйна можа выклікаць шматгранны крызіс.

Увогуле, галоўная дырэктыва і катэгарычны імператыў, якімі кіруецца ўся палітычная эліта Ісламскай Рэспублікі зараз, гучыць як «выжыванне рэжыму». Пры сцэнары, калі рэжым адначасова пазбаўлены як вярхоўнага лідэра, так і прэзідэнта, Асамблея экспертаў можа хутка абраць Маджтабу Хаменеі, які карыстаецца бясспрэчнай лаяльнасцю вышэйшага кіраўніцтва Корпусу вартавых Ісламскай рэвалюцыі, а таксама органаў бяспекі і разведкі. Калі так, то кіраўніцтва  Маджтабы Хаменеі адкрые эру тэакратычнай дынастыі ў Ісламскай Рэспубліцы па мадэлі раннесярэднявечнай дынастычнай спадчыннасці шыіцкіх імаматаў.

На фота: Пустое крэсла прэзідэнта Ібрагіма Раісі ў кабінеце міністраў Ірана пасля пацверджання яго смерці ў выніку крушэння верталёта. Фота: rferl.org