Tag: Беларусь

Дзень у гісторыі: 28 ліпеня. Пачалася Першая сусветная вайна, якая забрала мільён беларускіх жыццяў. Адкрылі мемарыял у Катыні, дзе забівалі палякаў і беларусаў. Памёр паэт Алесь Гарун, які вярнуў друку беларушчыну. У Еўропу завезлі бульбу

Навіна ад

Сусветны дзень барацьбы супраць гепатыту

Абвешчаны Сусветнай арганізацыяй аховы здароўя ў 2008 годзе дзеля павышэння дасведчанасці аб вірусным гепатыце і захворваннях, да якіх ён прыводзіць.

Паводле ацэнак Сусветнай арганізацыі аховы, блізу траціны чалавецтва заражаная вірусам гепатыту. 

Нягледзячы на тое, што эфектыўная вакцынацыя супраць некаторых відаў гепатыту была створана больш за 25 гадоў таму, вірус працягвае штогод забіваць мільён чалавек.

Захворванне прызнана глабальнай небяспечнай праблемай аховы здароўя. 

У Беларусі каля 35 тысяч хворых з гепатытам С.

131.by

1586 год. У Еўропу з Амерыкі завезлі бульбу.

Адназначна пераканаўчых звестак, як і хто завёз бульбу ў Беларусь няма, але вядома, што ў канцы 17 стагоддзя яе спрабавалі культываваць у нашым краі. Беларусы паставіліся да новай культуры з недаверам і нават варожа, але з часам яна стала для іх «другім хлебам».

Прыніжальная назва беларусаў “бульбаш” спачатку адносілася толькі да ўніятаў, потым да навабранцаў з літоўска-беларускіх губерняў.

Адной з самых «бульбяных» у Расійскай імперыі была Магілёўская губерня.

У СССР беларусы больш за іншых вырошчвалі і спажывалі бульбы. 

Хаця бульба – адзін з сімвалаў Беларусі, яе імпартуюць з Эўропы, Афрыкі, Азіі.

1812 год. Нарадзіўся Юзаф Крашэўскі

Польскі пісьменнік.

Удзельнік паўстання 1830-1831 гг. Пачынальнік польскай рэалістычнай прозы, аўтар больш за 600 тамоў твораў. У Польшчы яго творы абавязковыя ў школьнай праграме.

Паўплываў на творчасць Янкі Купалы, які перакладаў творы Крашэўскага на беларускую мову. На беларускую мову яго творы таксама перакладалі Пятро Бітэль, Васіль Сёмуха, Міхаіл Кенька.

1890 год. Нарадзіўся Язэп Рэшаць.

Дзеяч беларускай эміграцыі, рэлігійны і культурна-асветны дзеяч.

Адзін з відных тэолагаў і вучоных у гісторыі беларускага хрысціянскага руху XX стагоддзя.

Удзельнічаў у заходнебеларускім нацыянальна-рэлігійным жыцці. У 1928–1929 гадах актыўны дзеяч Беларускай Хрысціянскай Дэмакратыі. 

У 1927 годзе ў складзе беларускай дэлегацыі ўдзельнічаў у працы 5-га Уніяцкага кангрэса ў Велеградзе (Чэхаславакія). Супрацоўнічаў з каталіцкім перыядычным выданнем «Chryścijanskaja Dumka».

Аўтар рэлігійных і навуковых кніг «Асновы хрысціянскай веры для беларускага народу», «Кароткі Катэхізм для Беларусаў-Каталікоў»

1897 год. Памёр Янка Лучына (Неслухоўскі).

Паэт, перакладчык.

Псеўданімам Лучына падпісваў толькі творы на беларускай мове. Пісаў на польскай, рускай, беларускай мовах і ў розных жанрах.

У 1886 годзе напісаў першы верш на беларускай мове. Але, як беларускі паэт ён дэбютаваў у друку ў 1889 годзе, калі змясціў у газеце «Минский листок» верш «Вясновай парой», паклаўшы пачатак вяртанню беларускай літаратуры да друкаванага жыцця, перарванага пасля паражэння паўстання 1863 года расійскімі рэпрэсіямі на чвэрць стагоддзя.

Беларускамоўная творчасць Янкі Лучыны, якая дайшла да нас, нешматлікая: 14 арыгінальных вершаў.

1914 год. Пачалася Першая сусветная вайна, якая трывала да 11 лістапада 1918.

У 38 краінах загінула 10 мільёнаў чалавек. 

Страты Беларусі склалі да 1 мільёна жыхароў. 

Вайна знішчыла чатыры вялікія імперыі Старога Свету – Германскую, Расійскую, Аўстра-Венгерскую і Асманскую.

У Магілёве ад 1915 да 1918 гадоў месцілася стаўка расійскага самадзержца Мікалая ІІ, які фармальна лічыўся галоўнакамандуючым расійскім войскам.

1920 год. Памёр Алесь Гарун (Прушынскі).

Беларускі паэт, празаік, драматург, публіцыст, грамадскі дзеяч.

За антыўрадавую дзейнасць расійскімі ўладамі ў ліпені 1908 асуджаны на ссылку і пажыццёвае пасяленне ў Сібіры. Там падрыхтаваў зборнік «Матчын дар». Пераслаў яго ў Вільню і яго выдалі ў 1918 годзе.

Творчасць Алеся Гаруна прасякнутая ідэяй сацыяльнага і нацыянальнага разняволення беларускага народу.

Быў віцэ-старшынёй Усебеларускага з’езду 1917 году, сярод тых дзеячоў, хто абвяшчаў Беларускую Народную Рэспубліку.

У гонар паэта ў Фрунзенскім раёне Мінска названа вуліца.

2000 год. У Катыні пад Смаленскам адкрыты мемарыял польскім жаўнерам, забітым савецкімі органамі ўнутраных справаў. 

Сярод забытых было нямала беларусаў, якія ваявалі на баку Польшчы, у якую ўварваліся Гітлераўская Германія і Савецкі Саюз.

У Катыні было забіта 21857 чалавек.

У 2010 годзе ў Смаленскай вобласці адбылася авіякатастрофа. У ёй загінула польская дэлегацыя на чале з Прэзідэнтам Польшчы Лехам Качынскім, якая ляцела на 70-годдзе Катынскага расстрэлу.

Цяпер расійскія ўлады пагражаюць ліквідаваць мемарыял праз падтрымку Польшчай Украіны, якая стала ахвярай поўнамаштабнай агрэсіі Расіі.

У публікацыі выкарыстаныя звесткі з рэсурсу «Вікіпедыя» і іншых адкрытых у інтэрнэце крыніцаў

 

Украінскія вайскоўцы сцвярджаюць, што па Ўкраіне з Беларусі раніцай стралялі ракетамі

Навіна ад

Аператыўнае камандаванне «Поўнач» пра ракетны абстрэл Чарнігаўскай вобласці паведамляе, абапіраючыся на «беларускія крыніцы».

Паводле ўкраінскіх вайскоўцаў, Чарнігаўшчыну атакавалі 28 ліпеня ранкам ад 7.20 да 8.30. Ракеты трапілі ў лясны масіў. Пра ахвяры сярод насельніцтва гаворкі няма.

«Паступіла інфармацыя аб запуску больш за 20 ракет з Беларусі», – даводзяць украінскія вайскоўцы ў паведамленні на сваёй старонцы ў Фэйсбук.

«У цяперашні час вядома аб прыбыцці 9 ракет па тэрыторыі Ганчарыўскай абшчыны Чарнігаўшчыны, якія ўпалі ў лясны масіў, – адзначана ў паведамленні. – Наша сістэма супрацьпаветранай абароны таксама працавала».

Аператыўнае камандаванне «Поўнач» абяцае падрабязней апавесці пазней.

Тым часам, старшыня Чарнігаўскай абласной ваеннай адміністрацыі Вячаслаў Чавус кажа пра 10 зафіксаваных “варожых прылётаў” ракет.

У сваім тэлеграм-канале ён піша што, з меркаванняў бяспекі ўстрымліваецца паведамляць падрабязнасці.

Па яго словах інфармацыя аб ахвярах і разбурэннях удакладняецца.

“Такім чынам вораг віншуе нас з Днём украінскай дзяржаўнасці. Мы людзі ўдзячныя і абавязкова ворагу за гэта аддзячым”, – піша ён.

Паводле прэс-сакратара камандавання Вайскова-паветраных сіл Украіны Юрыя Ігната па Чарнігаўшчыне стралялі ракетамі «Іскандэр» з раёну Зябраўкі Гомельскай вобласці Беларусі, перадае  выданне «Українська правда».

Хроніка прыхаванай рэальнасці. Суды, зняволенні, вызваленні

Навіна ад

Звесткі пра пераслед паводле праваабаронцаў, мэдыяў і родзічаў тых, хто зазнае яго.

Галіна Дзербыш

61-гадовую жанчыну, якую вінавацяць у тэрарызме і датычнасці да «групы Аўтуховіча» змясцілі ў карцар на 7 дзён.

Пенсіянерку з інваліднасцю з-за праблем з сэрцам і анкалогічнай хваробы адміністрацыя гродзенскай турмы №1 пакарала за тое, што адмаўлялася праходзіць праз сканер.

Жанчыну судзяць за «змову з мэтай захопу ўлады неканстытуцыйным шляхам», «удзел у злачыннай арганізацыі ў любой іншай форме» ды «акт тэрарызму».

На адным з пасяджэнняў яна заявіла, што падчас следства ёй увесь час пагражалі і прымушалі агаворваць сябе. Праваабарончай супольнасцю прызнаная палітзняволенай.

Анджэй Почабут

Не выйшаў 25 ліпеня на волю па сканчэнні тэрміну зняволення.

Ягоная жонка дапускае, што мужу працягнулі тэрмін утрымання пад вартай.

Журналіста і актывіста не прызнанага ўладамі Саюзу палякаў Беларусі затрымалі 25 сакавіка 2021 года. Яму выстаўленае абвінавачванне ў «распальванні варожасці ці варажнечы».

Праваабарончай супольнасцю прызнаны палітвязнем. Утрымліваецца ў Гродзенскай турме №1.

Міхаіл Добыш

Змененае пакаранне на больш жорсткае – яго пераводзяць з «хіміі» у калонію.

Паводле праваабаронцаў суддзя Дзмітрый Сасноўскі Круглянскага раённага суду пастанавіў перавесці Добыша ў калонію тэрмінам на 10 месяцаў. 

У Круглянскай папраўчай установе адкрытага тыпу ён утрымліваўся з 12 чэрвеня 2021 году.

Быў асуджаны за тое, што 17 верасня 2020 года ў прадуктовай краме пагражаў учыніць гвалт міліцыянту.

Праваабарончай супольнасцю прызнаны палітвязнем.

Аляксей Парэцкі

Асуджаны за распальванне варажнечы і нагавор на Лукашэнку на 3 гады калоніі агульнага рэжыму.

Нагодай для крымінальнага пераследу сталі апублікаваныя паведамленні ў інтэрнэце. У сукупнасці, мужчыну было прызначанае пакаранне ў выглядзе трох гадоў пазбаўлення волі ў калоніі.

Камітэт дзяржаўнай бяспекі ўключыў Парэцкага ў спіс асоб, якія маюць дачыненне да «тэрарыстычнай дзейнасці». Прычыны такога рашэння невядомыя.

Сяргей Красоўскі, Вольга Сыраватка

На волі

Паводле праваабаронцаў абодва былі затрыманыя па справе аб блакаванні чыгуначных шляхоў і развешванні пудзілаў з надпісамі «АМАП».

Праваабарончай супольнасцю прызнаныя палітзняволенымі.

 

Дабавіць мільярд. Улады прагнуць прадаць за мяжу рэкордную колькасць харчоў

Навіна ад

Аднаго мільярда долараў не хапае, каб нарасціць экспарт харчавання да 7,8 мільярдаў долараў па выніках году.

Паводле міністра сельскай гаспадаркі і харчавання Ігара Брыло ў параўнанні з аналагічным перыядам мінулага году сёлета тэмп росту ў вартасным выражэнні сягае 114 працэнтаў.

«Мы рэалізавалі нашу прадукцыю больш як у 100 краін свету на суму 2,8 мільярда долараў. Стаіць задача дасягнуць лічбы 7,8 мільярдаў па выніках года. Дадаць да ўзроўню мінулага года трэба будзе больш за 1 мільярд долараў», – заяўляе ён.

Па яго словах асноўным рынкам збыту харчоў застаецца Расія, піша «Белта». 

На расійскі рынак пастаўляецца 70 працэнтаў прадукцыі. Павялічаныя пастаўкі ў Кітай і іншыя краіны Азіі, а таксама ў Акіянію, Афрыку, кажа Брыло.

«Наша прадукцыя пазнавальная, канкурэнтаздольная, на складах практычна няма рэшткаў», – настойвае чыноўнік.

Крымінальны трэш дня – п’яная цяжарная на восьмым месяцы за рулём матаблоку, і чарговыя крадзяжы ў разявак

Навіна ад

Цяжарная жанчына, жыхарка адной з вёсак Бабруйскага раёну адправілася на матаблоку на рыбалку. Там выпіла два літры піва і на тым жа транспартным сродку а дзясятай вечара вярталася дахаты, калі яе спыніў экіпаж ДАІ – паведамляе прэсс-служба абласнога УУС. Праверка паказала 1,5 праміле ў крыві жанчыны, што знаходзілася на восьмым месяцы цяжарнасці.

Разявакі сталі ахвярамі зламыснікаў за апошні час ажно тройчы ў Магілёве. На пасядзелках у адным з дамоў на Дняпроўскім бульвары двое прыяцеляў выпівалі, а калі адзін з іх страціў пільнасць, то другі незаўважна выцягнуў у яго і прысабечыў мабільны тэлефон коштам у 200 рублёў.

Падобны выпадак адбыўся ў адным з бараў гораду ноччу – паведамляюць у міліцэйскай прэс-службе. Маладая жанчына пакінула на барнай стойцы свой тэлефон, коштам у 1 300 рублёў. Гэта заўважыў 34-гадовы, раней судзімы мужчына, што адпачываў побач. Ён незаўважна забраў тэлефон і пакінуў бар. Аднак, аператыўнікі здолелі ўстанавіць яго асобу па гарачых слядах і арыштаваць.

63-гадовы магілёвец паскардзіўся ў аператыўна-дзяжурную службу Ленінскага РАУС. Як высветлілася, мала знаёмай яму жанчыне ён аддаў у часовае карыстанне сваю банкаўскую картку, і з яе знікла каля 900 рублёў. З жанчынай яны пазнаёміліся за некалькі дзён да гэтага, калі разам вярталіся з прадуктовай крамы. Разгаварыліся і вырашылі разам выпіць. Каб схадзіць за дабаўкай мужчына аддаў новай знаёмай сваю картку, а калі яна вярнулася з крамы, забыў забраць картку назад.

Жанчына некалькі дзён потым карысталася карткай самастойна, бо мужчына пасля сыходу новай знаёмай так і не змог успомніць яе імя і прозвішча, каб знайсці і папрасіць вярнуць карту.

Адзначым, што ў міліцэйскіх зводках гэтая гісторыя праходзіць пад грыфам «Кіберзлачынства».

Нацыянальны аэрапорт пагражалі ўзарваць. Выбуховых рэчаў не выявілі

Навіна ад

Нацыянальнаму аэрапорту рэгулярна паступаюць паведамленні аб пагрозах мініравання будынку аэравакзала, узлётна-пасадачнай паласы, а таксама паветраных суднаў авіякампаніяў. За ліпень 2022 года зафіксаваны 4 такія выпадкі. За паўгода – 52.

Апошні здарыўся 27 ліпеня. У 7:53 раніцы на электронную пошту аднаго з аддзелаў ад невядомай асобы паступіла паведамленне аб наяўнасці самаробнай узрыўчаткі на тэрыторыі аэрапорту, а таксама на борце паветранага судна авіякампаніі Belavia рэйса В2 738 Батумі – Мінск, інфармуе прэс-служба Нацыянальнага аэрапорту «Мінск».

Вобшук паветранага судна, дадатковы агляд зарэгістраванага багажу і праверка аэравакзальнага комплексу ды прывакзальнай плошчы не выявілі небяспечных рэчаў або прадметаў.

Паводле прэс-службы за першае паўгоддзе сталічны аэрапорт 52 разы атрымліваў паведамленні аб актах незаконнага ўмяшання ў дзейнасць грамадзянскай авіяцыі, якія класіфікуюцца ICAO як падманнае паведамленне інфармацыі.

У 100% выпадкаў паведамленні аб пагрозах аказваліся непацверджанымі.

Тым не менш, падраздзяленні авіяцыйнай бяспекі сумесна з праваахоўнымі органамі аператыўна рэагуюць на ўсе атрыманыя пагрозы бяспецы незалежна ад адэкватнасці паведамленняў, разглядаючы іх як рэальныя.

Беларусь пазмагаецца за азіяцкія інвестыцыі – старшыня ўраду Галоўчанка

Навіна ад

Ён заяўляе, што краіна зацікаўленая ў з’яўленні на беларускім рынку азіяцкіх вытворцаў, бо еўрапейскія кампаніі згортваюць сваю дзейнасць у рэгіёне.

“Ва ўмовах згортвання заходнімі кампаніямі вытворчасцяў у Расіі, разгорнецца сапраўдная барацьба за азіяцкія інвестыцыі. Іх прыцягненне таксама зʼяўляецца вельмі запатрабаваным напрамкам работы кіраўнікоў замежных устаноў у адпаведных краінах”, цытуе прэм’ер-міністра БелТА.

Паводле яго слоў, замежныя інвестыцыі ў Беларусь працягваюць расці.

“У першым квартале на чыстай аснове іх рост склаў 45 працэнтаў”, – настойвае ўрадовец.

Фотарэпартаж з Баркалабаўскага манастыра – некалі вядомага асяродка беларускага праваслаўя, знішчанага дашчэнту і адбудаванага наноў

Навіна ад

Гісторыя старажытнага Баркалабава поўніцца летапіснай праўдай, міфамі і мноствам іх інтэрпрэтацыяў. Кажуць, што ў тутэйшым манастыры пісалася вядомая Баркулабаўская хроніка. Памятны знак ёй паставілі ў Быхаве.

Баркалабава, некалі вядомы асяродак беларускага праваслаўнага свету, знаходзіцца ў Быхаўскім раёне. Да райцэнтру меней за 15 кіламетраў. Да Магілёва – 40.

Тутэйшы манастыр заклаў у першай палове 17 стагоддзя праваслаўны мецэнат, дзяржаўны дзеяч Вялікага Княства Літоўскага Багдан Статкевіч.

У 1924-ым бальшавікі святыню зачынілі, а мясцовы люд, які лічыўся набожным, расцягнуў яе маёмасць да цаглінкі.

Адраджэнне манастыра пачалося ў 2008 годзе. У 2010-ым адбудаваны мясцовы храм Святога Яна Прадцечы асвяцілі. Сюды быў вернуты з Быхава цудадзейны абраз Баркалабаўскай Маці Божай.

Гавораць, што гэты абраз пакінуў манастыру ў 1659 годзе маскоўкі князь Пажарскі, які прыйшоў ваяваць беларускія землі, але няўдала. Пад націскам войска Вялікага Княства Літоўскага ён вымушаны быў адступаць. У сваім абозе меў скрадзеную праваслаўную рэліквію. Праходзячы ля манастыра здарылася дзіва – коні ваяроў маскоўца не хацелі ісці далей. Іх нельга было зрушыць з месца. Аддаўшы абраз манастыру, Пажарскі працягнуў уцёкі.

Манастыр з моманту заснавання адносіўся да Канстанцінопальскай патрыярхіі. Цяпер ён падпарадкоўваецца Беларускай праваслаўнай царкве Маскоўскага патрыярхату.

Манастыр – папулярная турыстычная мясціна. Мноства людзей наведваюць яго, каб замаліць грахі і выбавіцца ад праклёнаў.

У манастыры стала жывуць больш за дзясятак манашак. Пры ім ёсць свая гаспадарка. Стаіць ён на дняпроўскай старыцы, а побач цячэ рака Лахва.

У беларускіх універсітэтах зноў прымаюць абітурыентаў на бюджэт – недабор па ўсёй краіне

Навіна ад

Вакантныя месцы на бясплатнае навучанне амаль у кожным універсітэце. Сярод магілёўскіх ВНУ вылучаецца ўніверсітэт імя Куляшова – тут колькасць заявак ад абітурыентаў на дзённы бюджэт перавышае колькасць вакантных месцаў па ўсіх спецыяльнасцях.

Беларуска-Расійскі універсітэт і універсітэт харчовых і хімічных тэхналогій абвясцілі пра дадатковы прыём на бюджэтныя месцы. 

Так, у БРУ ёсць вольныя месцы па спецыяльнасцях аўтамабілебудаванне (6 вакансій), інавацыйная тэхніка для будаўнічага комплексу (16), тэхналагічнае абсталяванне машынабудаўнічай вытворчасці (17), абсталяванне і тэхналогіі высокаэфектыўных працэсаў апрацоўкі матэрыялаў (13), абсталяванне і тэхналогія зварачнай вытворчасці (3), аўтамабільныя дарогі (9), метады і прыборы кантролю якасці і дыягностыкі стану аб’ектаў (10).

У Беларускім універсітэце харчовых і хімічных тэхналогіяў ёсць таксама вакансіі – яна на фота.

 

Дзень у гісторыі: 27 ліпеня. Прыняцце Дэкларацыі аб дзяржаўным суверэнітэце Беларусі. ВКЛ перамагло крыжакоў пад Меднікамі. Памерлі Яўхім Кіпель, аўтар кнігі успамінаў аб ГУЛАГу і Уладзіслаў Дыбоўскі, збіральнік беларускага фальклору

Навіна ад

1320 год. Войска Вялікага княства Літоўскага перамагло ў бітве пад Меднікамі рыцараў Тэўтонскага ордэна.

Крыжакі страцілі ўсіх 40 братоў-рыцараў і іх дапаможны кантынгент. І гэта адбылося за 90 гадоў да Грунвальдскай бітвы, пасля якой ордэн перастаў існаваць.

1900 год. Дзень нараджэння гамбургера. 

27 ліпеня амерыканскі гастраном Луі Лесінг прадаў першы гамбургер.

Страва займела шырокую вядомасць у 1904 годзе на Сусветнай выставе ў Сэнт-Луісе. Пачала ж імкліва распаўсюджвацца па свеце з 1948 году з заснаваннем сеткі McDonald’s.

Гамбургер нароўні з джынсамі застаецца сімвалам амерыканскай культуры і самай дэмакратычнай ежай.

1910 год. Памёр Уладзіслаў Дыбоўскі.

Прыродазнавец, палеантолаг, фалькларыст.

Збіраў беларускі фальклор. У штогодніку «Zbiór Wiadomości do Antropologii Krajowej» апублікаваў «Беларускія прыказкі з Навагрудскага павета», «Беларускія загадкі з Мінскай губерні».

Даследаваў выкапнёвыя рэшткі Усходняй Прыбалтыкі, Сібіры, флору i фаўну Навагрудчыны i іншых мясцін Расійскай імперыі.

За ўдзел у паўстанні 1863–1864 гадоў адседзеў у турме.

1922 год. У Бруселі заснаваны Міжнародны геаграфічны саюз.

Міжнароднае навуковае аб’яднанне географаў. Месца размяшчэння Сакратарыята – Дэлі, Індыя. Першы Міжнародны геаграфічны кангрэс прайшоў у 1871 годзе ў Антверпене.

Геаграфічны саюз аб’ядноўвае больш 88 краін.

7 сакавіка 2022 году прыпынена членства Рускага геаграфічнага таварыства з прычыны расійскай агрэсіі ва Украіну. Беларускае геаграфічнае таварыства – член Міжнароднага геаграфічнага саюзу з 1991 году.

1955 год. Нарадзіўся Барыс Лазука.

Мастацтвазнавец, педагог.

Даследчык беларускага мастацтва XVII–XVIII стагоддзяў, барока.

За­гад­чык ад­дзе­лу ста­ра­жыт­най бе­ларускай куль­ту­ры Ін­сты­ту­та мас­тацт­ва­знаў­ства, эт­на­гра­фіі і фальк­ло­ру НАН Беларусі, дырэктар Музею старажытнабеларускай культуры.

zviazda.by

1969 год. Памёр Яўхім Кіпель.

Педагог, дзеяч беларускай эміграцыі.

Член Навукова-тэрміналагічнай камісіі пры Наркамасвеце БССР, сакратар аддзелу прыроды і народнай гаспадаркі Інстытуту беларускай культуры.

Двойчы арыштоўваўся савецкімі органамі ўнутраных спраў. Быў фігурантам сфальсіфікаванай крымінальна-палітычнай справы «Саюзу вызвалення Беларусі». Рэабілітаваны 10 чэрвеня 1988.

Аўтар кнігі ўспамінаў пра савецкія лагеры «З іхняга раю».

Стваральнік Аб’яднання беларускіх вязняў савецкіх лагераў.

Член Беларускага кангрэсавага камітэту Амерыкі. Публікаваўся ў беларускай эмігранцкай прэсе. Успаміны Яўхіма Кіпеля захоўваюцца ў архіве Беларускага інстытуту навукі і мастацтва ў Нью-Ёрку.

1990 год. Вярхоўны Савет БССР прыняў Дэкларацыю аб дзяржаўным суверэнітэце БССР.

Ініцыятыва належала Сойму Беларускага Народнага Фронту «Адраджэнне». За прыняцце Дэкларацыі прагаласавала 229 дэпутатаў.

25 жніўня 1991 году пасля спробы дзяржаўнага перавароту ў Савецкім Саюзе Дэкларацыя аб дзяржаўным суверэнітэце набыла статус канстытуцыйнага закона і захоўвала юрыдычную сілу да 15 сакавіка 1994 году.

Ад 1991 да 1996 году галоўнае нацыянальнае свята – Дзень незалежнасці, быў прымеркаваны да даты прыняцця «Дэкларацыі». 

У 1996 году з ініцыятывы Аляксандра Лукашэнкі быў праведзены рэферэндум, у выніку якога Дзень незалежнасці быў перанесены на 3 ліпеня.

2008 год. Памёр Валерый Міронаў.

Артыст, Народны артыст Беларусі.

Вядучы саліст Дзяржаўнага тэатру оперы і балета Беларусі, выканаўца роляў у шматлікіх пастаноўках «Князь-возера», «Лебядзінае возера», «Спячая прыгажуня».

У публікацыі выкарыстаныя звесткі з рэсурсу «Вікіпедыя» і іншых адкрытых інтэрнэт-рэсурсаў.