Дзень у гісторыі. 26 сакавіка. Егіпецкі каляндар. Прэм’ера оперы «Усяслаў Чарадзей». Шэнгенскае пагадненне. Нарадзіліся паэт В.Шніп, палітык Ф. Вячорка.

4241 год да нашай эры. Увядзенне ў Егіпце календара з годам у 365 дзён.

Ужо ў XLIII ст. да н.э. жыхары Дэльты ўстанавілі год у 365 дзён і ўвялі ў 4241 годзе да н. э. каляндарны год такой даўжыні, які пачынаўся ў дзень, калі ўзыход Сірыўса супадаў з усходам сонца на шыраце Паўднёвай Дэльты, з летнім сонцастаяннем і папярэднічаў разліву Ніла.

Год у егіпцян ужо тады складаўся з 365,25 сутак. Аднак у даўжыню свайго года егіпцянамі быў пакладзены цэлы лік дзён – 365. 

Такім чынам, за кожныя 4 гады сезонныя з’явы адставалі ад календара на 1 суткі. Пры адсутнасці высакосных гадоў Новы год праходзіў за 1460 (365×4) гадоў усе сезоны і вяртаўся на пачатковую дату. Перыяд у 1460 гадоў зваўся сотычным перыядам, цыклам, ці Вялікім годам Соціса.

Год дзяліўся на 3 сезоны па 4 месяцы кожны: Час паводкі – ахет – з сярэдзіны ліпеня да сярэдзіны лістапада, Час ўсходаў – пярэць – з сярэдзіны лістапада да сярэдзіны сакавіка, Час засухі – шыму  – з сярэдзіны сакавіка да сярэдзіны ліпеня.

Трэба нагадаць, што старажытны славянскі каляндар таксама меў толькі тры сезоны: вясну, лета і зіму: “Колькі лет, колькі зім!”, “Ад вясны да вясны”. Восень (“пад сень лета”) з’явілася значна пазней.

У 25 годзе да н.э.  устаноўлены Александрыйскі каляндар, сінхранізаваны з юліянскім календаром. Ён захаваў ранейшыя назвы месяцаў, а кожны чацвёрты, высакосны год у канцы дабаўляўся адзін дзень. Да старажытнаегіпецкага календара ўзыходзяць копцкі і эфіёпскі календары, якія да гэтага часу прымяняюцца мясцовымі цэрквамі. Структура егіпецкага календара была запазычаная французскім рэвалюцыйным календаром.

1923 год. У Маскве скончыўся працэс над клерыкаламі-«антысаветчыкамі».

Магілёўскі каталіцкі арцыбіскуп Ян Цепляк (1857–1926) разам з петраградскім К. Буткевічам прыгавораны да смяротнага пакарання. 13 ксяндзоў атрымалі розныя тэрміны зняволення.

К. Буткевіч быў расстраляны, а пад напорам міжнароднай грамадскасці смяротны прысуд Цепляку быў заменены на 10 гадоў пазбаўлення волі. У 1924 годзе ён быў вызвалены з Бутырскай турмы і высланы ў Польшчу, адкуль пераехаў у Рым, затым у ЗША, дзе і памёр у 1926 годзе.

Ян Цепляк у 1908–1917 гадах быў кіраўніком Магілёўскай архідыяцэзіі.

1932 год. Памёр Зігмунд Лазінскі (1870–1932).

Беларускі каталіцкі рэлігійны дзеяч, біскуп  мінскі (1918–1925) і пінскі (1925–1932).

Святар з 1895 года. Быў пробашчам кафедральнага сабора ў Мінску,  прафесарам Магілёўскай духоўнай акадэміі ў Пецярбургу, кіраўніком адноўленай Мінскай архідыяцэзіі (1917–1920), першым біскупам навастворанай Пінскай дыяцэзіі (1925–1932).

У 1909-1911 гадах суправаджаў магілёўскага біскупа Яна Цепляка ў наведванні парафій Расійскай імперыі.

Спрыяў усталяванню беларускай мовы ў касцёле. Арганізатар беларускай каталіцкай семінарыі ў Мінску (пазней пераведзена ў Навагрудак, затым у Пінск).

У 1920 годзе арыштаваны камуністычнымі ўладамі, 11 месяцаў правёў у маскоўскай «Бутырцы», пасля вымушаны з’ехаць у Заходнюю Беларусь.

1940 год. Нарадзіўся Міхаіл Касцюк.

Беларускі гісторык, акадэмік, доктар гістарычных навук, прафесар. Ганаровы архівіст Беларусі. Ганаровы грамадзянін Навагрудскага раёна.

Скончыў Гродзенскі педінстытут.

З 1969 года працаваў у Інстытуце гісторыі АН БССР (дырэктар у 1989–1999 гадах), Інстытуце гісторыі партыі пры ЦК КПБ.

Займаўся даследаваннем сацыяльна-эканамічнай і грамадска-палітычнай гісторыі Беларусі ХХ стагоддзя. Вывучаў гісторыю дзяржаўнага і нацыянальна-культурнага будаўніцтва, пытанні ўсталявання і функцыянавання савецкай сістэмы ўлады, праблемы гістарыяграфіі, крыніцазнаўства.

Аўтар звыш 300 навуковых прац, у тым ліку 14 манаграфій.

З’яўляўся галоўным рэдактарам «Нарысаў гісторыі Беларусi», «Гісторыі Беларусi» ў 6-ці тамах.

Памёр 5 лютага 2019 года.

1942 год. Нарадзіўся Іван Арабейка.

Беларускі паэт.

Скончыў Беларускі політэхнічны інстытут.

Аўтар вершаў, зборнікаў паэзіі «Услед за сонцам», «Асенні ранак». Лаўрэат Літаратурнай прэміі імя Уладзіміра Калесніка за кнігу вершаў «Сказаць хачу».

Яго вершы друкаваліся ў перакладах на рускую, ўкраінскую і грузінскую мовы.

Ягоная ўнучка Яна Арабейка была арыштаваная 12 лістапада 2020 года ў межах крымінальнай справы разам з 10 іншымі актывістамі студэнцкага руху ў рамках справы студэнтаў і выкладчыкаў ВНУ. Прызнаная палітычнай зняволенай.

1944 год. У Мінску ў гарадскім тэатры адбылася прэм’ера оперы «Усяслаў Чарадзей» М. Шчаглова-Куліковіча на вершы Н. Арсенневай.

Мікалай Шчаглоў-Куліковіч (1893–1969) – вядомы беларускі кампазітар, музыколаг, этнограф, паэт і дзеяч беларускага руху ў эміграцыі, аўтар музыкі гімна на словы М. Багдановіча “Пагоня”, вдзін з арганізатараў Тэатра оперы і балета Беларусі, дырыжор яго сімфанічнага аркестра, дырыжор сімфанічнага аркестра Усебеларускага Радыёкамітэту, музычны рэдактар Беларускага радыё.

Заснаваў у Нью-Ёрку беларускі хор, кіраваў беларускімі хорамі ў Кліўлендзе і Чыкага. Пакінуў вялікую музычную спадчыну.

Тэатр оперы і балета

1958 год. Заснавана Пастаяннае прадстаўніцтва Беларусі пры ААН.

Беларусь з’яўляецца заснавальнікам Арганізацыі Аб’яднаных Нацый і беларуская дэлегацыя ў ліку іншых дэлегацый, якія прадстаўляюць першапачатковых членаў Арганізацыі, падпісала ў кастрычніку 1945 года ў Сан-Францыска Статут ААН.

Прыняцце Беларусі ў ствараемую глабальную арганізацыю стала прызнаннем міжнароднай супольнасцю ўкладу, які ўнёс беларускі народ у перамогу над фашызмам у Другой сусветнай вайне.

Прадстаўніцтва ААН у Беларусі адкрылася ў 1992 годзе.

1960 год. Нарадзіўся Віктар Шніп.

Беларускі паэт, празаік, перакладчык. Лаўрэат Нацыянальнай літаратурнай прэміі.

Скончыў Вышэйшыя літаратурныя курсы Літаратурнага інстытута імя М. Горкага ў Маскве. Працаваў у часопісе «Беларусь», газетах «Наша слова» і «Літаратура і мастацтва», намеснікам дырэктара выдавецтва «Мастацкая літаратура», галоўным рэдактарам часопіса «Полымя».

Аўтар каля 30 кніг паэзіі і прозы, суаўтар многіх зборнікаў, зборніка казак «Нявеста для Базыля».

Пісаў тэксты для рок-гуртоў, бардаў, эстрадных выканаўцаў.

Віктар Шніп і яго жонка, Людміла Рублеўская

1988 год. У Варшаве ўтвораны заснавальніцкі камітэт Беларускага Аб’яднання Студэнтаў (БАС) у Польшчы.

БАС – беларуская грамадская арганізацыя студэнтаў у Польшчы, якая займаецца грамадска-культурнай, асветнай, выдавецкай, турысцкай дзейнасцю.

БАС быў зарэгістраваны 29 лістапада 1988, 17 снежня 1988 года адбыўся першы з’езд. Гурткі дзейнічаюць у ВНУ Беластока, Варшавы, Гданьска, Любліна, Ольштына, адзін у ЗША.

На лясной паляне Борык каля мястэчка Гарадок Беластоцкага павета з 1990 да 2019 год БАС праводзіў штогадовы фестываль беларускай альтэрнатыўнай і рок-музыкі «Басовішча».

Выступ гурта «Крама» на «Басовішчы-2007»

1988 год. Нарадзіўся Франак Вячорка.

Беларускі грамадзкі дзеяч, журналіст, палітык. Палітычны дарадца С. Ціханоўскай. Сын Вінцука Вячоркі.

Кіраваў укладаннем некалькіх музычных праектаў, каардынаваў праект па дубляваньні замежных фільмаў на беларускую мову, у межах якога былі перакладзеныя «Шрэк 2», «Шрэк 3», «Крымінальнае чытво», «Любоў насамрэч».

Аўтар кнігі «Падарожны Дапаможнік для беларусаў», адзін з ініцыятараў кампаніі «Народны журналіст», вядучы курсаў беларускай мовы «Мова ці кава».

Супрацоўнічаў з Радыё Рацыя, Радыё Свабода, БелаПАН, каардынаваў прасоўванне тэлеканалу Белсат, працаваў у Агенцтве ЗША па глабальных медыях у Вашынгтоне, выкладае ў Еўрапейскім каледжы ў Варшаве, удзельнічаў у праектах дакументальных фільмаў, кінаспектакляў, фільмаў.

1989 год. Упершыню на альтэрнатыўнай аснове ў СССР адбыліся выбары народных дэпутатаў.

Сярод абраных ад БССР (усяго больш за 20) – пісьменнік Алесь Адамовіч (1927–1994), дзяцінства і юнацкасць якога прайшла ў п. Глуша Бабруйскага раёна. У Глушы 9 лістапада 2019 года ўсталяваны помнік А. Адамовічу.

У дэпутаты ВС СССР балатаваўся і А. Лукашэнка, але прайграў В. Кебічу.

1995 год. Пачынае дзейнічаць Шэнгенскае пагадненне.

Пагадненне аб скасаванні пашпартнага і мытнага кантролю шэрагу дзяржаў Еўрапейскага Саюза.

Першапачаткова падпісана 14 чэрвеня 1985 года пяццю еўрапейскімі дзяржавамі (Бельгіяй, Нідэрландамі, Люксембургам, Францыяй, Германіяй). Уступіла ў сілу 26 сакавіка 1995 і спыніла існаванне 1 мая 1999 года, замешчана Шэнгенскім заканадаўствам ЕС.

Сукупная тэрыторыя дзяржаў, якія цалкам ўжываюць Шэнгенскае заканадаўства, і ўдзельнікаў дэ-факта, за вылікам выняткаў складае так званую Шэнгенскую зону, гэта значыць, прастору, на якой перамяшчэнне людзей адбываецца максімальна бесперашкодна, без праводжанага на пастаяннай аснове пашпартнага кантролю.

На сёння ў Шэнгенскай зоне 26 краін.

«Ім гэта падабаецца!». Магілёўскіх студэнтаў кінулі ў палі на моркву, а вучоба іх чакае

У медыйнай прасторы адшукаць публікацыі, ці выпраўляюць студэнтаў Гарвардскага, ці Кембрыджскага ўніверсітэтаў дапамагаць мясцовым фермерам не ўдалося.

А вось, у восеньскую пару ўбачыць беларускіх навучэнцаў на «калгасных палетках» звыклая справа. Тое паўтараецца з году ў год. Адпраўка студэнтаў у палі ўспрымаецца як будзённасць і штораз падкрэсліваецца: «моладзевы дэсант працуе з ахвотаю».

«Хлопцы і дзяўчаты старанныя, працуюць не горш за дарослых, і не чакаюць патуранняў. Да таго ж разумеюць, што ад асабістага ўкладу залежыць агульны канчатковы вынік», – цытуе працаўніка прыгараднай гаспадаркі «Кадзіна» рэсурс Mogilevnews.by.

На тутэйшыя палі «кінулі» студэнтаў Беларускага дзяржаўнага ўніверсітэту харчовых і хімічных тэхналогіяў ды навучэнцаў Магілёўскага дзяржаўнага політэхнічнага каледжу.

«Кожны год нашы студэнты з задавальненнем ездзяць на ўборку гародніны. Ім гэта падабаецца», – настойвае выкладчык кафедры фізічнага выхавання і спорту ўніверсітэту харчавання Алег Арлоў.

Колькі заробяць за працу студэнты высветліць не ўдалося.

А, ці падабалася чытачам Магілёў.media «гнуцца» у палях замест вучобы? Вашы ўражанні і згадкі пра мінулае абавязкова апублікуем. Допісы чакайма ў skrynia@mogilev.media.

фота: mogilevnews.by

Горацкая сельгасакадэмія апратэставала артыкул незалежнага СМІ пра п’янства яе студэнтаў

Навучэнцы акадэміі п’юць па вечарах на беразе ракі Аршанкі, ламаюць таблічкі і разносяць клумбы – суд пастанавіў абвергнуць гэтую інфармацыю.

Артыкул пра праблемы на адным з самых папулярных пляжаў у Горках выйшаў на старонках незалежнага медыярэсурса horki.info гэтым летам. У матэрыяле пад назвай “Выяснили, что нового в этом году на любимой Оршанке, и как работается спасателям” журналісты рэгіянальнага СМІ далі слова старшаму матросу-выратавальніку Сяргею Кажэка. Ён эмацыйна распавёў выданню пра асноўныя цяжкасці, з якімі сутыкаецца выратавальная служба падчас працы на месцах адпачынку.

Сярод іншага, Сяргей Кажэка выказаўся пра паводзіны маладых людзей, якіх ён ідэнтыфікаваў як студэнтаў Горацкай сельгасакадэміі. Прыводзім урывак з абскарджанага матэрыялу з захаваннем мовы і правапісу арыгіналу.

“…самая большая проблема – это студенты. – заявіў выратавальнік Сяргей Кажэка – Они частенько устраивают на берегу пивной бар. На замечания реагируют безразличием, и это в лучшем случае. Чаще вступают в дискуссию, “качают права”, могут даже отправить по известному адресу… Как правило, они приходят ближе к девяти вечера, пьют, едят, развлекаются. По утрам после таких компаний матросы находят на берегу сломанные таблички, мусор, женские туфли, белье. За прошлую неделю они выкопали и сожгли прямо на пляже ограждение наших клумб из автопокрышек. Свернули набок козырек беседки. Пытались вытянуть и передвинуть подальше ограничительные буйки в воде. …ректорат по воспитательной работе нашей академии – займитесь своими студентами. Держать их в рамках просто уже нет сил…”

У адказ на гэтую публікацыю адміністрацыя ўстановы адукацыі “Беларуская дзяржаўная ордэнаў Кастрычніцкай рэвалюцыі і Працоўнага Чырвонага Сцяга сельскагаспадарчая акадэмія” падала ў суд Горацкага раёна Магілёўскай вобласці позву аб абароне дзелавой рэпутацыі.

Горацкі суд вынес рашэнне “прызнаць не адпаведнымі рэчаіснасці і якія ганяць дзелавую рэпутацыю ўстановы адукацыі “Беларуская дзяржаўная ордэнаў Кастрычніцкай рэвалюцыі і Працоўнага Чырвонага Сцяга сельскагаспадарчая акадэмія”” звесткі з матэрыяла horki.info. Адпаведны артыкул незалежнае СМІ размясціла на сваім сайце, а публікацыю “Выяснили, что нового в этом году на любимой Оршанке, и как работается спасателям” адрэдагавала, прыбраўшы адтуль пасаж выратавальніка пра студэнтаў.


horki.info – гэта незалежны рэгіянальны рэсурс, які асвятляе навіны Горацкага, Дрыбінскага і Мсціслаўскага раёнаў Магілёўскай вобласці, а таксама Горацкай сельгасакадэміі. Сайт працуе з 2007 года, а таксама журналісты партала выдаюць папяровую версію, газету “УзГорак”, якая вольна прадаецца ў паштовых аддзяленнях рэгіёна.


Фота: horki.info

Магілёўскія ВНУ не дабралі больш за чатырыста студэнтаў

Не стае студэнтаў на бюджэтным і платным навучанні. Бракуе навучэнцаў ва ўстановах сярэдняй спецыяльнай адукацыі. 

Не выканалі плану прыёму на платнае навучанне 4 дзяржаўныя ўстановы вышэйшай адукацыі і 1 прыватная. Недабор сягнуў 337 чалавек. 32 месцы засталіся вакантнымі ў 2 установах сярэдняй спецыяльнай адукацыі вобласці, піша рэсурс «Golk.by», спасылаючыся на звесткі Камітэту дзяржаўнага кантролю.

Паводле іх, кантрольныя лічбы прыёму на навучанне за кошт сродкаў бюджэту не выканалі 2 дзяржаўныя ўстановы вышэйшай адукацыі. Недабор у цэлым склаў 86 чалавек. 75 чалавек недабрала 1 установа сярэдняй спецыяльнай адукацыі вобласці.

Ва ўступных іспытах у 5 дзяржаўных установах вышэйшай адукацыі Магілёўскай вобласці на бюджэтныя формы навучання (вочную і завочную) узялі ўдзел 3147 абітурыентаў пры плане набору 2548 чалавек, на 1161 платнае месца прэтэндавалі 913 чалавек.

У беларускіх універсітэтах зноў прымаюць абітурыентаў на бюджэт – недабор па ўсёй краіне

Вакантныя месцы на бясплатнае навучанне амаль у кожным універсітэце. Сярод магілёўскіх ВНУ вылучаецца ўніверсітэт імя Куляшова – тут колькасць заявак ад абітурыентаў на дзённы бюджэт перавышае колькасць вакантных месцаў па ўсіх спецыяльнасцях.

Беларуска-Расійскі універсітэт і універсітэт харчовых і хімічных тэхналогій абвясцілі пра дадатковы прыём на бюджэтныя месцы. 

Так, у БРУ ёсць вольныя месцы па спецыяльнасцях аўтамабілебудаванне (6 вакансій), інавацыйная тэхніка для будаўнічага комплексу (16), тэхналагічнае абсталяванне машынабудаўнічай вытворчасці (17), абсталяванне і тэхналогіі высокаэфектыўных працэсаў апрацоўкі матэрыялаў (13), абсталяванне і тэхналогія зварачнай вытворчасці (3), аўтамабільныя дарогі (9), метады і прыборы кантролю якасці і дыягностыкі стану аб’ектаў (10).

У Беларускім універсітэце харчовых і хімічных тэхналогіяў ёсць таксама вакансіі – яна на фота.

 

Магілёўскія ўніверсітэты павысілі кошт платнага навучання амаль на 10%

Плату за навучанне павысілі ўніверсітэт імя Куляшова і Беларуска-расійскі ўніверсітэт. Тое вядома са звестак апублікаваных на сайтах навучальных устаноў.

Зусім нядаўна MOGILEV.MEDIA паведамляў актуальныя звесткі пра кошты навучання ў галоўных ВНУ Магілёўшчыны. А ў другой палове ліпеня гэтыя расцэнкі ўжо істотна выраслі. Калі дакладней – на 9,1%.

Навучанне на эканамічных спецыяльнасцях, сацыяльных камунікацыях, псіхалогіі, правазнаўстве і кіраванні інфармацыйнымі рэсурсамі ў Магілёўскім дзяржаўным універсітэце імя Куляшова каштавала першакурснікам 3 626 рублёў, то з 18 ліпеня гэты кошт вырас да 3 988 рублёў.

Тое ж тычыцца студэнтаў 1 курсу гэтага ўніверсітэту па астатніх спецыяльнасцях – рост з 3 501 рубля да 3 851 за год навучання.

Ідэнтычны рост заўважаны ў Беларуска-Расійскім універсітэце – першакурснікі па эканамічных спецыяльнасцях маюць аплаціць за год 3 728 рублёў, замест 3 389. На тэхнічных спецыяльнасцях кошт вырас з 3 324 да 3656.

 

Колькі студэнтаў з’явіцца ў Магілёве? ВНУ сталі прымаць дакументы

Вышэйшыя навучальныя ўстановы краіны разлічваюць прыняць сёлета блізу 53 тысяч абітурыентаў. Магілёўскія — каля 3 600 студэнтаў, як на дзённую, так і завочную формы навучання.

Самы буйны прыём запланаваны ў «Беларуска-Расійскі універсітэт» – 1370 чалавек, 935 з якіх – дзённікі.

Другі радок па колькасці чаканых студэнтаў займае Магілёўскі дзяржаўны ўніверсітэт імя А.А. Куляшова – 912 чалавек, 555 з іх на дзённае навучанне.

550 студэнтаў чакае Інстытут Міністэрства ўнутраных спраў. Універсітэт харчавання разлічвае прыняць 445 чалавек, 100 з якіх – завочнікі.

У магілёўскім філіяле «БІП – Універсітэт права і сацыяльна-інфармацыйных тэхналогіяў» плануецца прыём 40 студэнтаў.

Залічэнне на бюджэтную форму навучання павінна завяршыцца да 4 жніўня, пасля чаго будзе этап дадатковага набору на бюджэт з 5 па 7 жніўня. Прыём дакументаў на платную форму навучання таксама стартуе 18 ліпеня і працягнецца да 10 жніўня.

 

У Магілёве прайшла масавая ранішняя зарадка – сагналі школьнікаў і студэнтаў

Сярод зорак на мерапрыемстве была дыскваліфікаваная за допінг Аксана Мянькова.

Ранішняя гімнастыка, якую арганізатары заяўлялі як «народную», прайшла 23 чэрвеня ў 10.00 на Плошчы Зорак у Магілёве. Большасць яе ўдзельнікаў былі студэнтамі, школьнікамі і нават дашкольнікамі, паведамляюць «Магілёўскія ведамасці».

Усяго ў мерапрыемстве прынялі ўдзел каля 100 чалавек.

Сярод VIP-персон на зарадку былі запрошаныя прызёрка еўрапейскіх чэмпіянатаў па каратэ Марыя Фурсава і лёгкаатлетка Аксана Мянькова. Апошнюю пазіцыянавалі як алімпійскую чэмпіёнку, хоць яна была пазбаўленая залатога медаля гульняў у Пекіне 2008 года і дыскваліфікаваная за допінг – прычым не толькі за пекінскія гульні, але і за наступныя, у Лондане 2012 года.

 

9 тысяч беларускіх студэнтаў вучацца за мяжой. У беларускіх ВНУ іншаземцаў – 27 тысяч

У Беларусі вучацца расіяне, кітайцы, выхадцы з паўднёва-ўсходняй Азіі ды з краін постсавецкай прасторы. Туркменаў паменела.

У нашых ВНУ атрымліваюць веды 2155 грамадзян Расіі. У той жа час у суседняй краіне беларускіх грамадзян – 9 тысяч. Усяго ж замежнікаў вучацца ў краіне – 27 тысяч.

Прыкладам інтэграцыі адукацыйных прастор Беларусі і Расійскай Федэрацыі называюць адзін з магілёўскіх універсітэтаў.

Паводле газеты «СБ. Беларусь сегодня», універсітэты Беларусі і Расіі рэалізуюць 15 сумесных адукацыйных праграм. Узаемадзеянне ў адукацыйнай сферы ажыццяўляецца з 73 рэгіёнамі Расійскай Федэрацыі.

Прыкладам інтэграцыі адукацыйных прастор Беларусі і Расійскай Федэрацыі лічыцца Беларуска-Расійскі ўніверсітэт, які знаходзіцца ў Магілёве. Гэта дзяржаўная ВНУ ў сумесным вядзення дзвюх краін.

Таксама ў Беларусі функцыянуюць два расійскія філіялы, якія вядуць адукацыйную дзейнасць паводле заканадаўства Расійскай Федэрацыі і расійскім адукацыйным стандартам з выдачай дыпломаў расійскага ўзору. Гаворка пра філіял Расійскага дзяржаўнага сацыяльнага ўніверсітэта і Мінскім філіяле Расійскага эканамічнага ўніверсітэта імя Г.У. Пляханава.

 

Замежныя студэнты за навучанне плацяць удвая больш за беларусаў

На кастрычнік 2021 году ўсяго ў Беларусі вучылася 27 тысяч замежнікаў. Паводле прадстаўніка міністэрства адукацыі Сяргея Каспяровіча сярод замежных студэнтаў пераважаюць прадстаўнікі з постсавецкіх краінаў. Ёсць кітаўцы і студэнты з паўднёва-ўсходняй Азіі.

Па словах урадоўцы раней шмат вучылася грамадзян з Туркменістану, але гэты кантынгент студэнтаў паволі амаль знік.

Замежнікі за навучанне плацяць больш за беларусаў. Паводле Каспяровіча ніжняя мяжа па кошце за год складае крыху больш за $1 тыс. – $1,2 тыс. Верхняя – $1,5 – 1,6 тыс.

«Калі мы гаворым аб замежных грамадзянах, то тут кошт вышэйшы ў два разы, у асобных выпадках – у два з паловай разы, чым для беларускага грамадзяніна», – даводзіць прадстаўнік міністэрства адукацыі.

У медычных ВНУ, – дадае ён, – дзе з-за спецыфікі затраты на навучанне вышэйшыя, плата за навучанне замежных грамадзян можа даходзіць і да $5 тыс. у год.

фота: belta.by 

Былыя студэнты скардзяцца, што без адмысловага дазволу не могуць адведаць універсітэт Куляшова. Пра ўведзеныя абмежаванні інфармацыі няма

Былыя студэнты Магілёўскага дзяржаўнага ўніверсітэту на сустрэчах выпускнікоў не могуць зайсці на свае факультэты. Яны цвердзяць, што наведванне аўдыторый і спатканні з выкладчыкамі абкладзена мноствам бюракратычных працэдур, што робіць такія візіты ў родную альма-матар амаль немагчымымі.

Паведамленні ў сацыяльных сетках пра колькасць неабходных дакументаў на тое, каб наведаць аўдыторыі выглядаюць непраўдападобнымі. Выпускнікі ж настойваюць на сваім.

«Мы пасля кавіду вырашылі адзначыць 50 гадоў нашага выпуску. – адна з былых студэнтак. – Радасныя пайшлі ў будынак, але нас банальна не пусцілі. Патрэбны, нібыта, быў дазвол самаго рэктара! У ранейшыя нашы сустрэчы падобных праблемаў не было. Мы, вядома ж, пасядзелі, пагаварылі, але па-за сценамі ўніверсітэту. У ім нас цяпер прымаюць за чужынцаў».

Студэнты іншага факультэту вырашылі загадзя паклапаціцца і атрымаць дазвол. Ім прапанавалі напісаць на імя рэктара заяву, у якой указаць:

 – усе пашпартныя дадзеныя выпускнікоў,

 – напісаць нумары аўдыторый, у якія ім трэба зайсці, і аргументаваць іх,

 – напісаць спіс выкладчыкаў, з якімі яны будуць сустракацца і прычыны выбару менавіта гэтых выкладчыкаў,

 – прадставіць план правядзення мерапрыемства…

«Там былі яшчэ нейкія паперкі, але мы слухаць далей не сталі. Не ўнівер, а рэжымная ўстанова. Нібы ў турме. Пастаім каля ўнівера, пройдземся па горадзе, потым дзе-небудзь пасядзім. А кіраўніцтву МДУ перакажыце наша палымянае прывітанне», – іранічна выказваецца выпускнік 1992 года.

Пра падобныя патрабаванні да выпускнікоў у іншых магілёўскіх універсітэтаў чуць не даводзілася. У іх усё праходзіць без лішніх бюракратычных працэдур.

Спраўдзіць нараканні былых студэнтаў у адміністрацыі ўніверсітэту не ўдалося. На сайце навучальнай установы адшукаць дакументы, якія рэгламентуюць парадак яе наведвання таксама.