Category: Навіны Магілёва

“Ляціць пыл, бруд” – жыхары Палыкавіч-2 скардзяцца на завод па вырабе падгузнікаў

Навіна ад

Іншыя насельнікі вёскі пад Магілёвам не бачаць праблемы ў суседстве з новай вытворчасцю.

Паведамленне пра забруджванне паветра заводам БелЭмса, размешчаным у Палыкавічах-2 паявіліся на беларускіх інтэрнэт-рэсурсах. У кароткім роліку чутна, як дзве жыхаркі паселішча абмяркоўваюць завод па вытворчасці падгузнікаў. 

“Ляціць пыл, бруд. Адыходы вытворчасці” – кажуць жанчыны за кадрам, а адзін з мясцовых жыхароў дадае:

– Не адзін месяц ужо завод працуе без фільтраў. Мой дом знаходзіцца прыкладна ў 300 метрах ад гэтага завода. На машыне ўвесь час адчуваюцца валокны, стаіць непрыемны саладкавы пах. Куды звяртацца, незразумела. 

Журналісты Магілёў.media пабывалі ў Палыкавічах-2 і могуць пацвердзіць, што незвычайны саладкаваты водар лунае ў паветры паблізу вытворчасці. Аднак сустрэтыя намі мясцовыя жыхары адверглі падазрэнні наконт завода падгузнікаў.

– Тут нічога не вытвараецца хімічнага. – запэўнілі двое мужчын сталага веку, што праходзілі міма БелЭмса – Тут падгузнікі толькі шыюць, збіраюць, а сюды ўжо прывозяць гатовую сыравіну. А пахне – гэта, можа, ад газавай станцыі?

Разам з тым, пачынаючы з 2020 года кампанія БелЭмса заяўляла, што акрамя дзіцячых падгузнікаў запускае новую вытворчую лінію па вырабе медыцынскіх масак. Гэтая лінія праектавалася як вытворчасць поўнага цыклу, а гэта азначае, што вытворчасць матэрыялаў для гатовай прадукцыі таксама ажыццяўляецца на прадпрыемстве. Медыцынскія маскі вырабляюцца на чатырох тэхналагічных лініях прадпрыемства. А ў 2022 годзе БелЭмса запусціла вытворчасць новага віду прадукцыі – падгузнікаў-трусікаў для дзетак.

Кампанія “БелЭмса” зарэгістравана ў свабоднай эканамічнай зоне “Магілёў” у 2011 годзе. Заснавальнікам і інвестарам прадпрыемства выступіла турэцкая кампанія Ucar Grup. 70 працэнтаў прадукцыі экспартуецца, яна пастаўляецца ў 18 краін свету. Пераважна, гэта падгузнікі гандлёвай маркі “Senso”.

Жанчына з двумя праміле алкаголю везла на машыне трох сваіх дзяцей у Магілёве

Навіна ад

Пасварыўшыся з мужам, яна вырашыла з’ехаць да маці каля апоўначы.

– Прабачце мяне, я толькі атрымала правы – 

спрабавала жанчына ўгаварыць супрацоўнікаў ДАІ. 

Ролік пра затрыманне нецвярозай кіроўцы размясціла на сваім Тэлеграм-канале прэс-служба абласнога УУС. У паведамленні гаворыцца, што 28 верасня на вуліцы Першамайскай нарад ДАІ спыніў 34-гадовую магіляўчанку за рулём аўтамабіля Fiat. Пры праверцы дакументаў у інспектара ДПС узнікла падазрэнне, што жанчына напярэдадні выпівала спіртное.

Пры гэтым на заднім сядзенні яе аўтамабіля знаходзіліся дзеці ва ўзросце 3-х, 5-ці і 7-мі гадоў. Як патлумачыла жанчына, напярэдадні яна пасварылася з мужам і ехала з дзецьмі да сваёй маці.

Лепшага кіроўцу смеццявоза Магілёўшчыны абяруць 30 верасня

Навіна ад

У Магілёве ўжо шосты раз пройдзе конкурс прафесійнага майстэрства “кіроўца смеццявоза”. У ім прымаюць удзел работнікі ўсіх прадпрыемстваў ЖКГ вобласці.

Спаборніцтвы накіраваны на павышэнне прафесійнага майстэрства ўдзельнікаў і прэстыжу прафесіі “вадзіцель смеццявоза”, паляпшэнне навыкаў якаснай эксплуатацыі аўтатэхнікі. Для ўдзелу ў спаборніцтве дапушчаны вадзіцелі, якія не маюць парушэнняў працоўнай і вытворчай дысцыпліны, а таксама дарожна-транспартных здарэнняў за апошнія 12 месяцаў.

Удзельнікам па традыцыі прыходзіцца спаборнічаць і ў тэорыі і на практычных занятках. Напачатку ў канкурсантаў правераць веданне правіл дарожнага руху і прылад аўтамабіля. 

А вось практычны этап прадугледжвае дэманстрацыю навыкаў кіравання аўтамабілем-смеццявозам. Праверка навыкаў ваджэння будзе складацца з праходжання элементаў “габарытная змейка”, рух па габарытным тунэлі, пастаноўка аўтамабіля заднім ходам у бокс, пад’езд з аднаго тармажэння да “планкі” – да яе дотыку пярэднім бамперам – а таксама дыяганальная паркоўка і выкананне пагрузкі кантэйнера.

Пляцоўкай спаборніцтваў стане абласная арганізацыйная структура ДТСААФ.

Якія прызы атрымаюць пераможцы, пакуль не абвешчана, але вядома, што дыпломы і каштоўныя падарункі будуць ад Магілёўскай абласной арганізацыі Беларускага прафсаюза работнікаў мясцовай прамысловасці і камунальна-бытавых прадпрыемстваў. У ранейшыя гады пераможцы атрымоўвалі яшчэ і надбаўку да службовага акладу памерам у 15% за 1 месца, 10% – за другое, 5% – за трэцяе. 

Першым на Магілёўшчыне распачаў ацяпляльны сезон Бабруйск. Загад на ўключэнне ацяплення з 29 верасня аддадзены і ў Магілёве

Навіна ад

Тым часам з-за прамаруджвання ўладаў, у паліклініках фіксуецца рост захворванняў.

Магілёўскія і бабруйскія чыноўнікі нарэшце адрэагавалі на крытыку і ўключаюць ацяпленне. У Магілёве пакуль сістэма будзе працаваць у рэжыме прагравання, бо тэмпература паветра яшчэ не апусцілася ніжэй за 10 градусаў Цэльсія. Чарга за райцэнтрамі.

Магілёў перадапошнім з абласных цэнтраў вырашыў уключыць сістэму ацяплення. Гродна і Брэст зрабілі гэта ўчора, а Мінск пачаў падключэнне яшчэ 20 верасня.

Падобна на тое, што крытыка незалежных медыа і скаргі гараджан падзейнічалі на нашых чыноўнікаў. Хаця, магчыма, ім проста самім стала халодна? 

 З-за прамаруджвання з уключэннем ацяплення магілёўскія паліклінікі фіксуюць устойлівы і хуткі рост захворванняў гараджан. Пакуль улады чакалі прыкладу ад іншых гарадоў краіны, з-за холаду ў кватэрах восеньская ўспышка рэспіраторных пачалася звышпаспяхова для вірусаў.

Выхавацелька магілёўскага дзіцячага садка ўгаварыла калег узяць для яе крэдытаў на 14 000 рублёў

Навіна ад

Усе трое атрымалі лісты аб нявыплаце з банкаў. 

Тры супрацоўніцы дзіцячага садка ў Магілёве звярнуліся ў міліцыю з адной і той жа гісторыяй. Яны распавялі, што калега, памочнік выхавацеля, угаварыла іх аформіць на сябе крэдыты на агульную суму каля 14 000 рублёў, абяцаючы выплочваць унёскі. Да таго ж адна з жанчын перадала фігурантцы здарэння каля 250 еўра, якія тая так і не змагла вярнуць.

Атрымаўшы крэдытныя карткі растэрміновак, жанчына рабіла пакупкі, набываючы бытавую тэхніку, прадметы інтэр’еру, адзенне і прадукты харчавання. Пасля аплачваць даўгі яна не спяшалася – у выніку на чужых картах раслі працэнты, якія ніхто не пагашаў.

Праз некаторы час работніцам садка, якія ўзялі на сябе крэдыты, прыйшлі лісты з банкаў аб нявыплаце.

Цяпер у дачыненні да фігуранткі следчымі ўзбуджана крымінальная справа.

Мядзведзі запаланілі лясы Магілёўшчыны? Разбіраемся

Навіна ад

Памятаеце відэа з Бялыніцкага раёна, калі трактарыст засняў бойку двух медзвядзёў на лясной дарозе? Гэта адбылося каля вёскі Карытніца Бялыніцкага раёна, за 60 кіламетраў ад Магілёва. Але яшчэ зусім нядаўна мядзведзі не жылі на Магілёўшчыне.

Відэа можна пабачыць тут.

Яшчэ зусім нядаўна вучоныя лічылі, што на ўсёй тэрыторыі Беларусі жыве не болей за 80-100 мядзведзяў і не меней за 40. І гэта на тэрыторыю ў 207,6 тысяч квадратных кіламетраў. Меркавалася, што мядзведзь часам нават не мог знайсці сабе мядзведзіцу.

А на тэрыторыю Магілёўскай вобласці ў 2000-х гадах мядзведзі толькі заходзілі – з Бярэзінскага запаведніка і з Браншчыны. 

Але на працягу 2020-2022 гадоў колькасць сустрэч людзей з мядзведзямі па Беларусі павялічалася ў дзясяткі разоў. Такія сустрэчы зафіксаваны і на Магілёўшчыне.

Калі падлічылі, то ахнулі

Так, 13 жніўня 2021 года ў розных СМІ паведамлялася, што  400 кілаграмовы мядзведзь выйшаў у поле, а потым залез на лецішча ў в. Галубаўка Магілёўскага раёна. 

6 ліпеня 2022 года паведамлялася пра фіксаванне драпежніка каля в. Шапялевічы-Падар Круглянскага раёна. 

Аб яшчэ 4-5 сустрэчах у гэтым годзе распавядалі грыбнікі, якія не мелі магчымасці сфатаграфаваць мядзведзя.

Апошняе нападзенне мядзведзя на чалавека зафіксавана вясной 2018 года ў Віцебскім раёне. 

Мядзведзі фіксуюцца фота- і відэакамерамі ва ўсіх абласцях краіны.

Апошнія 20 гадоў колькасць чырвонакніжнх мядзведзяў не падлічвалі. А калі падлічылі ў 2021 годзе, то ахнулі. Іх аказалася не ад 40 да 100, а аж 580.

Вучоныя лічаць, што праз 5-6 гадоў іх колькасць дасягне 1000.

Мядзведзяў мяркуюць выключыць з Чырвонай кнігі

Начальнік аддзела паляўнічай гаспадаркі Міністэрства лясной гаспадаркі Аляксандр Казарэз распавядае: “Мы прапануем выключэнне з Чырвонай кнігі і дазвол палявання. Не таму, што мы такія тут усе крыважэрныя і жадаем мядзведзяў страляць. Мядзведзь наш, беларускі, з трафейнага пункта гледжання слабенькі, небуйны, для паляўнічых асаблівай цікавасці не ўяўляе. Ён расце кілаграмаў да 130–200. Для параўнання: на ўсходзе Расіі ёсць асобіны па 500-600 кілаграмаў, гэта значыць наш – малютка. Таму мы гаворым пра паляванне толькі з пункту гледжання кіравання рэсурсам”.

Буры мядзведзь жыве пераважна ў старых, глухіх лясах, якія чаргуюцца з балотамі, высечкамі і поймамі рэк.

 

Памёр магілёвец Барыс Маісееў

Навіна ад

Яму было 68 гадоў, нядаўна артыст перанес інсульт.

Цела спевака знайшоў яго арт-дырэктар Сяргей Гарох у кватэры спевака на Чырвонапралетарскай вуліцы. Сяргей Гарох прыйшоўшы праведаць Барыса Маісеева пасля нядаўна перанесенага інсульту. Убачыўшы артыста без прытомнасці, ён выклікаў хуткую, але лекарам заставалася толькі канстатаваць смерць.

Барыс Маісееў нарадзіўся 4 сакавіка 1954 года ў Магілёве, у жаночай папраўчай калоніі. У Магілёве ён скончыў школу, пасля якой з’ехаў у Мінск вучыцца ў харэаграфічным вучылішчы. Кар’ера Маісеева пачыналася з танцавальнага трыа “Экспрэсія”, што было заснавана артыстам у 1978 годзе. За часы танцавальнай і сольнай кар’еры спевака Барыс Маісееў стаў адной з самых пазнавальных зорак постсавецкай эстрады.

Машына правалілася ў ліўнёвы калодзеж на праезжай частцы ў цэнтры Магілёва

Навіна ад

Кіроўцы – будзьце асцярожныя!

Аўтамабіль Skoda Kodiaq рухалася па вуліцы Тані Карпінскай у бок спуску да Дубравенкі, калі адбылося незвычайнае здарэнне. Рашотка ліўнёўкі не вытрымала, альбо, магчыма, наогул адсутнічала на праезжай частцы. У выніку аўтамабіль праваліўся правым пярэднім колам у калодзеж, без магчымасці рухацца далей – задняе левае кола бездапаможна завісла ў паветры.

На месцы працуюць супрацоўнікі дарожнай аўтаінспекцыі.

Адзначым, што здарэнне адбылося ў пары сотнях метраў ад гарвыканкама.

 

На Магілёўшчыне збіраюць у шэсць разоў больш ураджаю сёлета, чым летась

Навіна ад

У мінулым годзе на гэты час сярэдняя ўраджайнасць гародніны складала 59 цэнтнераў з гектара, а ў гэтым годзе – 361. 

Усяго на Магілёўшчыне дзяржаўныя сельгаспрадпрыемствы сабралі ўраджай з 21% засяваных плошчаў – паведамляюць “Магілёўскія ведамасці”. Агульны збор гародніны дасягнуў 4674 тон і значна пераўзыходзіць паказчык 2021 года – 2622 тоны.

Ураджайнасць у прыватных гаспадарках не паддаецца строгаму статыстычнаму аналізу, аднак малаверагодна, што там яна істотна адрозніваецца ад названых паказчыкаў.

Сярэдняя ўраджайнасць зерневых культур сёлета па Беларусі таксама была вышэй за леташнюю.

Тэатр лялек паставіць “Магілу льва”, прэм’ера запланаваная на 29 лістапада

Навіна ад

Над спектаклем працуе новы рэжысёр-пастаноўшчык магілёўскага абласнога тэатра лялек Марыя Гуцава. Для яе прэм’ера стане першым праектам на магілёўскай сцэне – Гуцава толькі ў гэтым годзе скончыла Беларускую дзяржаўную акадэмію мастацтваў па спецыяльнасці рэжысёр тэатра.

– Я родам не з Магілёва, таму спектакль стане своеасаблівым знаёмствам з гэтай зямлёй – расказала Марыя Гуцава ў інтэрв’ю БелТА – Праца будзе цікавая і карэнным жыхарам, якія, упэўнена, даведаюцца шмат новага з гісторыі горада: якія людзі тут жылі, чым займаліся, пра што марылі і як любілі. Найперш гэта будзе спектакль пра чалавека і для людзей. 

У тэатры лялек лічаць, што прэм’ера будзе напоўнена глыбокім філасофскім сэнсам. Яна прапануе гледачу адказаць на пытанні: хто мы і куды зараз ідзём, ці ведаем і ці памятаем гісторыю сваёй зямлі? 

– Каб адказаць на гэтыя пытанні – дадалі ў тэатры – трэба вярнуцца да сваіх каранёў, звярнуцца да гісторый з жыцця нашых продкаў, якія захавалі шмат цікавага. Напрыклад, паданне аб легендарным асілку Машэку, якога здрада ператварыла ў раз’юшанага ў адносінах да несправядлівасці льва. 

У музычным афармленні прымае ўдзел вядомы магілёўскі музыка Андрусь Палаўчэня і гурт “Osimira”.