Category: навіна дня

Уладзімір Цумараў сышоў з пасады мэра Магілёва: актыў і пасіў былога граданачальніка

Навіна ад

Былы мэр за 9 гадоў працы пакінуў пасля сябе разнастайную спадчыну. Паспрабуем падвесці першыя вынікі, бо шмат што па-сапраўднаму выявіцца значна пазней. Тым не менш, падаецца, што Віктар Шорыкаў і Уладзімір Цумараў – два прэтэндэнты на званне лепшага старшыні гарвыканкама часоў незалежнасці. 

Напачатку трэба сказаць, што крытыкаваць дзейнае начальства за памылкі і хваліць яго ж за добрыя справы пасля сыходу ў адстаўку – добры тон і нават норма ў дэмакратычным грамадстве. Падлізнікі ж робяць усё наадварот: яны лісліва хваляць чалавека, пакуль ён на высокай пасадзе, і аблайваюць яго адразу пасля сыходу. Сёння час калі крытыкаваць ужо позна, а час усхваляць яшчэ не прыйшоў. Можна казаць аб’ектыўна. 

Цумараў не быў белым і пухнатым. Яго часцяком крытыкавалі за аддаленасць ад патрэб простых людзей, за панскасць у пэўных сітуацыях, за праз калена зробленыя нават добрыя праекты, за гэтыя кіламетры тратуарнай пліткі… За што толькі яго не крытыкавалі. 

Але Цумарава ж хвалілі за інфраструктурныя пераўтварэнні ў горадзе, за тое, што не саромеўся быць проста чалавекам, падпяваў артыстам на канцэртах, як мэр быў дастаткова даступным і адкрытым і г.д.

Тут важна адзначыць і ўсведамляць, што ганебнай мянушкі да яго не прыклеілася. А гэта пра многае кажа. 

Што ж змянілася ў горадзе за гады яго кіравання? За што мы можам сказаць яму дзякуй? 

Актыў Цумарава: 

Першае, што згадваецца, гэта парк “Падміколле”. Сапраўднае дзецішча мэра. Мала хто здзівіцца, калі нейкі аб’ект у парку будзе праз шмат гадоў названы ягоным імем. 

Па другое, гэта масты. Усе магілёўскія масты праз Дняпро былі адрамантаваны пры ім, як і большасць іншых маставых пераходаў горада. Гэта было складана, патрабавала шматлікіх узгадненняў і вельмі значна. А ільвы на Пушкінскім мосце – нібыта напамін пра гэта. 

Рамонт дарожнага покрыва і разгрузка цэнтра горада  ад транспартных патокаў.  Адкрытая новая дарога-дублер для вуліцы Якубоўскага і Загараднай шашы. Капітальна адрамантаваныя Першамайская і Крупская і г.д. 

Мноства пешаходных дарожак у гады яго кіравання Магілёвам былі пабудаваны або адрамантаваны. 

Пасіў Цумарава: 

Парк “Падміколле” створаны без уліку прапаноў краязнаўцаў і эколагаў. У некаторых парк выклікае ўражанне безгустоўнай мешаніны розных стыляў, у той час як сапраўдныя каштоўнасці Падміколля былі груба выкарчаваныя. Бульдозерамі руйнавалі падмуркі старажытных камяніц. Мяшалі з брудам культурны слой. З-за неахайнай працы экскаватараў унікальныя дрэвы ў парку ссохлі. 

Так і не была створана сетка веладарожак. А тыя, што з’явіліся, праходзяць выключна ля буйных транспартных трас і экалагічна шкодныя для веласіпедыстаў. 

Бюджэтныя сродкі марнаваліся на тратуарную плітку, літаральна ўкапваліся ў зямлю, хаця маглі б быць выдаткаваны больш рацыянальна. Гранітная плітка на плошчы Славы ламаецца падчас кожнай уборкі снегу, тады як павінна была б быць доўгавечнай.

Няўлік думак жыхароў пры правядзенні рэканструкцый мікрараёнаў. Але, трэба прызнаць, што апошняя праблема носіць сістэмны характар і не магла быць вырашана ў рамках аднаго асобна ўзятага горада. 

Як бачым, пасля Цумарава засталіся дасягненні, пра якія можна казаць. Ад папярэдняга яму мэра гораду не засталося нічога, за выключэннем разбітых дарог. Сур’езна параўноўваючы значэнне розных мэраў горада, многія магілёўцы прыходзяць да высновы, што Віктар Шорыкаў і Уладзімір Цумараў – прэтэндэнты на званне лепшага старшыні гарвыканкама часоў незалежнасці. Пры іх шмат чаго было зроблена. 

Так што дзякуй, Уладзімір Міхайлавіч. Здароўя вам і плёну ў жыцці. 

Дзень у гісторыі. 4 кастрычніка. Запушчаны першы спадарожнік Зямлі. ВКЛ перайшло на грыгарыянскі каляндар. Гадавіна гібелі Пятра Машэрава

Навіна ад

Сусветны дзень абароны жывёл (з 1931 года). 

Адзначаецца ў дзень смерці ў 1223 годзе святога Францішка, апекуна жывёл. 

Мэта дня – прыцягнуць увагу зямлян да неабходнасці гуманнага і адказнага стаўлення да жывёл, цяжкага становішча жывёльнага свету на нашай планеце.

Штогадзіны на Зямлі беззваротна знікаюць 3 віды жывёл. 

За апошнія дзесяцігоддзі біялагічная разнастайнасць Зямлі скарацілася больш чым на траціну.

1582 год. Жыхары Вялікага княства Літоўскага перайшлі на Грыгарыянскі каляндар. 

Яны, як і насельнікі еўрапейскіх краін, ляглі спаць у чацвер 4 кастрычніка, а прачнуліся на наступны дзень – у пятніцу 15 кастрычніка. 

Лік дзён быў перадзвінуты на 10 дзён наперад. 

Рэформу календара правеў папа Рыгор XIII.

Ён замяніў старую сістэму лічэння паводле юліянскага календара на новую і ліквідаваў назапашанную розніцу ў 10 дзён. 

Пры далучэнні зямель Вялікага княства да Расійскай імперыі, насельніцтва зноў вярнулася да традыцыі юліянскага календара. 

Новае летазлічэнне ў Савецкай Расіі з’явілася толькі ў лютым 1918 года, 14 лютага.

1890 год. Нарадзіўся Язэп Гладкі. 

Беларускі этнограф, мовазнаўца, лексікограф і педагог.. 

Удзельнік першага Усебеларускага з’езда. Кавалер трох Георгіеўскіх крыжоў. 

Арганізатар беларускага школьніцтва на Лагойшчыне.

Культурна-грамадскі дзеяч беларускай дыяспары ў ЗША: аднавіў выдавецтва «Заранка» (выданне “Лемантара”), выкладаў беларускую мову на курсах у Нью-Ёрку.

Аўтар прац «Прыказкі Лагойшчыны», «Краёвы слоўнік Лагойшчыны», успамінаў.

1929 год. Памёр Пётр Сяўрук. Беларускі паэт.

Дзеяч Таварыства беларускай школы, Беларускай сялянска-работніцкай грамады.

Аўтар апавяданняў, допісаў, вершаў, фельетонаў.

Яго паэзіі ўласцівыя тэмы свабоды творчага самавыяўлення, традыцыйнага сялянскага наракання на нядолю і матывы хрысціянскай любові да людзей.

1957 год. На калязямную арбіту выведзены першы ў свеце штучны спадарожнік Зямлі.

Спадарожнік запушчаны ракетай-носьбітам з казахстанскага касмадрома Байканур. Ён лётаў 92 дні і здзейсніўшы 1440 абаротаў вакол Зямлі (каля 60 мільёнаў км). ЗША свой спадарожнік запусцілі 1 лютага 1958 года. На будынку Магілёўскага педінстытута па Ленінскай, 35, пад кіраўніцтвам географа С. Маісеева ў канцы 1957 года быў адкрыты першы ў Беларусі назіральны пункт за штучныцмі спадарожнікамі.

1976 год. Памёр  Юльян Сергіевіч. 

Беларускі паэт і настаўнік, самадзейны мастак. Грамадскі дзеяч Заходняй Беларусі, эміграцыі.

Працаваў у Камітэце беларускай самапомачы ў Берліне.

Арыштаваны НКУС у 1946 годзе. Вязень лагераў Поўначы, Сібіры, Казахстана.

Аўтар сцэнарыяў для самадзейных калектываў. Асобныя творы ўключаны ў зборнік «Ростані волі» (1990).

Размалёўваў насценныя кілімы, пісаў тэматычныя карціны з жыцця вёскі.

1978 год. Нарадзілася Марына Вежнавец. 

Беларуская балерына, заслужаная артыстка. 

Вядучы майстар сцэны Нацыянальнага акадэмічнага Вялікага тэатра оперы і балета Беларусі.

Працавала і выступала ў тэатрах Санкт-Пецярбурга, Парыжа, Лондана, Іспаніі.

1980 год. Перад самым прызначэннем на пасаду Старшыні Савета міністраў СССР у аўтакатастрофе загінуў Пётр Машэраў. 

Беларускі палітычны дзеяч.

Першы сакратар ЦК КПБ (1965-1980), Герой Савецкага Саюза, Герой Сацыялістычнай працы. 

Пры ім былі пабудаваны ў Магілёве многія буйныя прамысловыя прадпрыемствы, у тым ліку  “Хімвалакно”, “Ліфтмаш”, камбінат сілікатных вырабаў. Інтэнсіўна вялося жыллёвае будаўніцтва ў мікрараёнах “Мір”, “Юбілейны”, “Задняпроўе”, уступіў у строй тэлерэтранслятар, быў пушчаны тралейбус. 

У Магілёве адсутнічаюць назвы ў яго гонар.

1981 год. Памёр Часлаў Сіповіч. 

Грэка-каталіцкі біскуп, актыўны дзеяч беларускай эміграцыі ў Вялікабрытаніі. Доктар тэалогіі. 

Заснавальнік Беларускай бібліятэкі і музея імя Францішка Скарыны.

Член рэдкалегіі навуковага часопіса «The Journal of Byelorussian Studies».

Генерал ордэна айцоў марыянаў у Рыме. 

Ганаровы віцэ-прэзідэнт Таварыства Яна Златавуста ў Лондане.

2007 год. Пайшоў з жыцця Яўген Будзінас. 

Беларускі пісьменнік і журналіст.

Працаваў у рэдакцыях розных газет, часопісаў. Аўтар 7 кніг нарысаў, публіцыстыкі, раманаў. Выдавец серыі «Итоги века». 

Стваральнік музея «Дудуткі» (1994).

 

Новага мэра Магілёва знайшлі ў Бабруйску. Ім стаў будаўнік Аляксандр Студнеў

Навіна ад

Аляксандр Студнёў нарадзіўся ў Магілёве, яму 48 гадоў, жанаты, мае дзве дачкі.

Па адукацыі будаўнік – скончыў Беларускую дзяржаўную політэхнічную акадэмію. Таксама вучыўся ў Акадэміі кіравання пры Прэзідэнце Рэспублікі Беларусь. 

Кар’ера спадара Аляксандра пракруцістая. Працаваў майстрам у СУ-76 будтрэста № 12. Пэўны час быў намеснікам старшыні Магілёўскага гарадскога выканаўчага камітэта па пытаннях горадабудаўніцтва і архітэктуры, а потым старшынёй камітэта па архітэктуры і будаўніцтве Магілёўскага аблвыканкама. Узначальваў затым РУП “Белбудцэнтр” – буйное шматпрофільнае прадпрыемства, якое ажыццяўляе цэлы шэраг будаўнічых паслуг.

З 2017 года быў мэрам Бабруйска. На гады яго кіравання прыпалі бурныя падзеі пандэміі і палітычнага крызісу 2020 года. Вызначыўся як прыхільнік падаўллення пратэстаў і іншадумства, што адны ставяць яму ў заслугу, а іншыя за гэта ж ганьбяць. 

У Магілёве ён павінен хутка ўвайсці ў курс спраў, бо горад ён добра ведае, а праца ў Магілёўскім гарвыканкаме яму знаёмая. 

Яўрэйскую школу зачынілі ў Магілёве, нягледзячы на магчымасць міжнароднага скандалу

Навіна ад

Вучэбны працэс і методыка аказалася ў парадку, а вось прыезд санстанцыі яўрэйская школа перажыць не змагла. Ахвярай кампаніі па праверцы прыватных школ у рэспубліцы стала самая старая прыватная школа горада.  

Прыватная ўстанова адукацыі “Ор Аўнэр-Магілёў” была створана амаль два дзесяцігоддзі таму. Малая колькасць дзяцей у класах і спецыяльныя методыкі выкладання дазволілі школе стаць здавалася б неад’емнай часткай школьнага ландшафту горада. Не без праблем, але школа стабільна набірала сабе вучняў. Паступова склаўся касцяк педагагічнага калектыву. З’явіліся і поспехі гадаванцаў школы на розных конкурсах і спаборніцтвах. 

Выпускнікі “Ор Аўнэр – Магілёў” каля школы

Народная назва школы – “яўрэйская” замацавалася, таму, што кіраўніцтва школы, шмат настаўнікаў і вучняў школы былі яўрэямі. У ёй праводзіліся семінары, майстар-класы і курсы, накіраваныя на вывучэнне гісторыі і культуры яўрэйскага народа. Так і павялося, што школа нягледзячы на іншую афіцыйную назву для магілёўцаў была “яўрэйскай”. 

Пасля пачатку масавых праверак прыватных школ эксперты прадказвалі ўдалае праходжанне праверкі калектывам школы. “Яўрэяў чапаць не будуць, каб не было міжнароднага скандалу” – упэўнена сцвярджалі яны. 

Насамрэч, гэта быў не першы наезд на навучальную ўстанову, не першая спроба яе закрыцця. Таму паперы тут даўно былі ў парадку. Настаўнікі працавалі самыя кваліфікаваныя. Падаткі плаціліся спраўна. Але гэтым разам штосьці пайшло не так.

Практычна ліквідацыя праходзіла наступным чынам. Пасля з’яўлення ўказання па праверцы ўсіх прыватных навучальных устаноў, першую праверку метадычнай базы і навучальнага працэсу школа паспяхова вытрымала. Калектыў, вучні і бацькі не паспелі ўздыхнуць з палёгкай, як праз два дні прыехала санстанцыя. Чамусьці гэтым разам дзяржаўныя правяральшчыкі знайшлі столькі непарадкаў, што і самі здзівіліся, як жа раней пры праверках яны таго не бачылі. 

Падобна на тое, што ніякія апеляцыі не дапамогуць адрадзіць школу. Яе вучняў ужо размеркавалі па іншых навучальных установах па месцу жыхарства. 

Прыватная ўстанова адукацыі “Навучальна-педагагічны комплекс дзіцячы сад – сярэдняя школа “ОР АВНЕР-Магілёў” з УНП 790288449 зарэгістраваная ў адзіным дзяржаўным рэгістры юрыдычных асоб і індывідуальных прадпрымальнікаў. 13.09.2005 была пастаўлена на ўлік у падатковы орган. Па стане на 28.09.2022 юрыдычны адрас кампаніі: Магілёўская вобл., г. Магілёў, б-р Дняпроўскі, д.16.

Іншую магілёўскую сярэднюю прыватную школу “Канкорд”, якой спрыяла кампанія “Сервалюкс”, а адчынілі ў мінулым навучальным годзе, не ліквідавалі, але зрабілі філіялам гімназіі № 4 (мікрараён Мір-2). 

Магілёўскія выпадкі не адзінкавыя. У Беларусі ў верасні – кастрычніку масава закрываюць прыватныя школы, таксама спыняецца навучанне на нацыянальных мовах. Так, з новага навучальнага года ў Беларусі спынілі выкладанне на нацыянальных мовах у дзвюх літоўскіх і дзвюх польскіх школах. Тры з іх былі пераведзены на беларускую ці рускую мову навучання. Літоўская школа ў Пялесе і зусім была зачынена, нібыта за парушэнне правілаў пажарнай бяспекі.

Дзень у гісторыі. 3 кастрычніка. Зацверджаны сігнал SOS. Дзень нараджэння пісьменніка М. Дуброўскага, паэта В. Жыбуля

Навіна ад

Міжнародны дзень лекара (International Doctor’s Day, з 1971 года). 

Дзень салідарнасці і актыўных дзеяў лекараў ва ўсім свеце. Галоўная мэта любога лекара – паляпшэнне і захаванне здароўя насельніцтва.

У 1971 годзе пры падтрымцы кіраўнікоў усіх дзяржаў падчас старту праекта “Урачы без межаў” была заснавана Сусветная арганізацыя аховы здароўя.

У Беларусі практыкуючых лекараў 52 на кожныя 10 тысяч жыхароў (Швецыя – 43, Данія – 42). 

 Сусветны дзень архітэктуры (World Day of Architecture, 1946 года) — міжнароднае прафесійнае свята архітэктараў і знаўцаў архітэктурных шэдэўраў. 

У Беларусі каля 1800 помнікаў архітэктуры, у тым ліку каля 150 ў Магілёве.

1458 год. Нарадзіўся Святы Казімір.

Каралевіч польскі і вялікі княжыч літоўскі. 

Каталіцкі святы, патрон Вільні, апякун земляў Вялікага Княства Літоўскага, патрон Гродзенскага біскупства.

Сын Казіміра Ягелончыка. 

Кіраўнік справамі ў Польшчы (1481-1483), займаўся дабрачыннасцю.

Памёр у 1484 годзе ў Вільні.

У гонар святога праводзіцца асобная служба 4 сакавіка. У Вільні ў гэты дзень адбываецца святочны кірмаш – “Казюкас”.

1652 год. Памёр Крыштаф Хадкевіч. 

Дзяржаўны дзеяч Вялікага княства Літоўскага: вялікі харунжы  (1611-1623), вялікі канюшы (1623-1633), кашталян троцкі і віленскі, ваявода віленскі (1642-1652).

Быў старостам бабруйскім. 

Удзельнік войнаў з Турцыяй, Швецыяй, Расіяй. 

1786 год. У Магілёве і Полацку адкрыліся расійскія “галоўныя” (губернскія) народныя вучылішчы з чатырохгадовым тэрмінам навучання. 

Яшчэ сем “малых” вучылішчаў з 2-гадовым тэрмінам навучання з’явіліся ў павятовых цэнтрах. 

Гэтыя ўстановы былі адкрыты ў ліку першых  25 народных вучылішчаў у Расійскай імперыі па распараджэнню Кацярыны ІІ і з падачы серба Янковіч дэ Мірыево. 

Навучанне ў іх было значна слабейшым, чым ва ўстановах Эдукацыйнай камісіі (1773) Рэчы Паспалітай і езуіцкіх.

Галоўнае вучылішча ў Магілёве 15 верасня 1809 года было пераўтворана ў мужчынскую гімназію. 

Сярод знакамітых выпускнікоў установы можна ўзгадаць навукоўцаў, падарожнікаў К. Грум-Гржымайлу, М.Урончанку, С. Каваліка,  Дз. Дубягу, краязнаўца К.Гартынскага, прэзідэнта сената Гавайскіх астравоў М. Судзілоўскага, энцыклапедыстаў братоў Гранат, О. Шмідта, камандуючага Сербскай арміі М. Чарняева і іншых.

1848 год. Памёр Міхал Баброўскі. 

Славіст, арыенталіст, багаслоў. 

Доктар багаслоўя, прафесар Віленскага ўніверсітэта, канонік Брэсцкага капітула.

Даследчык старажытных славянскіх рукапісаў і старадрукаваных кірылічных выданняў. 

Адзін з пачынальнікаў скарыназнаўства.

Разам  з Ігнатам Даніловічам адзінз першых творцаў «беларускага нацыянальнага адраджэння», «беларускай нацыянальнай ідэі».

Валодаў беларускай мовай.

1889 год. Нарадзіўся Міхал Пятроўскі. 

Беларускі хрысціянскі дэмакрат, каталіцкі святар. 

Прыхільнік беларусізацыі касцёла ў Беларусі, беларускага характару школьніцтва, культурнай і грамадскай дзейнасці. 

Прамаўляў казанні на беларускай мове.

На фота: Удзельнікі беларускага гуртка ў Рыма-каталіцкай духоўнай акадэміі ў Пецярбургу на пачатку 1917 г. Злева  Міхал Пятроўскі.

1895 год. Нарадзіўся Сяргей Ясенін. 

Рускі паэт, адзін з самых папулярных і вядомых рускіх паэтаў XX стагоддзя.

Памёр у 1925 годзе.

Пашырана ілжывае меркаванне, што Ясенін служыў у Магілёве ваенным санітарам. 

Але гэтая інфармацыя не раз абвяргалася.

1897 год. У в. Казелле Краснапольскага раёна нарадзіўся Міхась Дуброўскі. 

Беларускі пісьменнік, перакладчык.

Супрацоўнік Інбелкульта, Усесаюзнага радыёкамітэту.

Выкладчык Брэсцкага, Гродзенскага педінстытутаў, Літаратурнага інстытута ў Маскве.

Перакладчык на беларускую мову паэмы О. Уайльда «Балада Рэдынгскай турмы».

1906 год. Міжнародным сігналам бедства зацверджаны сігнал SOS. 

Раней дзейнічаў сігнал CQD.

Памылкова лічыць, што сігнал SOS складаецца з першых літар фразы Saves Our Souls (Ратуйце нашы душы). 

Насамрэч ён абраны з чыста тэхнічных меркаванняў.

Самы вядомы выпадак падачы сігналу SOS да гэтага часу застаецца SOS “Тытаніка”.

З 1999 года ўсе марскія судны павінны выкарыстоўваць для перадачы сігналаў бедства больш дасканалую сістэму – GMDSS.

У сувязі з гэтым значэнне сігналу “SOS” паменшылася.

1978 год. Нарадзіўся Віктар Жыбуль. 

Беларускі паэт і літаратуразнавец.

Працаваў у часопісах «Першацвет», «Роднае слова»,  «Arche». 

Супрацоўнік Беларускага дзяржаўнага архіва-музея літаратуры і мастацтва.

Удзельнік «Бум-Бам-Літ», многіх літаратурна-музычных праектаў, мастацкіх акцый, перформансаў. 

Прычыніўся да дзейнасці многіх музычных гуртоў, выступае з калектывам «Рацыянальная дыета».

Паэт-эксперыментатар, аўтар паліндромных паэм,  зборнікаў паэзіі.

Удзельнік праекта «(Не)расстраляныя».

1990 год. Аб’яднанне ФРГ і ГДР. Дзень адзінства Германіі.

Народная палата ГДР прыняла рашэнне пра далучэнне да ФРГ і ўтварэнне адзінай дзяржавы. У Берліне быў спушчаны сцяг ГДР.

З 00:00 гадзін ГДР спыніла сваё існаванне як дзяржава, Заходні Берлін – як самастойная палітычная адзінка з асаблівым міжнародным статусам. 

У склад ФРГ увайшлі пяць адноўленых земляў былой ГДР: Брандэнбург, Мекленбург-Пярэдняя Памеранія, Саксонія, Саксонія-Анхальт, Цюрынгія і тэрыторыя Берліна.

2006 год. Памерла Тамара Пузіноўская. 

Беларуская актрыса.

З’яўлялася адной з найболей запатрабаваных актрыс Купалаўскага тэатру.  

Талент актрысы асабліва раскрыўся ў спектаклях нацыянальнай драматургіі. 

Сярод яе выдатных роляў — Нэля («І змоўклі птушкі» І. Шамякіна), Ліда («Радавыя» А. Дударава), Маргарыта («Напісанае застаецца» А. Петрашкевіча), Бона Сфорца («Чорная панна Нясвіжа» А. Дударава).

 

Легендарны бабруйскі вінзавод будуць падрываць 3 і 4 кастрычніка

Навіна ад

Жыхароў бліжэйшых дамоў просяць раскрыць вокны, каб выбуховай хваляй не выбіла шкло.

Паведамленне пра знос будынку былога бабруйскага вінзавода днямі паявілася ў СМІ. Вядома, што 3 і 4 кастрычніка, у панядзелак і аўторак, з 12.00 да 13.00 і з 16.00 да 17.00 па адрасе вуліца Навашасейная, 25 метадам падрыву будзе знесены будынак.

Магілёў.media раней распавядалі пра руйнаванне знакамітага бабруйскага “храма Бахуса”. Імпазантныя будынкі вінзавода прыцягваюць шматлікіх аматараў экстрыму і арыгіальных фотасесій, але толькі не гаспадарлівых уласнікаў.

Гарадскія паблікі ўжо размяшчаюць настальгічныя запісы пра вінзавод, у якіх нагадваюць, як прастора прамысловых аб’ектаў магла б трансфармаваць, упрыгожыць і развіць бабруйскі культурны і сацыяльны ландшафт. 

Рабаўнікоў Баркалабаўскага манастыра так і не знайшлі

Навіна ад

Быў апаганены абраз Баркулабаўскай Маці Божай – адзіная арыгінальная цудатворная ікона на Магілёўшчыне і адначасова адзін з найвялікшых шэдэўраў беларускай школы іканапісу.

Царкоўныя злодзеі абрабавалі святыню вясной гэтага года. У ноч пасля службы на Радуніцу, 3 мая 2022 года адбылося рабаванне Баркалабаўскага Свята-Узнясенскага манастыра і апаганьванне яго галоўнай святыні –  Абраза Баркулабаўскай Маці Божай Адзігітрыі.

Як паведамілі Магілёў.media прыхаджане, рабаўнікі ўзламалі дзверы ў царкве Святога Іаана Прадцечы і разбілі ахоўнае шкло абраза. Яны паздымалі і вынеслі ўсе рэчы з высакародных металаў і з каштоўнымі камянямі – ланцужкі, пярсцёнкі, кольцы, што былі ахвяраваныя прыхаджанамі і паломнікамі абразу.

Царква ў Баркалабаве ахоўваецца Дэпартаментам аховы і мае сігналізацыю. Але ахоўнікі з Быхава прыбылі ў той час, калі злодзеі на машыне ўжо ад’ехалі ад манастыра.

У афіцыйных крыніцах няма ніякай інфармацыі пра ход расследавання апаганьвання адной з галоўных праваслаўных святынь Магілёўшчыны.

Абраз Баркалабаўскай Маці Божай. Гісторыя з’яўлення

Баркулабаўскі абраз Маці Божай — выбітны твор беларускага выяўленчага мастацтва XVII стагоддзя.   

Паводле паданняў, абраз з’явіўся ў Баркалабаве ў 1659 годзе, калі расійскі князь Пажарскі вяртаўся «з Польшчы», маючы пры сабе ў абозе абраз Багародзіцы. Калі атрад князя праходзіў каля манастыра, «абраз стаў нерухомы» і ніякія намаганні людзей не здолелі зрушыць яго з месца. Пажарскі зразумеў, што абраз жадае застацца ў манастыры і перадаў яго ігуменні Фацінні Кіркораўне. Гісторыкі аспрэчваюць гэтае паданне, паколькі ў 1659 годзе на Беларусі не вялося ваенных дзеянняў, падчас якіх магла адбыцца падобная гісторыя. Яны дапускаюць, што паданне можа быць звязана з падзеямі больш ранняга часу, напрыклад, 1655 года, калі беларускія землі былі атакаваныя войскамі расійскай дзяржавы.

Доўгі час, пасля таго як у 1928 годзе манастыр быў закрыты, абраз знаходзіўся ў манахінь, а з 1955 года – ў быхаўскай Свята-Троіцкай царкве. 

У ліпені 2010 года яго вярнулі ў адноўлены манастыр у Баркалабава.  Сярод усіх шанаваных цудатворных абразоў, што шануюцца вернікамі на Магілёўшчыне, Баркалабаўская ікона Божай Маці – адзіны арыгінальны твор, які захаваўся.

На думку даследчыкаў, Баркалабаўская ікона – адзін з найвялікшых шэдэўраў беларускай школы іканапісу, які захоўвае выразныя рысы старажытнавізантыйскай асновы.

фота: sb.by

Следчыя раскрылі карупцыйную схему на “Магатэксе” і аддзелачнай фабрыцы

Навіна ад

За восем месяцаў на прадпрыемствах скралі каля 34 тысяч рублёў.

Злачынную схему выкарыстоўвалі 59-гадовая дырэктар па вытворчасці “Магатэкса” і 51-гадовы дырэктар аддзелачнай фабрыкі. Яны рахтавалі справаздачныя дакументы з фіктыўнымі звесткамі аб завышэнні паказчыка аб здачы гатовай прадукцыі з фабрыкі на склад “Магатэкса” – паведамляе прэс-служба Следчака камітэта Беларусі.

Падробная дакументацыя дазваляла зламыснікам налічваць супрацоўнікам фабрыкі павышаныя прэміі, і атрымліваць прэміі самім. Гэта прывяло да прычынення шкоды на агульную суму больш за 32 тысячы рублёў. 

Абвінавачаныя цалкам кампенсавалі ўрон, але віну прызналі толькі часткова. Ім прад’яўлены абвінавачанні па ч.3 арт.426 (перавышэнне ўлады або службовых паўнамоцтваў, што прывяло да цяжкіх наступстваў) і па ч.2 арт.427 (службовы падлог, учынены з мэтай скажэння даных дзяржаўнай статыстычнай справаздачнасці) Крымінальнага кодэкса. Да фігурантаў справы прыменена мера стрымання ў выглядзе асабістага паручальніцтва.

“Ляціць пыл, бруд” – жыхары Палыкавіч-2 скардзяцца на завод па вырабе падгузнікаў

Навіна ад

Іншыя насельнікі вёскі пад Магілёвам не бачаць праблемы ў суседстве з новай вытворчасцю.

Паведамленне пра забруджванне паветра заводам БелЭмса, размешчаным у Палыкавічах-2 паявіліся на беларускіх інтэрнэт-рэсурсах. У кароткім роліку чутна, як дзве жыхаркі паселішча абмяркоўваюць завод па вытворчасці падгузнікаў. 

“Ляціць пыл, бруд. Адыходы вытворчасці” – кажуць жанчыны за кадрам, а адзін з мясцовых жыхароў дадае:

– Не адзін месяц ужо завод працуе без фільтраў. Мой дом знаходзіцца прыкладна ў 300 метрах ад гэтага завода. На машыне ўвесь час адчуваюцца валокны, стаіць непрыемны саладкавы пах. Куды звяртацца, незразумела. 

Журналісты Магілёў.media пабывалі ў Палыкавічах-2 і могуць пацвердзіць, што незвычайны саладкаваты водар лунае ў паветры паблізу вытворчасці. Аднак сустрэтыя намі мясцовыя жыхары адверглі падазрэнні наконт завода падгузнікаў.

– Тут нічога не вытвараецца хімічнага. – запэўнілі двое мужчын сталага веку, што праходзілі міма БелЭмса – Тут падгузнікі толькі шыюць, збіраюць, а сюды ўжо прывозяць гатовую сыравіну. А пахне – гэта, можа, ад газавай станцыі?

Разам з тым, пачынаючы з 2020 года кампанія БелЭмса заяўляла, што акрамя дзіцячых падгузнікаў запускае новую вытворчую лінію па вырабе медыцынскіх масак. Гэтая лінія праектавалася як вытворчасць поўнага цыклу, а гэта азначае, што вытворчасць матэрыялаў для гатовай прадукцыі таксама ажыццяўляецца на прадпрыемстве. Медыцынскія маскі вырабляюцца на чатырох тэхналагічных лініях прадпрыемства. А ў 2022 годзе БелЭмса запусціла вытворчасць новага віду прадукцыі – падгузнікаў-трусікаў для дзетак.

Кампанія “БелЭмса” зарэгістравана ў свабоднай эканамічнай зоне “Магілёў” у 2011 годзе. Заснавальнікам і інвестарам прадпрыемства выступіла турэцкая кампанія Ucar Grup. 70 працэнтаў прадукцыі экспартуецца, яна пастаўляецца ў 18 краін свету. Пераважна, гэта падгузнікі гандлёвай маркі “Senso”.

Па Беларусі зноў пойдуць расійскія войскі?

Навіна ад

Інсайды паказваюць, што беларускую чыгунку могуць рыхтаваць да прыёму ваенных эшэлонаў з РФ. Адначасова чыгуначнікаў прымушаюць падпісваць дакументы аб неразгалошванні інфармацыі.

На некаторых рэсурсах паведамляецца, што ў Беларусі праводзіцца комплекс мерапрыемстваў па праверцы чыгуначнай інфраструктуры. 

Так, напрыклад,  з прыцягненнем службовых асоб аддзяленняў беларускай чыгункі і камендатур ВОСО (служба ваенных паведамленняў узброеных сілаў РФ) ажыццяўляецца праверка месцаў пагрузкі-выгрузкі на чыгуначных станцыях. Праводзіцца рамонт пагрузачна-выгрузных платформ, а таксама падрыхтоўка аўтамабільных падыходаў да пагрузачна-выгрузных месцаў на станцыях.

Таксама паведамляецца, што ідзе рраспрацоўка графікаў руху воінскіх эшалонаў па беларускай чыгунцы.

Адначасова ў сеціве паяўляюцца фотаздымкі ўнутранай дакументацыі, якая рассылаецца ў структуры беларускай чыгункі. Дакументы патрабуюць у тэрмін да 30 верасня ўзяць з усіх работнікаў, у тым ліку з кіраўнікоў, абавязацельства аб неразгалошванні службовай інфармацыі канфідэнцыйнага характару.

Усе гэтыя дзеянні могуць указваць на падрыхтоўку да прыёму воінскіх эшалонаў з РФ.

Паведамляецца, што для руху эшалонаў могуць выкарыстоўвацца наступныя чыгуначныя памежныя пераходы:

  • Краснае (Расія) – Асінаўка (Беларусь).
  • Злынка (Расія) – Закопытье (Беларусь).
  • Заверажжа (Расія) – Езярышча (Беларусь).

Калі гэта так і будзе, па чыгуначных шляхах Магілёўшчыны зноўку могуць пайсці эшэлоны расійскай арміі, што атакуюць Украіну.