Пад Мсціславам правядуць асушэнне зямель на 210 гектарах

Самыя масштабныя меліяратыўныя працы ў 2023 годзе на Магілёўшчыне пройдуць у Мсціслаўскім раёне – паведамляе раённая газета “Святло Кастрычніка”.

Будзе асушана 210 гектараў высокапладародных земляў каля вёскі Шумянічы, якія належаць прадпрыемству “Сож-Агра”.

– Працы тут пачаліся ў 2022 годзе. Асноўная іх частка прыпадае на гэты год. – расказаў выданню намеснік начальніка ПМК-94 Віталь Лушчакоў – Зараз ідзе абсталяванне адкрытай сеткі, карчоўка хмызняку і пнёў, валка і распілоўка драўніны. Працуюць чатыры экскаватары, два бульдозеры. Маецца пакласці 119 км дрэнажу. Гэты аб’ект плануем здаць у эксплуатацыю восенню бягучага года.

Дзякуючы комплексу меліярацыйных мерапрыемстваў паляпшаецца ралля, павышаецца ўраджайнасць – лічаць прадстаўнікі ПМК. На такіх землях добра растуць кармавыя культуры, што адаб’ецца на павелічэнні вытворчасці малака.

Фота: “Святло Кастрычніка”

Стала вядома, калі сёлета пройдзе “Мсціслаўскі фэст”

Фестываль сярэднявечнай культуры “Мсціслаўскі фэст 2023” адбудзецца 5-6 жніўня 2023 года – паведамляюць арганізатары.

Пачынаючы з 1 лютага адкрыта рэгістрацыя патэнцыйных удзельнікаў мерапрыемства. На сённяшні дзень ужо падалі свае заяўкі вулічны тэатр на хадулях “Весёлые Великаны”, гурты “Frozen Garden”, “STEEL RAIN”, “Граф Чапский” з інтэрактыўнай праграмай.

Да ўдзелу ў фэсце запрашаюцца музычныя гурты, вогненныя тэатры, тэатральныя і танцавальныя калектывы. 

Двухдзённы фэст штогадова (акрамя 2020 года па прычыне пандэміі) праводзіцца ў старажытным Мсціславе з 2008 года.

У Мсціславе на Замкавай гары адновяць гарадскую забудову часоў Кіеўскай Русі

На працягу 2023 года плануецца рэканструкцыя гарадской забудовы XII – XIV стагоддзяў на Замкавай гары ў Мсціславе. 

Першасная задача, якая стаіць перад будаўнікамі – захаваць трохяруснасць вежы-данжона на Замкавай гары – распавяла БелТА начальнік аддзела ідэалагічнай працы, культуры і па справах моладзі Мсціслаўскага райвыканкама Наталля Біскуп. Таксама плануецца рэканструкцыя элемантаў гістарычнай гарадской забудовы ў такім выглядзе, як гэта было ў часы Кіеўскай Русі.

– Грошы для гэтых работ ужо атрыманы. Цяпер мы знаходзімся на этапе карэкціроўкі праектна-каштарыснай дакументацыі, паколькі яна распрацоўвалася яшчэ ў 2016 годзе і на сённяшні дзень страціла актуальнасць. Працуем у цесным звязку з Міністэрствам культуры – гэта ж гісторыка-археалагічны помнік, аб’ект не просты. Заказчыкам выступае УКБ.

Карэкціроўка і ўзгадненне праектна-каштарыснай дакументацыі зоймуць некалькі месяцаў, пасля гэтага на Замкавай гары пачнуцца рэканструкцыйныя працы. Яны будуць падзелены на некалькі этапаў. Да канца гэтага года плануецца завяршэнне будаўніча-мантажных работ аб’ектаў на Замкавай гары.

Фота: БелТА

Два мясных кантрабандысты за адну гадзіну былі затрыманы на Мсціслаўшчыне

Кожны вез па 300 кілаграм мяса для продажы ў Расію,  іх затрымалі супрацоўнікі ДАІ.

Спачатку на дзевятым кіламетры аўтамабільнай дарогі Мсціслаў – Каськова (Расійская Федэрацыя) інспектары ДПС спынілі аўтамабіль Iveco Daily, у якім знаходзілася 300 кг субпрадуктаў буйной рагатай жывёлы. Дакументы на мясны груз у кіроўцы машыны адсутнічалі. Аналагічнае парушэнне супрацоўнікі ДПС праз гадзіну зафіксавалі на гэтай самай дарозе. У багажным аддзяленні аўтамабіля Volkswagen Polo мужчына без дакументаў перавозіў 360 кг мяса буйной рагатай жывёлы. 

Сумарна, інспектары дарожна-патрульнай службы Мсціслаўля спынілі незаконную транспарціроўку 660 кг мяса. Матэрыялы парушэнняў накіраваны ў суд для разгляду абодвух выпадкаў. 

Фота mogilevnews.by

Насельніцтва Мсціслава скарацілася на 16% за апошнія дваццаць год

Скарачэнне насельніцтва ў гарадах і мястэчках адбываецца на Магілёўчыне дастаткова даўно. Так, у старадаўнім Мсціславе за апошніх дваццаць год назіраецца вялікае скарачэнне колькасці насельніцтва. Калі яшчэ напачатку 2000-х гг. жыхароў горада было блізу 12 тысяч чалавек, то на сённяшні дзень колькасць жыхароў раённага цэнтра складае крыху больш за 10, 1 тысяч чалавек.  Такім чынам, за апошнія 20 год насельніцтва Мсціслаўля скарацілася амаль на дзве тысячы чалавек – а гэта недзе 16% жыхароў горада. 

Пры гэтым Мсціслаў прэзентуецца ў рэгіёне як горад з агромністым турыстычным патэнцыялам. Як бачым, гэта мала дапамагло ў развіцці горада і раёна, бо на дзяржаўным узроўні не створана адпаведных умоў для роста папулярнасці ўнутранага, а тым больш знешняга турызма, які мог бы стаць лакаматывам для развіцця.

Фото mogilev.media

Страшна хадзіць па вуліцах з-за бадзяжных сабак – скардзяцца мсціслаўцы

Небяспечна хадзіць па вуліцы Зялёнай у Мсціславе, вялікі бадзяжны сабака палохае дзяцей таксама каля крамы “Еўраопт” – скардзяцца чытачы раённай газеты “Святло Кастрычніка”.

Сабакі, якія гуляюць самі па сабе, выклікаюць хваляванне ў бацькоў, якія не маюць магчымасці праводзіць дзяцей у школу. Яны часта пішуць пра гэта ў сацсетках і заклікаюць да сумлення гаспадароў і адказнасці асоб, абавязаных сачыць за парадкам на вуліцах Мсціслава – піша выданне.

Фота: “Святло Кастрычніка”

Сярэдзіна зімы, а ў Мсціславе толькі залілі каток

У Мсціславе пачаў працаваць каток – паведаміла раённая газета “Святло Кастрычніка” сёння, 16 студзеня. Ён быў заліты на тэрыторыі Цэнтра фізкультурна-аздараўленчай работы “Алімп” на вуліцы імя Пятра Мсціслаўца, і займае плошчу ў 1000 квадратных метраў.

Тут працуе пракат, а катацца можна кожны дзень з 10.00 да 22.00 – расказаў выданню загадчык сектара спорту і турызму райвыканкама Дзмітрый Селіванаў.

Фота: “Святло Кастрычніка” 

Нашла каса на камень – мсціслаўскае райпо закрывае краму ў крычаўскім раёне, крычаўскія чыноўнікі супраць

Мсціслаўскае спажывецкае таварыства хоча зачыніць сваю краму ў вёсцы Ермакоўка Крычаўскага раёна, мясцовыя жыхары і крычаўскае чынавенства ад такога рашэння не ў захапленні.

Вёска Ермакоўка на Крычаўшчыне налічвае паўсотні жыхароў. Тут пакуль працуе стацыянарная крама.  Нягледзячы на тое, што графік працы гандлёвай кропкі ўсяго тры гадзіны на дзень, яе наведваюць не толькі жыхары самой Ермакоўкі, але і сяляне з бліжэйшых населенных пунктаў. 

Тым не менш, прадстаўнікі Мсціслаўскага спажывецкага таварыства, якому належыць магазін, прынялі рашэнне аб яго закрыцці. З гэтым не пагадзілася стараста вёскі Ермакоўка Надзея Ракоўская, якая паведаміла пра неадназначную сітуацыю свайму кіраўніцтву, а таксама стала збіраць подпісы мясцовых жыхароў супраць закрыцця вясковай крамы.

Канфліктная сітуацыя прывяла да сустрэчы насельніцтва вёскі з кіраўніцтвам Крычаўскага раёна і прадстаўнікамі Мсціслаўскага спажывецкага таварыства. Прадстаўнік дэпутацкага корпуса Крычаўкага раёна Ірына Пруднікава на сустрэчы дакладна абазначыла пазіцыю: ні райвыканкам, ні раённы Савет дэпутатаў згоду на ліквідацыю гандлёвай кропкі не дадуць. У сваю чаргу, прадстаўнікі Мсціслаўскага райспажыўтаварыства патлумачылі, што давядуць пазіцыю да свайго кіраўніцтва.

Па меркаванні раённага кіраўніцтва вясковы гандаль не проста можа развівацца ў далейшым, але і павялічваць тавараабарот, бо сама крама размешчана на трасе, а гэта значыць, што шмат хто заязджае сюды.  Па словах старшыні раённага Савета дэпутатаў Пруднікавай, хоць Ермакоўка аддаленая і ад раённага цэнтра, і ад аграгарадка Маляцічы, пазбавіць мясцовых жыхароў якаснага гандлёвага абслугоўвання  недапушчальна.

Тым не менш, пытанне з будучыняй сельскай гандлёвай кропкі застаецца незразумелым і цьмяным, а далейшы яе лёс будзе вызначацца ў бліжэйшы час.  Адзначым, што ў Ермакоўцы налічваецца 11 дзяцей. Больш за тое, у вёсцы жывуць дзве шматдзетныя сям’і, для якіх закрыццё вясковай крамы будзе досыць адчувальным.

Наш каментар.

Сітуацыя, пры якой раённая сетка крамаў Крычаўскага раёна перастала быць у ведамстве мясцовых уладаў склалася ў 2014 годзе. Менавіта тады, пры тагачасным старшыні Крычаўскага райвыканкама Васілі Сысоеве, было ліквідавана Крычаўскае раённае спажывецкае таварыства, а ўсе дзяржаўныя крамы перайшлі ў ведамства Мсціслаўскага раёна.  Што цікава, то менавіта ў гэтым годзе мясцовая чыноўніца Ірына Пруднікава стала старшынёй Крычаўскага раённага Савета дэпутатаў. Яшчэ больш паказальна тое, што да высокай пасады раённага маштабу Пруднікава ўзначальвала сектар гандлю і паслуг аддзела эканомікі і мае непасрэднае дачыненне да ліквідацыі Крычаўскага РАЙПО. 

Фота ілюстрацыйнае 

Паглядзіце, якога труса – сімвала года вырабілі ў Мсціславе, фота

Мсціславец Аляксандр Папоў працуе ў будаўнічым каледжы і разам з навучэнцамі ўжо традыцыйна вырабляе з метала сімвалы наступаючага года.

Творы, якія вырабляе майстар, заўсёды займаюць прызавыя месцы на рэспубліканскіх і абласных этапах конкурсу “ТэхнаЁлка” – піша mstlife.by.

Раней ужо былі створаны певень, сабака, кабан, мыш, бык і тыгр. У гэтым годзе да іх дадаўся і трус, а за аснову быў узяты персанаж мультфільма «Захавальнікі сноў».

Сімвал года ўсталявалі на тэрыторыі мсціслаўскага філіяла «Бабулінай крынкі», а папярэднія працы захоўваюцца ў музеі будаўнічага каледжа.

Фота:  mstlife.by.

Горы снега на дарогах Магілёўшчыны – а прайшло амаль два тыдні пасля снегападу

Жыхары раённых цэнтраў Магілёўскай вобласці скардзяцца на кашу на дарогах, непрыбраныя гурбы.

– Дарогі ад снега ачышчаны сапраўды дрэнна: ад таго, што праезная частка стала занадта вузкай машыны не могуць раз’ехацца. – скардзіцца на камунальшчыкаў Чэрыкава не хто-небудзь, а начальнік ДАІ Чэрыкаўскага РАУС Андрэй Шчамялёў на старонках cherikownews.by – “Горы” снега, а калі правільна сказаць снежныя валы, якія ўтварыліся каля прыпыначных павільёнаў, пешаходных пераходаў, ужо павінны былі быць вывезены, калі абапірацца на нарматывы ўтрымання вулічна-дарожнай сеткі.

Усе гэтыя ўчасткі дарогі хаваюць у сабе не патэнцыйную, а цалкам рэальную небяспеку для ўсіх удзельнікаў дарожнага руху, сцвярджае начальнік ДАІ – асабліва ў цёмны час сутак, калі з-за сумётаў не бачна пешаходаў на пераходах. Дарослы яшчэ можа быць заўважаны, а вось дзіця, якое выскоквае на пераход з-за снежнага вала, убачыць складана.

Фота: cherikownews.by

У Мсціславе даволі няпростыя вуліцы – вузкія, пятляючыя, якія вядуць у гару. Людзі, якія жывуць на ўзвышшах, заўсёды адчуваюць нязручнасці ў сувязі з гэтым. Снежная зіма сёлета ў прамым сэнсе падкінула праблем такім гараджанам. Снег фактычна няма куды скідаць. І не заўсёды якасна праводзяць уборку на вузкіх і ўзгорыстых вулачках. Адліга ператварае снег у кашу, па якой ні прайсці ні праехаць – пішуць журналісты выдання mstlife.by.

Фота: mstlife.by

На фота – тыповая карціна на скрыжаванні вуліцы Камунарнай і завулка Камунарнага. Участак паміж імі, завалены снегам што прыводзіць да таго, што там рэгулярна захрасаюць машыны. Іх колы зацягвае снежная каша, з якой складана выбрацца без дапамогі. Ды і месца становіцца даволі небяспечным, асабліва ў вячэрні час.