Вечарам 14 чэрвеня ў Магілёве здарылася магутная дарожная пробка, якая скавала ўсе цэнтральныя вуліцы. Гэта здарылася з-за абрыву тралейбуснай лініі электраперадач у раёне чыгуначнага вакзала. Відэа з інцыдэнтам апублікавала ДАІ.
У выніку практычна ўсе тралейбусы на гэтай лініі сталі і заблакавалі рух машын па вуліцы Першамайскай. Чытачы mogilev.media падзяліліся назіраннем за паводзінамі кіроўцы аднаго з рэйсавых аўтобусаў.
Рухаючыся па Першамайскай з боку драмтэатра ў кірунку плошчы Леніна, аўтобус №4 павярнуў з маршрута на Круты завулак – налева па ходзе руху, у завулак паміж ГУБАЗіКам і кінатэатрам “Чырвоная зорка”. Тут, каля кінатэатра вадзіцель “чацвёркі” масава высадзіў пасажыраў і далей стаў рухацца ў бок вуліцы Дзяржынскага, маючы намер праскачыць пробку па гэтай вуліцы, а потым выруліць назад на Першамайскую каля ўнівермага, альбо наогул змяніць маршрут.
Тут аўтобус аказаўся заблакаваны патокам легкавушак, каторыя гэтаксама аб’яжджалі затор праз Дзяржынскага. Пасля перапалкі з кімсьці з пасажыраў, кіроўца аўтобуса памяняў маршрут – павярнуў у бок вуліцы Лазарэнкі, і праз яе і вуліцу Касманаўтаў паехаў на праспект Міра.
На вуліцы Болдзіна можна смела чакаць транспартны калапс, Пажарны прыме на сябе амаль усе маршруткі. Шукайце новыя прыпынкі і эканомце на праязных.
З 15 сакавіка па 31 мая будзе праводзіцца рамонт вуліцы Камсамольскай у Магілёве. Пагэтаму ўсю транспартную сістэму горада чакаюць змены да самага канца вясны. Mogilev.media дапамогуць разабрацца ў пераменах – проста і коратка. А заадно падкажам аўтамабілістам участкі дарог, якіх лепш пазбягаць на час рамонта.
Дзе будуць новыя прыпынкі?
Усе аўтобусы і маршрутныя таксі, якія рухаюцца з цэнтра горада ў бок Задняпроўя, цяпер будуць ехаць не па Камсамольскай вуліцы, а па Болдзіна. Прыпынак ад Драмтэатра пры гэтым пераносіцца на пляцоўку перад Абласным цэнтрам народнай творчасці (УНМЦ, Канцэртны зал “Магілёў”, “філармонія” – на фота).
Усе маршрутныя таксі, якія рухаюцца з боку Задняпроўя і Буйніч у цэнтр, дзеляцца на два патокі. Тыя, канечныя кропкі якіх на Восьмым і далей (1, 2, 16, 35) цяпер будуць ехаць па Піянерскай і праз аўтавакзал – прама на Крупскую. Прыпынак замест “Каледжа мастацтваў” пераносіцца на вугал “Педагагічнага коледжа” – па вуліцы Піянерскай, праз дарогу ад ранейшага.
Усе астатнія маршруткі з Задняпроўя і Буйніч пасля Арджанікідзэ будуць ехаць міма запраўкі “Беларуснафты” (верагодна, недзе тут і будзе новы прыпынак) па Пажарнаму завулку а далей па Першамайскай і сваім ранейшым шляхам.
Аўтобусы, якія рухаюцца з боку Задняпроўя і Чалюскінцаў у цэнтр, будуць ехаць па Піянерскай да праспекта Міра. 14, 24, 26, 40 і 238 адсюль будуць ехаць далей праз аўтавакзал на вуліцу Крупскай. Астатнія паварочваюць на праспект Міра і едуць ранейшым маршрутам.
Усе тралейбусы, якія рухаюцца з Задняпроўя ў цэнтр, будуць ездзіць толькі да Арджанікідзэ. Тралейбус №4 пры гэтым часова адмяняецца. На ўчастку ад Чыгуначнага вакзала да Пераезда яго функцыі будзе выконваць №5. Тралейбус №2, які рухаецца з Восьмага ў цэнтр, будзе курсіраваць толькі да Чыгуначнага вакзала.
Якіх маршрутаў пазбягаць аўтамабілістам
Як можна зразумець з новай схемы гарадскога транспарту, практычна ўвесь паток ляжа на вуліцу Болдзіна. Перагружаным маршрутнымі таксі апынецца таксама Пажарны завулак. Улічваючы, што да новай схемы праезду кіроўцы будуць прывыкаць яшчэ доўга, на гэтых двух участках гарадскіх дарог і бліжэйшых справядліва будзе чакаць высокую верагоднасць пробак і затораў. Рэкамендуем планаваць альтэрнатыўныя маршруты.
Можна смела чакаць, што істотна скарацяцца парковачныя месцы на ўзбочынах каля плошчы Арджанікідзэ (па вуліцы Карла Маркса) і па Пажарным завулку.
P.S.
Усе праязныя цяпер да канца вясны дзейнічаюць на ўсе віды транспару – аўтобусныя на тралейбус і наадварот.
P.P.S.
Магчымыя карэкціроўкі і змены ў размяшчэнні прыпыначных пунктаў, таму сачыце за абнаўленнямі матэрыяла і навінамі.
