Жыхары дома ў Касцюковічах накідалі стыхійны сметнік каля суседа і не прызнаюцца

У раёне Касцюковічаў пад назвай Слабада жыхары двухпавярховага дома накідалі горы бытавога і будаўнічага смецця наўпрост пад агароджай прыватнага дома.

У выніку паміж жыхарамі дамоў узнікла канфліктная сітуацыя. Гаспадары прыватнага дома сцвярджаюць, што неаднойчы бачылі як жыхары размешчанага насупраць двухпавярховага цаглянага дома выносяць попел (таму што кватэры ацяпляюцца дровамі), бульбяныя ачысткі, бутэлькі і іншыя адходы побач з іх ўчасткам. 

У сваю чаргу жыльцы двухпавярховіка сцвярджаюць, што асабіста яны выкідваюць толькі попел, а смецяць насельнікі ўсяго раёна Слабады – паведамляе раённая газета “Голас Касцюкоўшчыны”.  

Што цікава, кантэйнернай пляцоўкі паблізу двухпавярховага дома няма, але з кожным яго жыхаром мясцовая камунальная служба заключыла дамову на вываз смецця. Па аўторках спецтранспарт забірае бытавыя адыходы, па чацвяргах – другасную сыравіну.

Па меркаванню кіраўніка раённай інспекцыі прыродных рэсурсаў і аховы навакольнага асяроддзя Аляксандра Талкачова вінаватыя ў з’яўленні сметніка жыхары двухпавярховіка, але яны не хочуць прызнаваць за сабой віну. Аднак начальнік інспекцыі сцвярджае, што людзі згодны папрацаваць і прыбраць смецце побач з дамамі. Гэта, на думку спецыяліста, будзе дзейснай мерай для ўсіх бакоў канфлікту. Талкачоў упэўнены, што пасля гэтых крокаў трэба ўсталяваць фотапасткі, якія будуць фіксаваць, хто парушае чысціню і парадак. 

Фота “Голас Касцюкоўшчыны”.