На ўскраіне сталіцы Лімы перуанскія археолагі адшукалі мумію, загорнутую ў скрутак. Знаходка адносіцца да даінкскіх часоў.
Мумія была знойдзена ў падземнай грабніцы, загорнутай у пахавальны вузел разам з керамікай і вяроўкай, а таксама з кавалачкамі скуры і валос. Падлетак жыў паміж 1100 і 1200 гадоў таму і мог належаць да культур Лімы ці Ічмы. Па меркаванню мясцовых археолагаў, мумія была знойдзена ў добрым стане захаванасці – паведамляе інфармацыйнае агенства Reuters.
У археалагічным комплексе Кахамаркілья паблізу Лімы гэта ўжо не першая знаходка падобнага кшталту. Сёлетняя мумія была знойдзена прыкладна ў 200 метрах ад муміі леташніх археалагічных даследаванняў. Наогул падчас сёлетніх раскопак археолагамі былі знойдзены парэшткі васьмі дзяцей і дванаццаці дарослых, якія былі прынесены ў ахвяру каля 800-1200 гадоў таму.
Старадаўні комплекс Кахамаркілья складаецца не толькі з пахаванняў, але і руінаў чатырох пірамід і іншых збудаванняў, такіх як сцены, выкладзеныя ў выглядзе лабірынта. Паселішча з’яўляецца другім па велічыні старажытным горадам з сырцовай цэглы ў Перу пасля Чан-Чана на поўначы краіны і тысячу гадоў таму з’яўлялася буйным гандлёвым цэнтрам.
Наогул на той час Перу была домам разнастайных індзейскіх культур, якія квітнелі за стагоддзя да таго, як імперыя інкаў захапіла шырокія тэрыторыі Андаў і ўзбярэжжа краіны.
Фота Reuters