У Магілёве жыхары змагаюцца за прадуктовы кіёск, які паводле чыноўнікаў – анахранізм

Каля 500 подпісаў сабралі жыхары дамоў па вуліцы Сіманава, каб адстаяць маленькі гандлёвы павільён у крокавай дасягальнасці.

Невялікі гандлёвы шапік са свежым хлебам, мяснымі і малочнымі вырабамі ў асартыменце размяшчаецца каля дома нумар 67 па вуліцы Сіманава ў Магілёве. Нядаўна Магілёўскі гарвыканкам накіраваў на адрас Дарожна-маставога прадпрыемства рэкамендацыю не працягваць арэнду з уласнікам гэтага кіёска і яшчэ 25-ці падобных павільёнаў у абласным цэнтры. Прычына ў тым, што паводле меркавання чыноўнікаў “яны маральна састарэлі і не адпавядаюць сучаснаму абліччу горада” – пішуць “Магілёўскія ведамасці”. 

У выпадку з кіёскам па вуліцы Сіманава, чыноўнікі мяркуюць, што ліквідацыя гандлёвага аб’екта мала паўплывае на інтарэсы жыхароў – быццам бы ў крокавай даступнасці таксама знаходзяцца крамы “Перекресток”, “Хіт”, “Дабрацен” і іншыя. Яны лічаць, што такая форма гандлю як гэтыя шапікі – гэта анахранізм. І вонкавы выгляд падобных аб’ектаў не адпавядае сучаснаму абліччу абласнога цэнтра.

Процілеглай пазіцыі прытрымліваюцца самі жыхары бліжэйшых дамоў па вуліцы Сіманава ў Магілёве. Так, выданне “Магілёў анлайн” перадае меркаванне мясцовых жыльцоў, што да такіх крамаў як “Перекресток” і “Дабраном” ісці значна далей, а прадуктовы асартымент іх не задавальняе. 

Галоўныя перавагі шапіка па вуліцы Сіманава, выглядае – заўсёды свежы, нават цёплы хлеб, і сапраўды крокавая дасягальнасць аб’екта. Кіёскі знаходзіцца пад самым домам нумар 67.

Адміністрацыя шапіка звярнулася да мясцовых жыхароў з просьбай адстаяць гандлёвы аб’ект. На сённяшні дзень, паведамляецца, жыльцы бліжэйшых дамоў сабралі ўжо каля 500 подпісаў пад зваротам да гарадскіх уладаў з просьбай пакінуць гандлёвы павільён на ранейшым месцы.

Фота: Mogilev.online