У Горках на вуліцы Будаўнікоў малады чалавек у двары прыватнага дома распальваў мангал. Дзень хіліўся да вечара, і, каб справа пайшла хутчэй ён плёснуў вадкасць-распальвальнік. Але пары вадкасці патрапілі на вопратку і тканіна хутка ўспыхнула – паведамляе міністрэства па надзвычайных справах. З апёкамі юнака шпіталізавалі ў раённую бальніцу.
Фота ілюстрацыйнае
Пра выпадак паведамляе клімавіцкая раённая газета “Родная ніва”. Мінак шпурнуў недакурак праз плот у двор рэдакцыі, той патрапіў на трухлявы пень, які задыміўся і загарэўся. Пажар своечасова пабачылі супрацоўнікі рэдакцыі і залілі агонь вадой з вядра.
Здарэнне адбылося ў працоўны дзень, таму рэдакцыі ўдалося пазбегнуць большай бяды.
Фота: “Родная ніва”
Позна вечарам 16 чэрвеня МНС атрымала паведамленне аб загаранні пароў бітуму, якія выходзілі з дыхальнай арматуры металічнага рэзервуара на заводзе ў Асіповічах Магілёўскай вобласці па вуліцы Чапаева.
Работнікам МНС прыйшлося астуджаць рэзервуары на прадпрыемстве. У выніку загарання пацярпелых няма, прычына інцыдэнту высвятляецца – гаворыцца ў паведамленні ратавальнай службы.
МНС не ўдакладняе назву прадпрыемства, аднак найбольш верагодна, што такія сховішчы бітуму можа мець толькі буйны дахавы завод “ТэхнаНІКОЛЬ”, размешчаны па вуліцы Чапаева, 11.
Фота: “Тэхнаніколь”
Зусім нядаўна на mogilev.media выйшаў матэрыял пра пенсіянерку з вёскі Падкняжанне Шклоўскага раёна, якая нібыта паліла гаспадарчае смецце, на ёй загарэлася вопратка і жанчына атрымала апёкі 40% цела.
Насамрэч аказалася, што жанчыну падпаліў яе сужыцель. Менавіта гэты факт патлумачыла пенсіянерка лекару пры шпіталізацыі.
Следча-аператыўнай групай, якая прыбыла на месца здарэння, быў праведзены пільны агляд, які пацвердзіў словы жанчыны. Падрабязна зафіксавана карціна здарэння, апытаны суседзі і сужыцель пацярпелай.
Высветлена, што падчас сумеснага распівання спіртнога паміж сужыцелямі ўзнікла сварка. Мужчына абліў жанчыну вадкасцю лёгкай на загаранне і падпаліў. У выніку яна атрымала цяжкія тэрматраўмы.
Спалохаўшыся наступстваў, мужчына паспрабаваў схаваць сляды злачынства і звярнуўся да суседзяў, каб тыя выклікалі хуткую. Медыкам, якія прыбылі на месца здарэння, ён растлумачыў, што жанчына займалася паленнем гаспадарчага смецця і на ёй выпадкова загарэлася адзенне – паведамляе следчы камітэт.
На дадзены момант у дачыненні да мужчыны ўзбуджана крымінальная справа за замах на забойства, учыненае з асаблівай жорсткасцю. Падазроны затрыманы, праводзяцца следчыя дзеянні.
Што да жанчыны, то ў цяперашні час яе стан ацэньваецца лекарамі, як цяжкі.
Фота: sk.gov.by
