Ад удару расіянамі па рэстаране ў Краматорску восем чалавек загінулі, сярод іх трое дзяцей

Увечары 27 чэрвеня расійскія войскі нанеслі ракетны ўдар па Краматорску ў Данецкай вобласці Украіны. Паведамлялася, што атака ажыццяўлялася комплексамі “Іскандэр”, альбо С-300. Адна з ракет патрапіла ў рэстаран.

На раніцу 28 чэрвеня колькасць ахвяр скала восем чалавек, сярод іх трое непаўналетніх – 17-гадовая дзяўчына і дзве сястры 14-ці гадоў. Яшчэ 60 чалавек былі параненыя – піша агенцтва Unian.

Фота: Unian

Кіеў атакаваны “Іскандэрамі”, загінулі трое – у тым ліку дзіця

У ноч на 1 чэрвеня Кіеў падвергся чарговай атацы расійскімі ракетамі. Тры чалавекі загінулі, дзесяць былі параненыя. Сярод ахвяр і параненых – дзеці.

– Сёння ноччу праціўнік зноў ужыў ракеты аператыўна-тактычнага ракетнага комплексу “Іскандэр” па аб’ектах грамадзянскай і крытычнай інфраструктуры Кіеўскай вобласці. Папярэдне, сіламі і сродкамі Паветраных Сіл Узброеных Сіл Украіны 10 з 10 ракет былі знішчаны. – гаворыцца ў ранішняй зводцы Генштаба Украіны.

Па стане на 07:15 раніцы вядома аб 3 загінуўшых (з іх адно дзіця 10-11 гадоў), 10 траўміраваных (сярод іх адно дзіця) – перадае Unian.

Фота: Unian

Расійскія войскі ўдарылі па паліклініцы ў Дняпры, адзін чалавек загінуў

Чарговы ракетны ўдар адбыўся раніцай 26 мая – пасля начной атакі на горад Днепр, пра якую пісалі mogilev.media. Нападзенню падверглася медыцынская ўстанова – паведаміў у сваім Тэлеграм-канале кіраўнік абласной ваеннай адміністрацыі Сяргей Лысак.

Адзін чалавек загінуў, яшчэ пятнаццаць атрымалі раненні, сярод пацярпелых – двое дзяцей 3 і 6 гадоў. Выратавальныя работы на месцы працягваюцца, дадзеныя пра пацярпелых могуць удакладняцца.

Фота: Unian

Расійскія войскі ноччу зноў масава атакавалі Кіеў, усе ракеты збітыя

У выніку начной атакі на Кіеў ніхто не пацярпеў. У Адэсе адзін чалавек загінуў.

З пачатку траўня гэта ўжо дзявятая ракетная атака на сталіцу Украіны. Украінскае ваеннае камандаванне заявіла, што ўсе ракеты ноччу 18 мая былі збітыя. Ніякіх пашкоджанняў інфраструктуры альбо будынкам нанесена не было, максімальныя пашкоджанні назіраліся ў Дарніцкім раёне – тут адбылося ўзгаранне ў гаражным кааператыве.

Папярэдне, атака на Кіеў была ажыццёўлена са стратэгічных бамбардзіроўшчыкаў Ту-95МС, Ту-160 з раёна Каспія, верагодна – крылатымі ракетамі тыпу Х-101/555. Пасля запуску ракет расійская армія задзейнічала над сталіцай Украіны свае разведвальныя БПЛА.

Уначы РФ таксама ўдарыла па Адэсе, большасць ракет была знішчана над Чорным морам, аднак адбылося трапленне ў аб’ект прамысловасці. У выніку ўдару адзін чалавек загінуў, яшчэ двое атрымалі раненні – паведамляе Unian.

Фота: Unian

Ноччу Расія зноў атакавала Украіну крылатымі ракетамі

З 18 ракет 15 было збіта сіламі супрацьпаветранай абароны Украіны, але ёсць прылёты ў Днепрапятроўскай вобласці, 25 чалавек пацярпелі.

– Каля 02:30 расійскія акупанты атакавалі Украіну з самалётаў стратэгічнай авіяцыі – напісаў у сваім Тэлеграм-канале Галоўнакамандуючы Збройнымі сіламі Украіны Валерый Залужны – дзевяці Ту-95 з Аленегорскай вобласці (Мурманская вобласць) і двух Ту-160 з Каспійскага мора.

Усе ракеты, выпушчаныя па Кіеўскай вобласці, паводле папярэдняй інфармацыі былі збітыя – паведамляе агенцтва Unian.

У Паўлаградзе пашкоджана прамысловае прадпрыемства. Там узнік пажар, які ратавальнікі ўжо патушылі. У жылой зоне знявечана 19 шматпавярховых дамоў, 25 прыватных дамоў, 6 школ і дашкольных устаноў адукацыі, 5 магазінаў. Пацярпелі 25 чалавек, з іх трое дзяцей – адзначыў глава Днепрапятроўскай абласной ваеннай адміністрацыі Сяргей Лысак.

Фота: Тэлеграм-канал Сяргея Лысака

Навіны пабрацімаў: Мікалаеў. У выніку расійскага абстрэлу пашкоджаны шпіталь, трансфарматарная падстанцыя і газаправод

Жылыя дамы Мікалаева і аб’екты грамадзянскай інфраструктуры пацярпелі падчас чарговага ракетнага абстрэлу расійскімі акупантамі.


Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.


Як паведамляецца прадстаўнікамі Офісу генеральнага пракурора Мікалаеўскай вобласці, 2 кастрычніка 2022 года у 03:45 расійскія вайскоўцы ажыццявілі масіраваны ракетны абстрэл жылых раёнаў горада.

 Пашкоджаны шматпавярховыя жылыя дамы, памяшканні шпіталю.

Разбурэнням падвергліся таксама і трансфарматарная падстанцыя, электрасеткі і газаправод.

Інфармацыя аб пацярпелых удакладняецца.


Пабрацімства Мікалаева з Магілёвам было замацаванае дамовай у 2009 годзе.

31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.

Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.

Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян.

Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».

Вайна ва Ўкраіне. У Харкаве паболела ахвяраў ад расійскіх атак. Загінула трое чалавек і яшчэ чацвёра параненыя

Расійскія войскі атакавалі Харкаўскую ЦЭЦ увечары 11 верасня. Двое яе працаўнікоў загінулі і яшчэ двое атрымалі раненні. Уначы расіяне зноў ударылі па горадзе. Часткова разбураны 5-павярховы жылы дом. 1 чалавек загінуў, 2 атрымалі раненні.

Пра тое ў тэлеграм-канале паведамляе кіраўнік абласной ваеннай адміністрацыі Алег Сінягубаў. Ён піша, што па Харкаве ўначы расійскія войскі стралялі з ракетных комплексаў С-300. Па яго словах папярэдне вядома пра 1 загінулага і 2 параненых.

У выніку расійскіх удараў па аб’екце крытычнай інфраструктуры 11 верасня колькасць загінулых павялічылася да двух чалавек. Яны былі працаўнікамі прадпрыемства.

«Каля 20:00 11 верасня вораг нанёс ракетны ўдар па Халаднагорскім раёне, пашкоджаны абʼект крытычнай інфраструктуры. 2 работнікі загінулі. Ратавальнікі амаль усю ноч лакалізавалі маштабны пажар», – адзначае Сінягубаў.

Расійскія войскі ўдарылі па Харкаўскай ЦЭЦ. У многіх раёнах гораду прапала святло і вада. У сетках паведамлялі, што ў Харкаве спынілася метро.

«У выніку расійскіх ракетных удараў знікла электразабеспячэнне ў Харкаве і на значнай частцы Харкаўскай вобласці. Таксама без электрычнасці не працавалі помпы, якія падаюць ваду ў дамы людзей. Цяпер у вобласці адноўлена 80% электразабеспячэння і водазабеспячэння. Работы працягваюцца», – адзначае Алег Сінягубаў.

Акрамя Харкаўскай вобласьці былі цалкам абясточаныя Данецкая вобласць, часткова – Запарожская, Днепрапятроўская і Сумская, піша інфармацыйная агенцтва «УНІАН».

У Сумскай, Днепрапятроўскай і Палтаўскай абласцях удалося цалкам аднавіць электразабеспячэнне.

 

Вайна ва Ўкраіне. У Харкаве Расія зноў забіла людзей (абноўлена)

За прамінулыя содні ў Харкаўскай вобласці ад расійскіх абстрэлаў загінула 4 чалавекі. Адна жанчына сканала ў шпіталі. З раненнямі ў мясцовыя больніцы даставілі 10 чалавек.

Пазней колькасць пацярпелых узрасла да 14 чалавек. З іх трое дзяцей: 3, 11 і 15 гадоў.

«Дзеці шпіталізаваныя. Медыкі ацэньваюць іх стан як сярэдні. Пагрозы іх жыццю няма. 4 дарослых атрымалі лёгкія траўмы, шпіталізацыя не спатрэбілася, ім аказалі медычную дапамогу на месцы. Стан астатніх пацярпелых – сярэдні», – адзначае кіраўнік абласной ваеннай адміністрацыі Алег Сінягубаў.

Паводле яго, ноччу, 9 верасня, расійскія войскі інтэнсіўна абстрэльвалі ракетамі абласны цэнтр і паселішчы рэгіёну.

«Пашкоджаныя прыватныя дамы, вучэбна-спартыўны цэнтр, гаспадарчыя будынкі», – паведамляў ён.

Па яго словах, за прамінулыя содні медыкі шпіталізавалі 10 чалавек: 8 – у Харкаве і дваіх у вобласці. Загінулі 4 чалавекі: 2 у Харкаве і два ў паселішчах рэгіёну. У Харкаве шпіталізаваная 53-гадовая жанчына памерла.

Алег Сінягубаў звязвае абстрэлы гораду «з поспехамі Узброеных Сіл, якія цяпер вызваляюць тэрыторыю вобласці».

«Нашы салдаты вельмі матываваныя і не пакінуць ворагу ніводнага шанцу. Вораг дэмаралізаваны і ўцякае з нашай зямлі. Мы сур’ёзна прасоўваемся і на Балаклійскім напрамку, і на іншых кірунках, але пакуль пра гэта казаць зарана», – піша ён у сваім тэлеграм канале.

Інфармацыйнае агенцтва «УНІАН» нагадвае, што 8 верасня ў выніку ўдару расійскіх войск у Харкаву пашкоджаны адміністрацыйны будынак. Загінулі двое мужчын, раненні атрымалі 5 чалавек. Двое з іх – 49-гадовы мужчына і жанчына 21 года – у цяжкім стане.

«Адбылося ўзгаранне» – Міністэрства абароны Беларусі пра «ўспышкі» на палігоне, звязаным з агрэсіяй супраць Ўкраіны

Паведамленні пра серыю ўспышак і выбухаў у кірунку аэрадрому «Зябраўка» ў тэлеграм-каналах з’явіліся познім вечарам 10 жніўня. У іх гаварылася, што нават адчувалася выбуховая хваля. Мясціна Зябраўка знаходзіцца ў Гомельскай вобласці.

Ранкам 11 жніўня тэлеканал «Министерство обороны Республики Беларусь» паведаміў, што «10 жніўня каля 23 гадзінаў падчас кантрольнага прабегу адной з адзінак тэхнікі пасля праведзенай замены рухавіка адбылося яе ўзгаранне».

«Асабістым складам своечасова прынятыя меры па тушэнні. Пацярпелых няма», – адзначана ў допісе.

Назва ваеннага аб’екту «Зябраўка» 28 ліпеня згадвалася ўкраінскім аператыўным камандаваннем «Поўнач». Тады паводле паведамленняў вайскоўцаў суседняй краіны з тэрыторыі аэрадрому «Зябраўка» была атакаваная Чарнігаўская вобласць. Па ёй выпусцілі 20 ракет з зенітна-ракетнага комплексу «С 300/С 400». У выніку нападу пацярпелі вайскоўцы.

фота з рэсурсу: ru.interfax.com.ua

У Мікалаеве, былым горадзе пабраціме Магілёва, забіты вядомы ва Ўкраіне бізнесовец і ягоная жонка. У іх дом трапіла расійская ракета

У выніку начнога абстрэлу Мікалаева трагічна загінулі генеральны дырэктар кампаніі «Нібулон» Аляксей Вадатурскі і яго жонка Раіса Вадатурская. У іх дом пацэліла ракета.

«Аляксей Апанасавіч шмат зрабіў для Мікалаеўскай вобласці, шмат для Украіны. Яго ўклад у развіццё сельскагаспадарчай і суднабудаўнічай галін, развіццё рэгіёну неацэнны, адзначаў  кіраўнік абласной ваеннай адміністрацыі Віталій Кім.

Аляксею Вадатурскаму было 74 гады. Ён уваходзіў у топ-100 найбагацейшых украінцаў. У 2021 годзе Forbes Украіна ацэньваў яго багацце ў 430 мільёнаў долараў. Вадатурскі ўганараваны званнем Герой Украіны.

У ноч на 31 ліпеня пасля 01:00 Мікалаеў зазнаў масіраваны абстрэл. Акрамя загінулых Вадатурскіх паведамляецца яшчэ пра двух параненых. Пашкоджаныя аб’екты інфраструктуры: гасцініца, спартыўны комплекс, дзве ўстановы адукацыі, станцыя тэхнічнага абслугоўвання, а таксама жылыя дамы.

Мікалаеў абстрэльваюць штодзённа.

30 ліпеня горад уначы быў атакаваны з рэактыўных сістэм залпавага агню «Смерч-С». Адзін чалавек загінуў, шэсць атрымалі раненні.

29 ліпеня ў выніку ракетнага абстрэлу Мікалаева загінула 7 і было параненых 7 чалавек. У момант выбуху людзі стаялі на прыпынку грамадскага транспарту.


Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.


Пабрацімства Мікалаева з Магілёвам было замацаванае дамовай у 2009 годзе. 31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.

Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.

Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян. Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».