Навіны пабрацімаў. У славацкім Бардзеёве паболела турыстаў. У рэгіёне спадзяюцца на аднаўленне дакавіднай дынамікі

У паўночна-ўсходняй Славакіі ўсе антыкавіданыя абмежаванні скасавалі ў канцы сёлетняга сакавіка. Практычна адразу турысты сталі наведваць рэгіён. Найбольш прывабнымі для іх сталі імпрэзы, забароненыя падчас пандэміі. Паболела наведнікаў у аквапарках, аздараўленчых цэнтрах, музеях і рэстаранах.

Бардзеёў – горад партнёр Магілёва з 18 сакавіка 1996 году. Насельніцтва крыху больш за 32 тысячы чалавек. Упершыню згадваецца ў 1247 году. У сярэднявеччы меў статус свабоднага каралеўскага гораду. У 1986 годзе быў уганараваны Еўрапейскай прэміяй за рэстаўрацыю гістарычных помнікаў і ўнесены ў спіс культурнай спадчыны UNESCO. Большасць насельніцтва праваслаўныя і грэка-каталікі.

Аднаўленне турыстычнага сезону праходзіць добра, кажуць ва ўстановах, найбольш папулярных у замежнікаў. Яны прызнаюць, што наведвальнасць яшчэ не дасягнула дапандэмійнага ўзроўню 2019 года, але, найгоршае для тураператараў мінула.

Наведванне нашых выставаў у Бардзеёве і на Бардзеёўскім курорце ад пачатку лета пачалося шматабяцальна, кажа супрацоўніца мясцовага Музею Шарыша.

Паводле яе, у першым паўгоддзі 2022 года гэтыя ўстановы наведалі 13 779 чалавек, з іх 7 819 прыйшлі ў чэрвені, што склала 57%. У той жа час, за першую палову мінулага году, калі два месяцы яны былі зачыненыя, наведалася толькі 4 607 чалавек.

«Да пандэміі мы зафіксавалі 18 698 наведнікаў у першай палове 2019 года. Мы лічым, што тэндэнцыя росту апошніх тыдняў не будзе парушана далейшымі абмежаваннямі», – спадзяецца суразмоўніца рэсурсу Puchov.virtualne.skz.

Супрацоўнікі турапэратараў адзначаюць станоўчую дынаміку правядзенні масавых імпрэзаў: кірмашоў, канцэртаў, кангрэсаў, карпаратываў, вяселляў ды тых жа выставаў.