Хроніка прыхаванай рэальнасці. Суды, зняволенні, вызваленні

Звесткі пра пераслед паводле праваабаронцаў, мэдыяў і родзічаў тых, хто зазнае яго.

Сяргей Франчук

Асуджаны на 15 дзён адміністрацыйнага арышту.

Праваабаронцы паведамляюць, што жыхар Бабруйску на «пакаяльным відэа» «прызнаецца» ва ўдзеле ў акцыях пратэсту пасля выбараў, а таксама ў тым, што пісаў негатыўныя каментары пра міліцыянтаў.

На відэа ён кажа таксама, што з’яўляецца стрыечным братам намесніка камандзіра ў Палку Каліноўскага Вадзіма Кабанчука.

Напярэдадні Франчуку прызначылі 15 сутак арышту за «непадпарадкаванне».

Праваабаронцы звяртаюць увагу, што падчас затрымання супраць Франчукава быў ужыты гвалт – на «пакаяльным відэа» ён з залепленым ілбом.

Ігар Банцэр

Асуджаны на 15 дзён адміністрацыйнага арышту.

Праваабаронцы дазналіся пра зняволенне Банцэра ад сукамерніка, які выйшаў на волю. Паводле яго на Банцэра, нібыта, складзена 15 адміністрацыйных пратаколаў.

Банцэр адседзеў 1 год і 6 месяцаў абмежавання волі ў калоніі адкрытага тыпу («хіміі») за хуліганства, бо ў верасні 2020 году станчыў без штаноў перад міліцэйскай машынай.

Падчас суду трымаў сухую галадоўку 16 дзён, на той момант гэта быў беларускі рэкорд.

Міхаіл Лістападаў

Асуджаны да трох гадоў пазбаўлення волі за намер удзельнічаць у вайне на баку Украіны, паведамляюць праваабаронцы.

Яму інкрымінаваліся «арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх», «падрыхтоўка да злачынства», «удзел на тэрыторыі замежнай дзяржавы ва ўзброеным фармаванні або ўзброеным канфлікце, ваенных дзеяннях, вербаванне або падрыхтоўка асоб да такога ўдзелу».

Паводле праваабаронцаў працэс праходзіў у закрытым рэжыме. Праўладныя крыніцы сцвярджаюць, што асуджаны ўступіў у ваенізаванае падраздзяленне.

Александр Курганскі

Асуджаны на 1,5 гады калоніі.

Крымінальную справу супраць яго разглядалі ў Гродзенскім абласным судзе. Суддзя Аляксандр Козел прызнаў Курганскага вінаватым у «абразе прадстаўніка ўлады», ды «распальванні расавай, нацыянальнай, рэлігійнай або іншай сацыяльнай варожасці або варожасці».

Паводле праваабаронцаў Курганскі быў затрыманы ў межах крымінальнай справы, узбуджанай за каментары ў сацсетках аб гібелі супрацоўніка КДБ Дзмітрыя Федасюка і айцішніка Андрэя Зельцара. 

Курганскага вінавацілі ў тым, што ён паставіў «лайк» пад пастом аб інцыдэнце.

Інцыдэнт з Зельцарам адбыўся 28 верасня 2021 году. У КДБ тады паведамілі, што ў Мінску падчас рэйду быў смяротна паранены супрацоўнік ведамства. Сілавікі ў адказ адкрылі агонь і застрэлілі жыхара кватэры. Пазней стала вядома, што ім аказаўся Андрэй Зэльцара, супрацоўнік кампаніі EPAM Systems.

За каментары ў сацсетках у «справе Зельцара» затрымалі ўжо каля 200 чалавек.

Аляксей Багдзей

Асуджаны на 6 гадоў калоніі ўзмоцненага рэжыму.

Яго прызналі вінаватым у “арганізацыі масавых беспарадкаў, якія суправаджаліся гвалтам над асобай, пагромамі, падпаламі, знішчэннем маёмасці або узброеным супрацівам прадстаўнікам улады”.

Справу разглядаў суддзя Максім Галубовіч з суду Ленінскага раёна Гродна.

Паводле праваабаронцаў вядома, што Багдзей у жніўні 2020 года ў тэлеграм-канале «Гродна для жыцця» размяшчаў тэкставыя паведамленні, якія змяшчалі заклікі да гвалтоўных дзеянняў, пісаў пра выраб кактэйляў «Молатава», заклікаў да звяржэння дзеючай улады, прымянення гвалту, блакіроўкі праездаў, аказання супраціву прадстаўнікам улады.

Андрэй Гіль

Асуджаны на 15 дзён адміністрацыйнага арышту.

Праваабаронцы дазналіся пра зняволеньне жыхара Баранічаў з праўладных тэлеграм-каналаў. Паводле іх паведамлянняў, ён асуджаны за «распаўсюд экстрэмісцкіх матэрыялаў». Акрамя таго супраць мужчыны распачатая крымінальная справа за «абразу прадстаўніка ўлады».