Гэты дзень у гісторыі: 29 красавіка

29 красавіка – Міжнародны дзень танцу.

 29 красавіка 1386 года Вялікі князь смаленскі Святаслаў, які падтрымаў выступленне Андрэя Полацкага супраць Ягайлы, разгромлены пад Мсціславам.

29 красавіка 1831 года ў бітве пад Кейданамі паўстанцы разбілі расійскае войска.

29 красавіка 1863 года ў Расійскай імперыі часткова адменены цялесныя пакаранні – апублікаваны ўказ “Аб некаторых зменах у існуючай цяпер сістэме пакаранняў крымінальных і папраўчых”.

29 красавіка 1912 года нарадзіўся Мікола Ермаловіч (1921-2000), беларускі гісторык, публіцыст, крытык і літаратуразнаўца, брат магілёўскага тэатральнага рэжысёра Валянціна Ермаловіча. Заснавальнік новай беларускай рамантычнай гістарыяграфіі, аўтар і выдавец непадцэнзурных тэкстаў 1960-1980-х гг.

29 красавіка 1924 года памёр Міхаіл Пліс (1858-1924), праваслаўны святар, грамадска-культурны дзеяч, педагог, давераная асоба патрыярха Ціхана, член Цэнтральнай беларускай рады Віленшчыны і Гродзеншчыны, Віленскага беларускага нацыянальнага камітэта, выкладач Закона Божага на беларускай мове, адзін з ініцыятараў стварэння ў Вільні Святатроіцкага беларускага праваслаўнага таварыства, сузаснавальнік Таварыства беларускай школы.

29 красавіка 1931 года памёр Яўхім Карскі (1860/1961-1931), заснавальнік беларускага навуковага мовазнаўства і літаратуразнаўства, этнограф, фалькларыст, палеограф, акадэмік Пецярбургскай АН, правадзейны член Інбелкульта, Чэшскай акадэміі навук.

29 красавіка 1936 года  на мясакамбінаце імя А. Мікаяна створаны рэцэпт каўбасы “Доктарская”: свініна, гавядзіна, яйкі курыныя, сухое малако, арэх мускатны.

29 красавіка 2002 года памёр Ігар Гермянчук (1961-2002), журналіст, грамадскі дзеяч, дэпутат ВС БССР 12 склікання, рэдактар газеты “Свабода”, заснавальнік часопісу “Кур’ер”.

29 красавіка 1967 года адбылася прэм’ера мастацкага фільма “Няўлоўныыя мсціўцы”, у якой зняўся і ўраджэнец Беларусі Яфім Капелян.

29 красавіка 1940 года нарадзіўся Уладзімір Ганчарык, адзіны кандыдат ад апазыцыі на прэзыдэнцкіх выбарах у 2001 г., набраў 15,65% галасоў (А. Лукашэнка – 75,65%) выбаршчыкаў.

29 красавіка 1962 года аршанскі завод “Легмаш” выпусціў мільённую швейную машыну (завод з 1945 г., выпуск швейных машын з 1952 г.)

29 красавіка 1982 года насельніцтва Кітая перавысіла рысу ў адзін міліярд чалавек. Зараз у Кітае 1,420 млрд. чалавек. Яго “даганяе” Індыя – 1,41 млрд. (у 1982 г. – 0,73 млрд.) і можа заняць 1 месца ў свеце па насельніцтву ў найбліжэйшыя месяцы.

29 красавіка 1987 года пачаліся беларуска-латышскія пратэсты супраць будаўніцтва Дзвінскай (Даўгаўпілскай) ГЭС.